ഇറക്കുമതി തീരുവയില്‍ പുതിയ നീക്കം: ഇന്ത്യയ്ക്ക് 26% പകരച്ചുങ്കം, ചൈനയ്ക്ക് 34%
വാഷിങ്ടണ്‍: ഉയര്‍ന്ന ഇറക്കുമതി തീരുവ ചുമത്തുന്ന രാജ്യങ്ങള്‍ക്കെതിരെ ശക്തമായ നടപടിയുമായി യുഎസ് പ്രസിഡന്റ് ഡൊണാള്‍ഡ് ട്രംപ്. അമേരിക്കയില്‍ ഇറക്കുമതി ചെയ്യുന്ന ഉല്‍പ്പന്നങ്ങള്‍ക്ക് 10 ശതമാനം അടിസ്ഥാന തീരുവയോടൊപ്പം, ഇന്ത്യയ്ക്ക് 26 ശതമാനവും ചൈനയ്ക്ക് 34 ശതമാനവും അടക്കം വ്യത്യസ്ത രാജ്യങ്ങള്‍ക്ക് അധിക തീരുവ ചുമത്താന്‍ തീരുമാനിച്ചതായി ട്രംപ് പ്രഖ്യാപിച്ചു. യൂറോപ്യന്‍ യൂണിയന് 20 ശതമാനവും യുകെയ്ക്ക് 10 ശതമാനവും ജപ്പാനിന് 24 ശതമാനവുമാണ് ഈ പുതിയ നിരക്കുകള്‍.
വ്യാപാര രാഷ്ട്രീയത്തിലെ പുതിയ ഈ നീക്കം പ്രഖ്യാപിച്ചുകൊണ്ട് ട്രംപ് വ്യക്തമാക്കി, “വര്‍ഷങ്ങളായി മറ്റ് രാജ്യങ്ങള്‍ അമേരിക്കയെ ദുരുപയോഗം ചെയ്തു. ഇനി അതുണ്ടാകില്ല. ഈ നീക്കം നമ്മുടെ സമ്പദ് വ്യവസ്ഥയ്ക്ക് ശക്തി നല്‍കും.” വൈറ്റ് ഹൗസിലെ റോസ് ഗാര്‍ഡനില്‍ നടത്തിയ പ്രസംഗത്തിലാണ് ട്രംപ് ഈ പ്രഖ്യാപനം നടത്തിയത്.
ഇന്ത്യയെക്കുറിച്ച് സംസാരിക്കുമ്പോള്‍ ട്രംപ് ദില്ലിയുടെ ഇറക്കുമതി തീരുവകളെ “വളരെ കഠിനമായ”തെന്ന് വിശേഷിപ്പിച്ചു. “നരേന്ദ്ര മോദി എന്റെ നല്ല സുഹൃത്താണ്, എന്നാല്‍ ഇന്ത്യ നമ്മില്‍ നിന്ന് 52 ശതമാനം ഈടാക്കുമ്പോള്‍ ഞങ്ങള്‍ അതിന്റെ പകുതി, 26 ശതമാനം, ഈടാക്കുകയാണ്,” ട്രംപ് വ്യക്തമാക്കി. ട്രംപിന്റെ പുതിയ നീക്കത്തെ രാജ്യാന്തര വ്യാപാരരംഗത്ത് ഉറ്റുനോക്കുകയാണ്.
പുതിയ തീരുവ ഏപ്രില്‍ അഞ്ചിന് പ്രാബല്യത്തില്‍ വരും. കൂടിയ നിരക്കുള്ള തീരുവ ഏപ്രില്‍ ഒന്‍പതിന് നിലവില്‍ വരുമെന്നാണ് വൈറ്റ് ഹൗസിന്റെ ഔദ്യോഗിക വിശദീകരണം. ഈ നീക്കം അമേരിക്കന്‍ വിപണിയെ സംരക്ഷിക്കാന്‍ നിര്‍ണായകമാകുമെന്ന് ട്രംപ് ഉറപ്പിച്ചു.
