പാക്കിസ്ഥാനെ ക്രിപ്‌റ്റോ തലസ്ഥാനമാക്കാന്‍ ട്രംപ് കുടുംബത്തിന്റെ പിന്തുണ; ഇന്ത്യ-പാക് സംഘര്‍ഷത്തിലും ഇടപെടല്‍ ശ്രമം
പഹല്‍ഗാം ഭീകരാക്രമണത്തിന് പിന്നാലെ ഇന്ത്യയും പാകിസ്ഥാനും തമ്മിലുള്ള സംഘര്‍ഷം ഉയരുന്നതിനിടയില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് തന്റെ നേതൃത്വത്തിലായിരുന്നു മധ്യസ്ഥത എന്ന് ആവര്‍ത്തിച്ചു കൊണ്ടിരിക്കുകയാണ്. ഇന്ത്യ ഈ അവകാശവാദം പലവട്ടം തള്ളി എങ്കിലും ട്രംപ് പിന്മാറുന്നില്ല. ഇപ്പോള്‍ ഇതിനേക്കാള്‍ ഗൗരവമേറിയ ഒരു കാര്യം കൂടി പുറത്ത് വരുകയാണ് — പാകിസ്ഥാനെ ദക്ഷിണേഷ്യയിലെ ക്രിപ്‌റ്റോ കറന്‍സി കേന്ദ്രമാക്കാനുള്ള ശ്രമത്തിലാണ് ട്രംപ് കുടുംബം.
ട്രംപ് കുടുംബത്തിന്റെ പിന്തുണയുള്ള അമേരിക്കന്‍ ആസ്ഥാനമായ വേള്‍ഡ് ലിബര്‍ട്ടി ഫിനാന്‍ഷ്യല്‍ (WLF) എന്ന സ്ഥാപനമാണ് പാകിസ്ഥാനിലെ ക്രിപ്‌റ്റോകറന്‍സി വികസനത്തിനായുള്ള വലിയൊരു കരാറില്‍ ഒപ്പുവച്ചത്. പാകിസ്ഥാന്‍ ക്രിപ്‌റ്റോ കൗണ്‍സിലുമായുള്ള സഹകരണത്തിലൂടെയാണ് ബ്ലോക്ക്‌ചെയിന്‍ നവീകരണവും സ്റ്റേബിള്‍കോയിനുകള്‍ ഉള്‍പ്പെടെയുള്ള സംയോജന പ്രവര്‍ത്തനങ്ങളും ആരംഭിച്ചത്. ഇസ്ലാമാബാദില്‍ കഴിഞ്ഞ മാസം നടന്ന ഔപചാരിക ചടങ്ങില്‍ പാക് സര്‍ക്കാരിന്റെ ഉന്നത വ്യക്തികളും അമേരിക്കന്‍ പ്രതിനിധി സംഘവും പങ്കെടുത്തു.
വേഗത്തില്‍ രൂപപ്പെട്ട പാകിസ്ഥാന്‍ ക്രിപ്‌റ്റോ കൗണ്‍സിലിനൊപ്പം ബിനാന്‍സിന്റെ സ്ഥാപകന്‍ ചാങ്‌പെങ് ഷാവോയെ ഉപദേഷ്ടാവായി ഉള്‍പ്പെടുത്തി ഈ പദ്ധതിയെ ത്വരിതപ്പെടുത്തിയിരിക്കുകയാണ്. ഡൊണാള്‍ഡ് ട്രംപ് ‘ചീഫ് ക്രിപ്‌റ്റോ അഡ്വക്കേറ്റ്’ എന്ന നിലയിലാണ് ഈ സംരംഭവുമായി ബന്ധപ്പെട്ടിരിക്കുന്നത്. ട്രംപിന്റെ മക്കളായ എറിക്, ഡോണള്‍ഡ് ജൂനിയര്‍ എന്നിവര്‍ ‘വെബ്3 അംബാസഡര്‍’ പദവിയില്‍ പ്രവര്‍ത്തിക്കുന്നു. ഇളയ മകന്‍ ബാരണ്‍ ‘ഡെഫൈ വിഷനറി’ ആണെന്ന നിലയില്‍ പ്രവര്‍ത്തിക്കുന്നു.
വേള്‍ഡ് ലിബര്‍ട്ടി ഫിനാന്‍ഷ്യലിന്റെ 60 ശതമാനവും ട്രംപ് ഗ്രൂപ്പ് നിയന്ത്രിക്കുകയാണ്. ട്രംപിന്റെ ഈ പങ്കാളിത്തം പാക്കിസ്ഥാനെ സാമ്പത്തികമായി മുന്നോട്ട് കൊണ്ടുപോകുന്നതിനുള്ള പുതിയ വഴികള്‍ തുറക്കുകയാണ്. ഇതിലൂടെ നേരത്തേ സാമ്പത്തിക പ്രതിസന്ധിയില്‍ കുഴഞ്ഞിരുന്ന പാകിസ്ഥാന്‍ ഒരു ക്രിപ്‌റ്റോ മുന്നേറ്റം കുറിക്കാനാണ് ശ്രമിക്കുന്നത്.
ഇന്ത്യയും പാകിസ്ഥാനും തമ്മിലുള്ള സംഘര്‍ഷത്തിനു പിന്നാലെ ട്രംപ് മധ്യസ്ഥത വഹിച്ചുവെന്ന അവകാശവാദം പലതവണ ഇന്ത്യ മറുനിന്ന് തള്ളിയിരുന്നു. എങ്കിലും, ഇരു രാജ്യങ്ങളെയും തമ്മിലടുക്കാതെ സംവദിക്കാന്‍ ശ്രമിക്കുന്നതായി ട്രംപ് തുടര്‍ച്ചയായി പ്രസ്താവിക്കുന്നു. സമാധാനത്തിനായുള്ള ഈ താത്പര്യം ക്രിപ്‌റ്റോ കരാറുകളിലേക്കുള്ള വഴിയാകുകയാണോ എന്ന സംശയം ശക്തമാകുന്നു.
ഈ സാഹചര്യത്തില്‍, പാകിസ്ഥാനുമായി ട്രംപ് കുടുംബം കരാര്‍ ഒപ്പുവെച്ചിരിക്കുന്നു എന്ന കാര്യം വെറും ബിസിനസ് മുന്നേറ്റമല്ലെന്ന് കുറച്ചുപേര്‍ ചൂണ്ടിക്കാട്ടുന്നുണ്ട്. ദക്ഷിണേഷ്യയിലെ സമാധാന ശ്രമങ്ങളേക്കാള്‍ സാമ്പത്തിക ലക്ഷ്യങ്ങളാണ് ഇതിന് പിന്നിലെന്നാണ് ചില വിശകലനങ്ങള്‍. പാകിസ്ഥാനെ ക്രിപ്‌റ്റോകറന്‍സിയുടെ ആഗോള കേന്ദ്രമാക്കുന്ന പ്രവര്‍ത്തനങ്ങള്‍ ഇതിനോടകം തന്നെ ലാഭകരമായി മാറിയിട്ടുണ്ടാകാമെന്നും സൂചനയുണ്ട്.
