നോർത്ത് അമേരിക്കയിലെ മലയാളി സമൂഹത്തെ വിവിധ കേന്ദ്രങ്ങളിൽ നിന്ന് ഒരേ ലക്ഷ്യത്തിലേക്ക് കൂട്ടിയിണക്കി അരങ്ങേറിയ MCUBE- (Magic, Melody, Message) ന്റെ എട്ട് വേദികളും ശ്രദ്ധേയമായ വിജയമായി മാറി.
കലഹാരി റിസോർട്ടിൽ നടന്ന ഫൊക്കാനാ വാർഷിക കൺവെൻഷനിൽ തുടക്കം കുറിച്ച MCUBE അമേരിക്കൻ പര്യടനം, ഫിലഡൽഫിയ, ഷിക്കാഗോ, ഫ്ലോറിഡ, ന്യൂജഴ്സി, ഹ്യൂസ്റ്റൺ, ഡാലസ്, ന്യൂയോർക്ക് എന്നിവിടങ്ങളിൽ നിറഞ്ഞ സദസ്സുകളിൽ അരങ്ങേറി. ഓരോ നഗരത്തിലും ലഭിച്ച മികച്ച സ്വീകരണവും ജനപങ്കാളിത്തവും ഈ സംരംഭത്തിന്റെ പ്രസക്തി പ്രതിഫലിപ്പിക്കുന്നതായിരുന്നു.
ഇന്ദ്രജാലത്തിനും സംഗീതത്തിനും അപ്പുറം, ഭിന്നശേഷിക്കാരായ വ്യക്തികൾക്ക് കൂടുതൽ അവസരങ്ങളും സ്വയംപര്യാപ്തതയും ഉറപ്പാക്കുക എന്ന വലിയ സാമൂഹിക ലക്ഷ്യത്തോടെയാണ് MCUBE സംഘടിപ്പിച്ചത്. കാസർഗോഡിൽ രൂപംകൊണ്ടുകൊണ്ടിരിക്കുന്ന International Institute for People with Disabilities (IIPD) എന്ന സംരംഭത്തിന് പിന്തുണ സമാഹരിക്കുകയായിരുന്നു ഈ യാത്രയുടെ പ്രധാന ഉദ്ദേശ്യം.
Different Art Centre (DAC)-ൽ വർഷങ്ങളായി നടപ്പാക്കിവരുന്ന പ്രവർത്തനങ്ങളുടെ തുടർച്ചയായാണ് IIPD-യെ കാണുന്നത്. ഭിന്നശേഷിക്കാരായ കുട്ടികളിലും യുവാക്കളിലും ഉള്ള കഴിവുകൾ കണ്ടെത്തി പരിശീലനത്തിലൂടെയും പുനരധിവാസത്തിലൂടെയും വിദ്യാഭ്യാസത്തിലൂടെയും തൊഴിൽപരമായ അവസരങ്ങളിലൂടെയും അവരെ കൂടുതൽ സ്വതന്ത്രമായ ജീവിതത്തിലേക്ക് നയിക്കുക എന്നതാണ് പദ്ധതിയുടെ അടിസ്ഥാന കാഴ്ചപ്പാട്. കാസർഗോഡിന്റെ പ്രത്യേക സാമൂഹിക പശ്ചാത്തലത്തിൽ, എൻഡോസൾഫാൻ ദുരിതബാധിതർക്കും ആവശ്യമായ പരിഗണന നൽകുന്ന സമഗ്രമായ ഒരു കേന്ദ്രമെന്ന നിലയിലാണ് IIPD വിഭാവനം ചെയ്യപ്പെട്ടിരിക്കുന്നത്.
MCUBE-ന്റെ ഒരുമാസം നീണ്ട വിവിധ പര്യടനത്തിന് മുഖ്യ നേതൃത്വം വഹിച്ചത് Different Arts Center-ന്റെ advisory board മെമ്പർ ആയ ശ്രീ പോൾ കറുകപ്പള്ളിലാണ്. DAC-യുടെ മറ്റ് advisory board അംഗങ്ങളായ ശ്രീ ജോൺസൺ സാമുവലും ഡോ. ബേബി സാം സാമുവലും അദ്ദേഹത്തോടൊപ്പം സംഘാടനത്തിൽ പങ്കാളികളായി. അതോടൊപ്പം, കല, മാധ്യമം, സാമൂഹിക സേവനം, സാംസ്കാരിക പ്രവർത്തനം, സംഘാടന രംഗം തുടങ്ങി വിവിധ മേഖലകളിൽ നിന്നുള്ള നിരവധി പേരുടെ സഹകരണവും ഈ സംരംഭത്തിന് ലഭിച്ചു.
വേദികളിൽ അവതരിപ്പിക്കപ്പെട്ട മാജിക്കും സംഗീതവും സദസ്സുകൾക്ക് ആസ്വാദനമായി മാറിയപ്പോൾ, അതിലൂടെ മുന്നോട്ടുവച്ച സാമൂഹിക ലക്ഷ്യം നിരവധി ഹൃദയങ്ങളിൽ പ്രതീക്ഷയും പങ്കാളിത്തത്തിനുള്ള സന്നദ്ധതയും സൃഷ്ടിച്ചു.
MCUBE-ന്റെ എട്ട് വേദികൾ വിജയകരമായി പൂർത്തിയാക്കാൻ ഒപ്പം നിന്ന DAC-യുടെ സഹപ്രവർത്തകർ, സംഘാടകർ, കലാകാരന്മാർ, സന്നദ്ധ പ്രവർത്തകർ, വിവിധ മേഖലകളിൽ നിന്നുള്ള സഹകാരികൾ, പ്രത്യേകിച്ച് നോർത്ത് അമേരിക്കയിലെ മലയാളി സമൂഹം — എല്ലാവരോടും ശ്രീ പോൾ കറുകപ്പള്ളിൽ നന്ദി രേഖപ്പെടുത്തി.
