മിഡ്ലൻഡ് പാർക്ക് (ന്യൂജേഴ്സി): മലങ്കര ഓർത്തഡോക്സ് സഭയുടെ നോർത്ത് ഈസ്റ്റ് അമേരിക്കൻ ഭദ്രാസന ഫാമിലി & യൂത്ത് കോൺഫറൻസ് കമ്മിറ്റിയെ പ്രതിനിധീകരിക്കുന്ന ഒരു സംഘം ജനുവരി 19 ന് മിഡ്ലൻഡ് പാർക്ക് സെന്റ് സ്റ്റീഫൻസ് പള്ളി സന്ദർശിച്ചു.
ചെറിയാൻ പെരുമാൾ (മുൻ കോൺഫറൻസ് സെക്രട്ടറി), ഡോ. ഷെറിൻ എബ്രഹാം (ജോയിന്റ് സെക്രട്ടറി), റിംഗിൾ ബിജു, പ്രേംസി ജോൺ II, ജയ ജോൺ, ജസ്റ്റിൻ ജോൺ (കോൺഫറൻസ് കമ്മിറ്റി അംഗങ്ങൾ) എന്നിവർ സംഘത്തിൽ ഉണ്ടായിരുന്നു.
ഫാ. ഡോ. ബാബു കെ. മാത്യു (ഇടവക വികാരി) നേതൃത്വം നൽകിയ കുർബാനയ്ക്കു ശേഷം അജു തര്യൻ (ഇടവക സെക്രട്ടറി) കമ്മിറ്റി അംഗങ്ങളെ ഊഷ്മളമായി സ്വാഗതം ചെയ്തു. ഇടവകാംഗവും ഭദ്രാസന കൗൺസിൽ അംഗവും മുൻ കോൺഫറൻസ് സെക്രട്ടറിയുമായ ജോബി ജോൺ, കോൺഫറൻസുമായുള്ള ഇടവകയുടെ ദീർഘകാല ബന്ധവും കോൺഫറൻസിൻറെ വിജയത്തിന് ഇടവക നൽകിയിട്ടുള്ള നിസ്സീമമായ പിന്തുണയും ഓർമ്മിപ്പിച്ചു.
ചെറിയാൻ പെരുമാൾ കോൺഫറൻസിന്റെ തീയതി, സ്ഥലം, പ്രാസംഗികർ തുടങ്ങിയ വിവരങ്ങൾ പങ്കുവെക്കുകയും മുൻ സെക്രട്ടറി എന്ന നിലയിലുള്ള തന്റെ അനുഭവത്തെക്കുറിച്ച് സംസാരിക്കുകയും ചെയ്തു. യുവജന നേതൃത്വത്തെ പ്രോത്സാഹിപ്പിക്കുന്നതിനായി സ്വീകരിച്ച മുൻകൈകളും അദ്ദേഹം എടുത്തുകാട്ടി.
രജിസ്ട്രേഷൻ വിശദാംശങ്ങൾ പ്രേംസി ജോൺ II നൽകി, പങ്കെടുക്കുന്നവർ അവരുടെ സീറ്റുകൾ ഉറപ്പാക്കാൻ വൈകാതെ രജിസ്റ്റർ ചെയ്യാൻ പ്രോത്സാഹിപ്പിച്ചു. ഡോ. ഷെറിൻ എബ്രഹാം സ്പോൺസർഷിപ്പ് അവസരങ്ങളും ആനുകൂല്യങ്ങളും വിശദീകരിച്ചു.
കോൺഫറൻസിന്റെ സ്മരണയ്ക്കായി പ്രസിദ്ധീകരിക്കുന്ന സുവനീറിനെക്കുറിച്ചുള്ള വിവരങ്ങൾ റിംഗിൾ ബിജു നൽകി.
കോൺഫറൻസിന്റെ രണ്ടാം ദിനത്തിൽ നടക്കുന്ന വിനോദ സായാഹ്നത്തെപ്പറ്റി ജയ ജോൺ സംസാരിക്കുകയും സബ്മിഷനുകൾ ക്ഷണിക്കുകയും ചെയ്തു. ജസ്റ്റിൻ ജോൺ മുൻ കോൺഫറൻസുകളിൽ നിന്നുള്ള തന്റെ നല്ല അനുഭവങ്ങൾ പങ്കുവച്ചു. കോൺഫറൻസിന് ആവേശവും ഊർജ്ജവും നൽകുവാൻ എത്രയും വേഗം രജിസ്റ്റർ ചെയ്യാൻ അദ്ദേഹം യുവാക്കളോട് അഭ്യർത്ഥിച്ചു.
