ബ്രസീലിൽ യാത്രാവിമാനം തകർന്നു; 62 പേർ മരിച്ചു

സാവോപോളോ: ബ്രസീലിലെ സാവോപോളോയ്‌ക്ക് സമീപം ഒരു യാത്രാവിമാനം തകർന്ന് 62 പേർ മരിച്ചെന്ന് റിപ്പോർട്ട് ചെയ്യുന്നു. അപകടത്തിന്റെ കാരണങ്ങൾ ഇതുവരെ വ്യക്തമല്ല. വിമാനത്തിൽ 58 യാത്രക്കാരും 4 ജീവനക്കാരും ഉണ്ടായിരുന്നു. ബ്രസീലിയൻ എയർലൈനായ വോപാസിന്റെ വിമാനമാണ് തകർന്നുവീണത്.

തികച്ചും ദുഃഖകരമായ വാർത്തയാണെന്ന് ബ്രസീലിയൻ പ്രസിഡന്റ് ലൂയിസ് ഇനാസിയോ ലുല ദെ സിൽവ പറഞ്ഞു. സാവോപോളോയിലേക്ക് യാത്ര ചെയ്യുന്ന വിമാനം, തെക്കൻ സംസ്ഥാനമായ പരാനയിലെ കസ്കാവൽ വിമാനത്താവളത്തിൽ നിന്നാണ് പുറപ്പെട്ടത്. സംഭവത്തിന്റെ വിഡിയോകൾ സാമൂഹിക മാധ്യമങ്ങളിൽ വ്യാപകമായി പ്രചരിക്കുന്നു.