ഫൊക്കാനയുടെ കേരളാ കോർഡിനേറ്ററായിഇൻഡോ-അമേരിക്കൻ ടോക്ക് ഷോ പ്രൊഡ്യൂസർ ഡോ. മാത്യൂസ് കെ ലൂക്കോസ്
ന്യൂയോർക്ക്: ഫൊക്കാനയുടെ കേരളാ കോർഡിനേറ്റർ ആയി ഇൻഡോ-അമേരിക്കൻ ടോക്ക് ഷോ പ്രൊഡ്യൂസറും കേരള കോൺഗ്രസ് (എം) സംസ്ഥാന നേതാവുമായ ഡോ. മാത്യൂസ് കെ ലൂക്കോസ് മന്നിയോട്ടിനെ നിയമിച്ചതായി ഫൊക്കാന പ്രസിഡന്റ് സജിമോൻ ആന്റണി അറിയിച്ചു.പ്രശസ്ത ടോക്ക് ഷോ ‘കോഫി വിത്ത് ലൂക്ക്’ എന്നതിലൂടെ ശ്രദ്ധേയനായ ഡോ. ലൂക്കോസ്, കേരള ട്രിബ്യൂൺ ചെയർമാൻ, സൈക്കോളജിസ്റ്റ്, മോട്ടിവേഷണൽ സ്പീക്കർ, എഴുത്തുകാരൻ, പ്രമുഖ മാധ്യമപ്രവർത്തകൻ, കൺസൾട്ടന്റ്, രാഷ്ട്രീയനേതാവ്, സാമൂഹ്യ പ്രവർത്തകൻ തുടങ്ങിയ നിലകളിൽ പ്രശസ്തനാണ്. ‘കോഫി വിത്ത് ലൂക്ക്’ എന്ന ടോക്ക് ഷോയിലൂടെ നിരവധി പ്രമുഖരുടെ അഭിമുഖങ്ങൾ സോഷ്യൽ മീഡിയയിൽ വൈറലായിട്ടുണ്ട്.മെന്റൽ ഹെൽത്ത് ആൻഡ് കൗൺസിലിങ്ങിൽ ഡോക്ടറേറ്റ് നേടിയ ഡോ. ലൂക്കോസ്, നിയമം, ജേർണലിസം, ഇംഗ്ലീഷ് സാഹിത്യം എന്നിവയിൽ പഠനം പൂർത്തിയാക്കിയിട്ടുണ്ട്. പ്രമുഖ പത്രസ്ഥാപനങ്ങളിൽ മാധ്യമപ്രവർത്തകനായിരുന്ന അദ്ദേഹം, അമേരിക്കയിലെ Warren Buffett’s Berkshire Hathaway (ബെർക്‌ഷയർ ഹാത്‌വേ) Excellence in Training Award for outstanding performance in business training and leadership എന്ന പുരസ്കാരം നേടിയിട്ടുണ്ട്.വിദ്യാർത്ഥി രാഷ്ട്രീയത്തിലൂടെ പൊതു രംഗത്തേക്ക് വന്ന ലൂക്കോസ് മന്നിയോട്ട്, കൊട്ടാരക്കര സെന്റ് ഗ്രിഗോറിയോസ് കോളേജ് യൂണിയൻ മാഗസിൻ എഡിറ്റർ, യൂണിയൻ ചെയർമാൻ എന്നീ നിലകളിൽ പ്രവർത്തിച്ചിരുന്നു. കേരള കോൺഗ്രസ് (എം) സംസ്ഥാന കോർഡിനേറ്റർ എന്ന നിലയിലും, കഴിഞ്ഞ നിയമസഭാ തിരഞ്ഞെടുപ്പിൽ കൊട്ടാരക്കര അസംബ്ലി മണ്ഡലത്തിൽ നിന്ന് ജനവിധി തേടിയതുമാണ്.ലോക കേരള സഭ അംഗമായ ഡോ. ലൂക്കോസ്, സെർവ് ഇന്ത്യ, ഗാർഡൻ ഓഫ് ലൈഫ്, പ്രൊവിഡൻസ് വേൾഡ് ഐ എൻ സി എന്നീ സ്ഥാപനങ്ങളുടെ സ്ഥാപകനും സി.ഇ.ഒ.യുമാണ്. ലീഡർഷിപ്പ് മേഖലയിലുള്ള അഞ്ചോളം പുസ്തകങ്ങൾ രചിച്ചിട്ടുള്ള അദ്ദേഹത്തിന്റെ സാന്നിധ്യം ഫൊക്കാനയുടെ സാമൂഹിക, സാംസ്കാരിക, വിദ്യാഭ്യാസ രംഗങ്ങളിൽ വലിയ മുന്നേറ്റത്തിന് വഴിയൊരുക്കുമെന്ന് ജനറൽ സെക്രട്ടറി ശ്രീകുമാർ ഉണ്ണിത്താൻ, ട്രഷറാർ ജോയ് ചാക്കപ്പൻ എന്നിവർ പത്രസമ്മേളനത്തിൽ അറിയിച്ചു.
