ന്യൂഡല്‍ഹി: കൊളംബിയ സര്‍വകലാശാലയിലെ സ്‌കൂള്‍ ഓഫ് ആര്‍ക്കിടെക്ചറില്‍ ഗവേഷക വിദ്യാര്‍ഥിനിയായിരുന്ന ഇന്ത്യന്‍ പി.എച്ച്.ഡി. വിദ്യാര്‍ഥിനി രഞ്ജിനി ശ്രീനിവാസന്‍ കാനഡയിലേക്ക് സ്വയം നാടുകടത്തിയതായി സ്ഥിരീകരിച്ചു. 37 കാരിയായ രഞ്ജിനി തന്റെ പഠനം തുടരാന്‍ സര്‍വകലാശാല പുനഃപ്രവേശനം അനുവദിക്കുമെന്ന പ്രതീക്ഷയിലാണ്. എന്നാല്‍ യുഎസ് ഭരണകൂടം ഹമാസുമായി ബന്ധമുണ്ടെന്നാരോപിച്ച് അവരുടെ വിദ്യാര്‍ത്ഥി വിസ റദ്ദാക്കിയത് അന്യായമാണെന്ന് അവര്‍ ആരോപിക്കുന്നു.
തന്റെ അപ്പാര്‍ട്‌മെന്റില്‍ ഫെഡറല്‍ ഇമ്മിഗ്രേഷന്‍ ഏജന്റുമാര്‍ എത്തിയതിനെ തുടര്‍ന്നാണ് രാജ്യം വിടാന്‍ തീരുമാനിച്ചതെന്ന് രഞ്ജിനി വ്യക്തമാക്കുന്നു. ‘ഞാന്‍ കൊളംബിയ സര്‍വകലാശാലയില്‍ അഞ്ച് വര്‍ഷം ചെലവഴിച്ചു, ജോലി ചെയ്തു, ചിലപ്പോള്‍ ആഴ്ചയില്‍ 100 മണിക്കൂറോ അതിലധികമോ. ഇത് സംഭവിക്കുമെന്ന് ഞാന്‍ ഒരിക്കലും പ്രതീക്ഷിച്ചില്ല,’ അവര്‍ പറഞ്ഞു.
ഫുള്‍ബ്രൈറ്റ് ബിരുദം നേടിയിരുന്നതോടൊപ്പം പബ്ലിക് പ്ലാനിങ്ങില്‍ ഡോക്ടറേറ്റ് നേടാന്‍ തയ്യാറെടുത്തിരുന്നതിനിടെയാണ് ഈ സംഭവമുണ്ടായത്. ട്രംപ് ഭരണകൂടം വിഷയത്തില്‍ കടിഞ്ഞാണിടുകയും വിസ റദ്ദാക്കുകയും ചെയ്തതോടെ അവര്‍ അമേരിക്ക വിടാന്‍ നിര്‍ബന്ധിതയായി. ‘കൊളംബിയ സര്‍വകലാശാലയ്ക്ക് എന്റെ കാര്യത്തില്‍ ബോധം വരുമെന്നും വീണ്ടും ചേര്‍ക്കുമെന്നും പ്രതീക്ഷിക്കുന്നു. എന്റെ പി.എച്ച്.ഡി. പൂര്‍ത്തിയാക്കാനുള്ള എല്ലാ യോഗ്യതകളും എന്‍റേതാണ്, എന്നിരുന്നാലും ഞാന്‍ അതിനായി യുഎസിലേക്ക് തിരികെ പോകേണ്ടതില്ല,’ രഞ്ജിനി വിശദീകരിച്ചു.
കഴിഞ്ഞ ഡിസംബറിലാണ് അവര്‍ വിദ്യാര്‍ത്ഥി വിസ പുതുക്കിയത്, ട്രംപ് വൈറ്റ് ഹൗസില്‍ അധികാരമേറുന്നതിന് ഒരു മാസം മുന്‍പ്. അതേസമയം, തന്റെ അപ്പീല്‍ പരിഗണിച്ച് പ്രവേശനം പുനഃസ്ഥാപിക്കണമെന്ന് രഞ്ജിനി സര്‍വകലാശാലയോട് ആവശ്യപ്പെടുന്നു. ‘അവര്‍ എന്നോട് ചെയ്യുന്ന ഈ അനീതിയെ നേരിടാന്‍ ഞാൻ ശ്രമിക്കും. കൊളംബിയയ്ക്ക് അവരുടെ കര്‍ത്തവ്യം നിര്‍വഹിക്കേണ്ടതുണ്ട്,’ അവര്‍ കൂട്ടിച്ചേര്‍ത്തു.
