കൊച്ചി: കണ്ണൂർ എഡിഎംയായിരുന്ന നവീൻ ബാബുവിന്റെ മരണത്തിൽ സിബിഐ അന്വേഷണം ആവശ്യപ്പെട്ടുള്ള അപ്പീൽ ഹൈക്കോടതി വിധിപറയാൻ മാറ്റി. നവീൻ ബാബുവിന്റെ ഭാര്യ കെ. മഞ്ജുഷ സമർപ്പിച്ച ഹർജിയിൽ വാദം കേട്ട ശേഷമാണ് ഡിവിഷൻ ബെഞ്ച് നടപടിയെടുത്തത്.
“സിബിഐ അന്വേഷണത്തിന് എന്ത് ആവശ്യകത?” ഈ ചോദ്യം ഉയർത്തിയ ഹൈക്കോടതി, “നിലവിലെ എസ്‌ഐടി അന്വേഷണത്തിൽ പിഴവുണ്ടോ? ഉദ്യോഗസ്ഥർക്കെതിരെ ആക്ഷേപമുണ്ടോ?” എന്നതും അന്വേഷിച്ചു. സിബിഐ അന്വേഷണത്തിന് മതിയായ കാരണങ്ങളില്ലെന്ന സർക്കാർ വാദം കേട്ട ഹൈക്കോടതി, “എസ്‌ഐടി അന്വേഷണം പൂർത്തിയായ ശേഷം സിബിഐ അന്വേഷണം ആകാമല്ലോ?” എന്നും ചൂണ്ടിക്കാട്ടി.
നവീൻ ബാബുവിന്റെ കുടുംബം “കുറഞ്ഞപക്ഷം ക്രൈംബ്രാഞ്ച് അന്വേഷണമെങ്കിലും വേണം” എന്ന ആവശ്യം ഉന്നയിച്ചു. ഉന്നത ക്രൈംബ്രാഞ്ച് ഉദ്യോഗസ്ഥനെ അന്വേഷണ ചുമതലയിൽ നിയോഗിക്കണം എന്നായിരുന്നു കുടുംബത്തിന്റെ വാദം.
നിലവിലെ എസ്‌ഐടി അന്വേഷണം ശരിയായ ദിശയിലാണ് മുന്നോട്ടുപോകുന്നത്, അതിനാൽ സിബിഐ അന്വേഷണമില്ലെന്നും എസ്‌ഐടിയെ മാറ്റേണ്ടതില്ലെന്നും സർക്കാർ ഹൈക്കോടതിയെ അറിയിച്ചു.
