നാട്ടിലേക്ക് പണം അയക്കുന്ന പ്രവാസികൾക്ക് വലിയ തിരിച്ചടി: അമേരിക്കൻ നികുതി ബില്ല് ആശങ്കയുണ്ടാക്കുന്നു
കൊച്ചി: അമേരിക്കയിൽ ജോലിചെയ്യുന്ന മലയാളികൾ ഉൾപ്പെടെയുള്ള ഇന്ത്യക്കാരെ അതീവമായി ബാധിക്കുന്നതായി പുതിയ നികുതി നിയമം. അമേരിക്കൻ കോൺഗ്രസ്സിലെ ഹൗസ് ഓഫ് റപ്രസന്റേറ്റീവ്സിൽ അവതരിപ്പിച്ച പുതിയ ബില്ല് പ്രകാരം, പൗരന്മാർ അല്ലാത്തവർ നാട്ടിലേക്ക് അയക്കുന്ന പണത്തിന് 5 ശതമാനം നികുതി ഈടാക്കാനാണ് നീക്കം.
‘ദ വൺ ബിഗ് ബ്യൂട്ടിഫുൾ ബിൽ’ എന്ന പേരിൽ അവതരിപ്പിച്ചിരിക്കുന്ന ഈ ബില്ല് നിയമമായി മാറുന്നതോടെ, ഹൈ ടെക് മേഖലയിലും മറ്റ് ജോലിയിലുമുള്ള ലക്ഷക്കണക്കിന് പ്രവാസികളെ തൊടുന്ന വിധത്തിലാണ് അതിന്റെ സ്വാധീനം. എച്ച്-1ബി, എൽ-1 തുടങ്ങിയ വിസകളിൽ ജോലിചെയ്യുന്നവർ, ഗ്രീൻ കാർഡ് ഉള്ളവർ എന്നിവരെല്ലാം ഇതിന്റെ പരിധിയിൽ വരും. പണം അയക്കുന്ന സമയത്തുതന്നെ, ഉപയോഗിക്കുന്ന ബാങ്ക് അല്ലെങ്കിൽ കറൻസി എക്സ്ചേഞ്ച് ഹൗസ് നികുതിപണം നേരിട്ട് അയക്കുന്നയാളിൽ നിന്ന് ഈടാക്കും.
ഇന്ത്യൻ പൗരന്മാർ അമേരിക്കയിൽ നിന്ന് ഏറ്റവും കൂടുതൽ പണം അയയ്ക്കുന്ന വിഭാഗമാണ്. വിദേശകാര്യ മന്ത്രാലയത്തിന്റെ കണക്കുകൾ പ്രകാരം, ഏകദേശം 45 ലക്ഷം ഇന്ത്യക്കാരാണ് അമേരിക്കയിൽ താമസിക്കുന്നതും ജോലി ചെയ്യുന്നതും. റിസർവ് ബാങ്ക് ഓഫ് ഇന്ത്യയുടെ റിപ്പോർട്ടുകൾ പ്രകാരം 2023–24 സാമ്പത്തിക വർഷത്തിൽ ഏകദേശം 32 ബില്യൺ ഡോളർ (27.4 ലക്ഷം കോടി രൂപ) ഇന്ത്യയിലേക്ക് യുഎസിൽ നിന്ന് എത്തിക്കപ്പെട്ടിട്ടുണ്ട്.
ഇത് തന്നെയാണ് വരാനിരിക്കുന്ന വർഷങ്ങളിലും പ്രതീക്ഷിക്കുന്നതെങ്കിലും, പുതിയ നികുതി നിയമം നടപ്പിലായാൽ ഓരോ വർഷവും 1.6 ബില്യൺ ഡോളർ (ഏകദേശം 13,688 കോടി രൂപ) നികുതിയായി പ്രവാസികൾ നൽകേണ്ടിവരും.
നാട്ടിലെ കുടുംബങ്ങൾക്കായി കഷ്ടപ്പെട്ട് പണം അയക്കുന്ന സാധാരണ പ്രവാസിക്കാണ് ഇതിന്റെ ഏറ്റവും വലിയ ആഘാതം അനുഭവപ്പെടുക. അമേരിക്കൻ ഭരണകൂടത്തിന്റെ ഈ നീക്കം പ്രവാസികളുടെ സാമ്പത്തിക സാഹചര്യത്തെയും ഭാവിയെയും വൻതോതിൽ ബാധിക്കുമെന്നാണ് വിലയിരുത്തൽ.
