ന്യൂയോർക്ക് : ഇന്ത്യൻ കൾച്ചറൽ സൊസൈറ്റി ഓഫ് റോക്ക്ലാൻഡിന്റെ (ഐ.സി.എസ്.ആർ) ആഭിമുഖ്യത്തിൽ ന്യൂ സിറ്റിയിൽ സംഘടിപ്പിച്ച ഇന്ത്യാ ദിന പരേഡ് ദേശസ്നേഹത്തിന്റെ നിറവിൽ നടന്നു. ന്യൂ സിറ്റി ലൈബ്രറിയിൽ നിന്നാരംഭിച്ച പരേഡ് കൗണ്ടി കോർട്ട് മുന്നിൽ സമാപിച്ചു.
ഇന്ത്യൻ വസ്ത്രങ്ങളിൽ അണിഞ്ഞ് എത്തിയ ജനക്കൂട്ടം “ഭാരത മാതാ കീ ജയ്”, “വന്ദേമാതരം” മുദ്രാവാക്യങ്ങളുയർത്തി മാർച്ച് ചെയ്തു. ചെണ്ടമേളത്തിന്റെ മുഴക്കം ആഘോഷത്തിന് കരുത്തേകി. അശ്വാരൂഢരായ പോലീസ് പരേഡിന് മുന്നൊരുക്കമായി.
ഫൊക്കാന, ഹഡ്സൺ വാലി മലയാളി അസോസിയേഷൻ തുടങ്ങി വിവിധ മലയാളി സംഘടനകളും പങ്കുചേർന്നപ്പോൾ, റോക്ക്ലാൻഡ് കൗണ്ടി ടൂറിസവും പരേഡിന് പിന്തുണ നൽകി.
കൗണ്ടി കോർട്ട് മുൻവേദിയിൽ ഐ.സി.എസ്.ആർ പ്രസിഡന്റ് അൽക ഷാ ഇന്ത്യൻ പതാക ഉയർത്തി.
ഇന്ത്യയിൽ നിന്ന് എത്തിയ രാജ്മോഹൻ ഉണ്ണിത്താൻ എം.പി. മുഖ്യാതിഥിയായി പങ്കെടുത്തു. സ്വാതന്ത്ര്യത്തിന്റെ പ്രാധാന്യം പ്രത്യേകം ചൂണ്ടിക്കാട്ടിയ അദ്ദേഹം പ്രവാസ ജീവിതത്തിലും ഇന്ത്യക്കാർ ദേശസ്നേഹം അചഞ്ചലമായി കാത്തുസൂക്ഷിക്കുന്നതിൽ അഭിമാനമുണ്ടെന്ന് പറഞ്ഞു. സ്വാതന്ത്ര്യസമര സേനാനികൾക്കും ജീവൻ ബലിയർപ്പിച്ചവർക്കും അദ്ദേഹം ആദരാഞ്ജലി അർപ്പിച്ചു.
കേരള ടൈംസ് മാനേജിംഗ് ഡയറക്ടറും മുൻ ഫൊക്കാന പ്രസിഡന്റുമായ ശ്രീ. പോൾ കറുകപ്പള്ളിലും മുഖ്യാതിഥിയായി എത്തിയ എം.പി. രാജ്മോഹൻ ഉണ്ണിത്താനും “യാത്ര”യിൽ പങ്കുചേർന്ന് പ്രവാസി സമൂഹത്തെ ഒന്നിപ്പിച്ച മഹത്തായ ആഘോഷത്തിന് സാന്നിധ്യത്താൽ നിറം പകർന്നു.
റോക്ക്ലാൻഡ് കൗണ്ടി എക്സിക്യൂട്ടീവ് എഡ് ഡേ, ക്ലാർക്സ്ടൗൺ ടൗൺ സൂപ്പർവൈസർ ജോർജ്ജ് ഹോമൻ, സ്റ്റേറ്റ് സെനറ്റർ ബിൽ വെബ്ബർ, കൗണ്ടി ലെജിസ്ളേറ്റർ ഡോ. ആനി പോൾ എന്നിവരും സന്ദേശം നൽകി. ഓഗസ്റ്റ് 15-നെ റോക്ക്ലാൻഡ് കൗണ്ടിയിൽ ഇന്ത്യാ ദിനമായി പ്രഖ്യാപിക്കുന്ന പ്രോക്ലമേഷൻ ഡോ. ആനി പോൾ വായിച്ചു.
പരേഡ് സമാപനത്തോടെ വിവിധ കലാപരിപാടികളും ഭക്ഷണ വിതരണവും സ്റ്റാളുകളും അരങ്ങേറി. ഇന്ത്യൻ സംസ്കാരത്തിന്റെയും ദേശസ്നേഹത്തിന്റെയും നിറപ്പകിട്ട് പതിഞ്ഞു നിന്ന ആഘോഷം പ്രവാസി സമൂഹത്തെ ഒന്നിപ്പിക്കുന്ന സംഗമമായി മാറി.
