നിയമവിരുദ്ധ കുടിയേറ്റം അംഗീകരിക്കാനാകില്ല: കർശനനടപടിയുമായി സർക്കാർ.

ന്യൂഡൽഹി: നിയമവിരുദ്ധമായി യുഎസിൽ പ്രവേശിച്ച ഇന്ത്യക്കാരെ നാടുകടത്തുന്നത് പുതിയ സംഭവമല്ലെന്നും ഇത്തരം അനധികൃത കുടിയേറ്റം അംഗീകരിക്കാനാകില്ലെന്നും വിദേശകാര്യ മന്ത്രി എസ്. ജയശങ്കർ വ്യക്തമാക്കി. വ്യാഴാഴ്ച ഉച്ചകഴിഞ്ഞ് രാജ്യസഭയിൽ സംസാരിക്കുകയായിരുന്നു അദ്ദേഹം. 2009 മുതൽ 2025 വരെയുള്ള യുഎസ് നാടുകടത്തലുകളുടെ കണക്കുകൾ അദ്ദേഹം അവതരിപ്പിച്ചു.

2009-ൽ 734 പേർ, 2010-ൽ 799, 2011-ൽ 597, 2012-ൽ 530, 2013-ൽ 550, 2014-ൽ 591, 2015-ൽ 708, 2016-ൽ 1,303, 2017-ൽ 1,024, 2018-ൽ 1,180, 2019-ൽ 2,042, 2020-ൽ 1,889, 2021-ൽ 805, 2022-ൽ 862, 2023-ൽ 670, 2024-ൽ 1,368, 2025-ൽ 104 പേർ എന്നിങ്ങനെയാണ് കണക്കുകൾ.

നിയമവിരുദ്ധ കുടിയേറ്റ മാഫിയയ്ക്കെതിരെ കടുത്ത നടപടി സ്വീകരിക്കണമെന്ന് മന്ത്രി ആവശ്യപ്പെട്ടു. അനധികൃത കുടിയേറ്റം എങ്ങനെ സംഭവിച്ചുവെന്ന് സർക്കാർ അന്വേഷിച്ചുവരികയാണെന്നും എല്ലാ രാജ്യങ്ങളുടെയും ബാധ്യതയാണ് വിദേശത്ത് അനധികൃതമായി താമസിക്കുന്നവരെ തിരിച്ചെടുക്കലെന്നും ജയശങ്കർ പറഞ്ഞു.

2012 മുതൽ യുഎസ് സർക്കാരിന്റെ നയപ്രകാരം നാടുകടത്തൽ പ്രത്യേക വിമാനമാർഗമാണ് നടത്തുന്നത്. കൈവിലങ്ങുവയ്ക്കൽ യുഎസ് സർക്കാരിന്റെ നയമാണെന്നും സ്ത്രീകളെയും കുട്ടികളെയും ഇതിനോട് സംബന്ധിപ്പിച്ചിട്ടില്ലെന്നും മന്ത്രി വ്യക്തമാക്കി. നാടുകടത്തലിനിടയിൽ നിയമാനുസൃതമായ എല്ലാ സൗകര്യങ്ങളും ഉറപ്പാക്കിയിരുന്നു.

“അനധികൃത കുടിയേറ്റം ഒരു വ്യവസായമായി കൊണ്ടുനടക്കുന്നവർക്കെതിരെ ശക്തമായ നടപടി സ്വീകരിക്കും. നാടുകടത്തപ്പെട്ടവരുടെ മൊഴികൾ അടിസ്ഥാനമാക്കി കുടിയേറ്റ ഏജന്റുമാർക്കും അത്തരം ഏജൻസികൾക്കും എതിരെ മാതൃകാപരമായ നിയമനടപടികൾ സ്വീകരിക്കുമെന്ന്” ജയശങ്കർ വ്യക്തമാക്കി.