പള്ളിയിൽ നിന്നുള്ള സ്പോൺസർമാരെയും രജിസ്റ്റർ ചെയ്തവരെയും ജോബി ജോൺ പരിചയപ്പെടുത്തുകയും അവരുടെ പിന്തുണയ്ക്ക് നന്ദി അറിയിക്കുകയും ചെയ്തു.
സണ്ണി വർഗീസ് (ഭദ്രാസന അസംബ്ലി അംഗം) കോൺഫറൻസ് കമ്മിറ്റിക്ക് നന്ദി പറയുകയും ഏറ്റവും കൂടുതൽ രജിസ്ട്രേഷനുകൾ ലക്ഷ്യമിടുന്നതിന് ഏവരെയും പ്രോത്സാഹിപ്പിക്കുകയും ചെയ്തു.
കോൺഫറൻസിന്റെ വിജയത്തിന് ഫാ. ഡോ. ബാബു കെ. മാത്യു ഇടവകയുടെ പൂർണ സഹകരണവും പിന്തുണയും വാഗ്ദാനം ചെയ്തു.
2025 ജൂലൈ 9 മുതൽ 12 വരെ കണക്ടിക്കട് ഹിൽട്ടൺ സ്റ്റാംഫർഡ് ഹോട്ടൽ & എക്സിക്യൂട്ടീവ് മീറ്റിംഗ് സെൻ്ററിലാണ് കോൺഫറൻസ് നടക്കുന്നത്. റവ. ഡോ. നൈനാൻ വി. ജോർജ് (ഓർത്തഡോക്സ് വൈദിക സംഘം ജനറൽ സെക്രട്ടറി, റവ. ഡോ. റ്റിമത്തി (ടെന്നി) തോമസ് (നോർത്ത് ഈസ്റ്റ് അമേരിക്കൻ ഭദ്രാസന സൺഡേ സ്കൂൾ ഡയറക്ടർ), ഫാ. ജോൺ (ജോഷ്വ) വർഗീസ്, (സൗത്ത് വെസ്റ്റ് അമേരിക്കൻ ഭദ്രാസന യൂത്ത് മിനിസ്റ്റർ), റവ. ഡീക്കൻ അന്തോണിയോസ് (റോബി) ആൻ്റണി (ടാൽമീഡോ- നോർത്ത് ഈസ്റ്റ് അമേരിക്കൻ ഭദ്രാസന മെൻസ് മിനിസ്ട്രി ഡയറക്ടർ) എന്നിവരാണ് മുഖ്യ പ്രാസംഗികർ. ‘നമ്മുടെ പൗരത്വം സ്വർഗത്തിലാണ്, അവിടെനിന്നുള്ള ഒരു രക്ഷകനായ കർത്താവായ യേശുക്രിസ്തുവിനെ ഞങ്ങൾ ആകാംക്ഷയോടെ കാത്തിരിക്കുന്നു”(ഫിലിപ്പിയർ 3:20) എന്ന ബൈബിൾ വാക്യത്തെ അടിസ്ഥാനമാക്കിയുള്ള ‘The Way of the Pilgrim’ (പരദേശിയുടെ വഴി) എന്നതാണ് കോൺഫറൻസിൻ്റെ പ്രമേയം. ബൈബിൾ, വിശ്വാസം, പാരമ്പര്യം, സമകാലിക വിഷയങ്ങൾ എന്നിവയെ അടിസ്ഥാനമാക്കി കുട്ടികൾക്കും യുവജനങ്ങൾക്കും മുതിർന്നവർക്കും പ്രത്യേകം സംവേദനാത്മക സെഷനുകൾ ഉണ്ടായിരിക്കും.
രജിസ്ട്രേഷനും വിശദാംശങ്ങൾക്കും www.fycnead.org സന്ദർശിക്കുക.
കൂടുതൽ വിവരങ്ങൾക്ക്, ഫാ. അബു വർഗീസ് പീറ്റർ, കോൺഫറൻസ് കോർഡിനേറ്റർ (ഫോൺ: 914-806-4595), ജെയ്സൺ തോമസ്, കോൺഫറൻസ് സെക്രട്ടറി (ഫോൺ: 917.612.8832), ജോൺ താമരവേലിൽ, കോൺഫറൻസ് ട്രഷറർ) (ഫോൺ: 917.533.3566) എന്നിവരുമായി ബന്ധപ്പെടുക.
-ഉമ്മൻ കാപ്പിൽ
