കൊച്ചിയിൽ നാസ ഷാഡോസ് കേന്ദ്രം വരാനൊരുങ്ങുന്നു; ഓസോൺപാളിയുടെ നിരീക്ഷണത്തിനായി കുസാറ്റുമായി സഹകരണം
കൊച്ചി: ഓസോൺപാളിയുടെ നിരീക്ഷണവും ഗവേഷണവും ലക്ഷ്യമാക്കി നാസയുടെ ‘ഷാഡോസ്’ കേന്ദ്രം കൊച്ചിയിൽ സ്ഥാപിക്കാൻ സാധ്യത. കൊച്ചി സർവകലാശാല അന്തരീക്ഷശാസ്ത്ര പഠനവകുപ്പുമായി സഹകരിച്ചായിരിക്കും ഈ കേന്ദ്രത്തിന്റെ പ്രവർത്തനം. അമേരിക്കയിലെ മേരീലൻഡ് സർവകലാശാല, നാസ ഗോദാർഡ് സ്പെയ്‌സ് ഫ്ലൈറ്റ് സെൻ്റർ എന്നിവയുമായുള്ള ധാരണയിൽ കുസാറ്റ് കാലാവസ്ഥാവിഭാഗം എത്തിച്ചേരുകയും ചെയ്തു.
മലേഷ്യ, ഇൻഡൊനീഷ്യ, വിയറ്റ്നാം, ഫിജി, ബ്രസീൽ, കെനിയ, ദക്ഷിണാഫ്രിക്ക എന്നിവ അടക്കമുള്ള 14 രാജ്യങ്ങളിലാണ് നിലവിൽ നാസ ഷാഡോസ് കേന്ദ്രങ്ങൾ പ്രവർത്തിക്കുന്നത്. 1998 മുതലാണ് ഉഷ്ണമേഖലാ രാജ്യങ്ങളിൽ ഓസോൺ പാളി സംരക്ഷണത്തിനായി ഈ പദ്ധതി നടപ്പാക്കുന്നത്.
ഹരിതഗൃഹവാതകങ്ങളുടെ ബാധയാൽ ഓസോൺപാളിയിൽ വിള്ളലുകൾ രൂപപ്പെടുന്ന സാഹചര്യത്തിൽ, കൊച്ചിയിൽ പ്രവർത്തിക്കുന്ന പുതിയ കേന്ദ്രത്തിൽനിന്ന്‌ ആകാശത്തേക്ക് ഓസോൺസോണ്ടേ ഉപകരണം വഹിച്ചുള്ള കാലാവസ്ഥാ ബലൂണുകൾ അയക്കുമെന്ന് റിപ്പോർട്ട്. ഇതുവഴി ശേഖരിക്കുന്ന ഡാറ്റ ഒസോൺ പാളിയിലെ ശോഷണവും വിള്ളലും കണ്ടെത്തുന്നതിന് സഹായകമാകും.
ഒരു ബലൂൺ വിക്ഷേപണത്തിന് 40,000 രൂപ ചെലവ് പ്രതീക്ഷിക്കുന്നു, മാസത്തിൽ നാലുതവണയെങ്കിലും ബലൂണുകൾ വിക്ഷേപിക്കും. തുടക്കനിധി കേന്ദ്ര ശാസ്ത്രസാങ്കേതിക വകുപ്പിൽനിന്നോ ഭൗമശാസ്ത്ര മന്ത്രാലയത്തിൽനിന്നോ ലഭ്യമാക്കുമെന്ന് കരുതുന്നു. നാസയുടെ ഷാഡോസ് പ്രോജക്ട് പദ്ധതിയിൽനിന്നാണ് സാങ്കേതിക പിന്തുണ ലഭിക്കുക.
