വയനാടിന് അഞ്ച് കോടി രൂപ ധനസഹായം: തമിഴ്നാട് മുഖ്യമന്ത്രിയുടെ പ്രഖ്യാപനം
ചെന്നൈ: വയനാട് ദുരിതാശ്വാസ പ്രവർത്തനങ്ങൾക്കായി തമിഴ്നാട് മുഖ്യമന്ത്രി എം.കെ. സ്റ്റാലിൻ അഞ്ച് കോടി രൂപ ധനസഹായം പ്രഖ്യാപിച്ചു. മലയാളി ഐഎഎസ് ഉദ്യോഗസ്ഥരായ ഡോ. ജി.എസ്. സമീരൻ, ജോണി ടോം വർഗീസ് എന്നിവരുടെ നേതൃത്വത്തിലുള്ള പ്രത്യേക സംഘം ദുരിതാശ്വാസ പ്രവർത്തനങ്ങളും രക്ഷാപ്രവർത്തനങ്ങളും ഏകോപിപ്പിക്കാൻ വയനാട്ടിലെത്തും. ഇവർക്കൊപ്പം രക്ഷാപ്രവർത്തകരും വിദഗ്ധ ഡോക്ടർമാർ അടങ്ങുന്ന ആരോഗ്യപ്രവർത്തകരുമുണ്ടാകും. അവശ്യവസ്തുക്കളും സംഘം വയനാട്ടിലെത്തിക്കും.
രക്ഷാപ്രവർത്തനത്തിനായി കൂടുതൽ സഹായം: രക്ഷാപ്രവർത്തനത്തിനാവശ്യമായ വാഹനങ്ങൾ, ആളുകൾ എന്നിവ നൽകാൻ തമിഴ്നാട് സർക്കാർ തയ്യാറാണെന്ന് എം. കെ. സ്റ്റാലിൻ വ്യക്തമാക്കി. കേരള മുഖ്യമന്ത്രി പിണറായി വിജയനുമായി ഫോണിൽ സംസാരിച്ചു, എല്ലാത്തരം പിന്തുണയും വാഗ്ദാനം ചെയ്തതായി സ്റ്റാലിൻ അറിയിച്ചു.
സൈന്യത്തിന്റെ രക്ഷാപ്രവർത്തനങ്ങൾ: സൈന്യത്തിന്റെ 200 അംഗങ്ങൾ ദുരന്തമുഖത്ത് എത്തി. കൂടുതൽ സംവിധാനങ്ങൾ എത്തിക്കാനാണ് തീരുമാനം. 330 അടി ഉയരമുള്ള താൽക്കാലിക പാലം എത്തിക്കുന്നതിന്റെ തയ്യാറെടുപ്പുകൾ നടന്നു. രക്ഷാപ്രവർത്തനം ഏകോപിപ്പിക്കാൻ കോഴിക്കോട് സൈനിക ക്യാമ്പിൽ കൺട്രോൾ റൂം തുറക്കും. തിരുവനന്തപുരത്തുനിന്നും കൂടുതൽ കരസേന എത്തും.
