കണ്ണൂര്‍ എഡിഎം കെ. നവീന്‍ ബാബു ആത്മഹത്യാ കേസില്‍ ജില്ലാ പഞ്ചായത്ത് മുന്‍ പ്രസിഡന്റ് പി പി ദിവ്യക്ക് ജാമ്യമില്ല. ആത്മഹത്യാ പ്രേരണക്കുറ്റത്തിന് പ്രതി ചേര്‍ക്കപ്പെട്ട ദിവ്യയുടെ മുന്‍കൂര്‍ ജാമ്യഹര്‍ജി തലശ്ശേരി പ്രിന്‍സിപ്പല്‍ സെഷന്‍സ് കോടതി തള്ളി.
ദിവ്യയുടെ പ്രസംഗം സദുദ്ദേശ്യപരമാണെന്നും, തന്റെ പങ്ക് തെറ്റായി ചിത്രീകരിക്കപ്പെട്ടുവെന്നും ഹര്‍ജിയില്‍ അവര്‍ ചൂണ്ടിക്കാട്ടി. നവീന്‍ ബാബുവിനെതിരേ അനുഭവപ്പെട്ട പരാതി പ്രശാന്തനും ഗംഗാധരനും പങ്കുവെച്ചുവെന്നും, തന്റെ പ്രസംഗം ആക്ഷേപരഹിതമാണെന്നും അവര്‍ കോടതിയെ അറിയിച്ചു.
ജാമ്യാപേക്ഷ തള്ളിയ സാഹചര്യത്തില്‍ ദിവ്യ ഹൈക്കോടതിയെ സമീപിക്കുമെന്ന് സൂചന. അതേസമയം, അടുത്തിടെ നടപ്പാക്കേണ്ട നടപടികളുമായി ബന്ധപ്പെട്ട് കണ്ണൂര്‍ ഒന്നാം ക്ലാസ് മജിസ്‌ട്രേട്ട് കോടതിയില്‍ കീഴടങ്ങാനുള്ള സാദ്ധ്യതയും നിലനില്‍ക്കുന്നുണ്ട്. ജാമ്യം നിഷേധിക്കപ്പെട്ടാല്‍ കീഴടങ്ങാന്‍ പാര്‍ട്ടി നിര്‍ദേശമുണ്ടെന്നതും റിപ്പോര്‍ട്ടുകളില്‍ വ്യക്തമാക്കുന്നു.
എഡിഎം നവീന്‍ ബാബുവിനെ ക്വാർട്ടേഴ്‌സില്‍ തൂങ്ങി മരിച്ച നിലയില്‍ ഒക്ടോബര്‍ 15ന് കണ്ടെത്തിയിരുന്നു. പത്തനംതിട്ടയിലേക്ക് സ്ഥലംമാറ്റം ലഭിച്ച നവീന്‍ ബാബുവിന് യാത്രയയപ്പ് നല്‍കിയ ചടങ്ങില്‍ ദിവ്യ അഴിമതി ആരോപണവുമായി എത്തിയതോടെ സാഹചര്യം കൂടുതല്‍ കലുഷിതമായി.
