വാഷിംഗ്ടൺ: ഒൻപത് മാസത്തോളം അന്താരാഷ്ട്ര ബഹിരാകാശ നിലയത്തിൽ കഴിയേണ്ടിവന്ന യുഎസ് ബഹിരാകാശയാത്രികരായ സുനിതാ വില്യംസും ബുച്ച് വിൽമോറും ചൊവ്വാഴ്ച വൈകിട്ട് ഭൂമിയിലേക്ക് മടങ്ങും. ഈ വിവരം നാസ അറിയിച്ചു.
വില്മോറും സുനിതയും മറ്റൊരു അമേരിക്കൻ ബഹിരാകാശയാത്രികനും ഒരു റഷ്യൻ ബഹിരാകാശയാത്രികനും ചേർന്ന് ഐഎസ്എസിൽ എത്തിയ സ്പേസ് എക്സ് ക്രൂ ഡ്രാഗൺ പേടകത്തിലായിരിക്കും മടങ്ങുക. യുഎസ് സമയം ചൊവ്വാഴ്ച വൈകുന്നേരം 5:57ന് (ഇന്ത്യൻ സമയം ബുധനാഴ്ച പുലർച്ചെ 3:30) പേടകം ഫ്ലോറിഡ തീരത്ത് ഇറങ്ങുമെന്നാണ് നാസ വ്യക്തമാക്കുന്നത്.
സുനിതയെയും സംഘത്തെയും തിരിച്ചെത്തിക്കാനായി നാല് ബഹിരാകാശ സഞ്ചാരികളുമായി ഇന്ത്യൻ സമയം ശനിയാഴ്ച പുലർച്ചെ 4:30ന് സ്പേസ് എക്സ് ക്രൂ 10 പേടകം ബഹിരാകാശ നിലയത്തിലേക്ക് പുറപ്പെട്ടു. ഞായറാഴ്ച രാവിലെ 9 മണിക്ക് ക്രൂ 10 അന്താരാഷ്ട്ര ബഹിരാകാശ നിലയത്തിൽ എത്തിയതോടെ, പുതിയ സംഘവും സുനിതയും ചേർന്നു.
ഫ്ലോറിഡയിലെ കെന്നഡി സ്പേസ് സെന്ററിൽ നിന്നാണ് ഫാൽക്കൺ 9 റോക്കറ്റിൽ സ്പേസ് എക്സ് ക്രൂ 10 വിക്ഷേപിച്ചത്. മാർച്ച് 12നാണ് ഈ ദൗത്യം നടത്താനായിരുന്നു പദ്ധതി. എന്നാൽ അവസാന നിമിഷം റോക്കറ്റിൽ സാങ്കേതിക തകരാർ കണ്ടെത്തിയതിനെ തുടർന്ന് യാത്ര താമസിപ്പിക്കേണ്ടിവന്നു.
കഴിഞ്ഞ ജൂൺ 5നാണ് സുനിത വില്യംസും ബുച്ച് വിൽമോറും ബോയിങ് സ്റ്റാർലൈനർ പേടകത്തിൽ ബഹിരാകാശ നിലയത്തിലെത്തിയത്. പേടകത്തിൽ തകരാർ വന്നതിനെ തുടർന്ന് മടക്കയാത്ര വൈകുകയായിരുന്നു. ഒടുവിൽ, നീണ്ട കാത്തിരിപ്പിനൊടുവിൽ, സുനിതയും സംഘവും ചൊവ്വാഴ്ച വൈകിട്ട് സുരക്ഷിതമായി ഭൂമിയിലേക്കെത്തും.
