ചൈനയുടെ തിരിച്ചടി: അമേരിക്കൻ സിനിമകളുടെ ഇറക്കുമതി കർശനമായി കുറയ്ക്കുന്നു
വാഷിംഗ്ടൺ: ലോകത്തെ ഏറ്റവും വലിയ രണ്ടു സമ്പദ്‌വ്യവസ്ഥകൾ തമ്മിൽ വ്യാപകമായി തുടരുന്ന താരിഫ് യുദ്ധം ഇപ്പോൾ ചലച്ചിത്രമേഖലയിലേക്കും ബാധിച്ചിരിക്കുകയാണ്. യുഎസ് സിനിമകളുടെ ഇറക്കുമതി “മിതമായി കുറക്കാനാണ്” ചൈന നടപടി സ്വീകരിച്ചിരിക്കുന്നത് എന്നാണ് ചൈനീസ് ഫിലിം അഡ്മിനിസ്ട്രേഷൻ ഔദ്യോഗികമായി അറിയിച്ചിരിക്കുന്നത്.
അമേരിക്കൻ പ്രസിഡന്റ് ഡോണൾഡ് ട്രംപ് ചൈനീസ് ഉൽപ്പന്നങ്ങളുടെ തീരുവ 125 ശതമാനമായി ഉയർത്തിയതിന് പിന്നാലെയാണ് ഈ നടപടി. മറുപടിയായി ചൈനയും 84 ശതമാനത്തോളം തീരുവ ചുമത്തി. ഇരു രാജ്യങ്ങളുടെയും വ്യാപാര സംഘർഷം ഇപ്പോൾ ലോകത്തിലെ രണ്ടാമത്തെ വലിയ ചലച്ചിത്ര വിപണിയായ ചൈനയെയും ബാധിച്ചിരിക്കുകയാണ്.
ചൈനീസ് ഉൽപ്പന്നങ്ങൾക്ക് മേൽ വിവേചനപരമായ തീരുവ ചുമത്തുന്ന യുഎസ് സർക്കാരിന്റെ നിലപാടിന് പ്രതികാരമായി, ആഭ്യന്തര പ്രേക്ഷകർക്ക് അമേരിക്കൻ സിനിമകളോടുള്ള വിശ്വാസം കുറയുകയും ഇറക്കുമതി നിയന്ത്രിക്കാൻ അധികാരികൾ തീരുമാനിക്കുകയും ചെയ്തു. കമ്പോള നിയമം പാലിക്കാനും പ്രേക്ഷകരുടെ രുചിയെ മാനിക്കാനും ചൈന പ്രതിജ്ഞാബദ്ധമാണെന്നും, അതിന്റെ ഭാഗമായാണ് യുഎസ് സിനിമകളുടെ എണ്ണം നിയന്ത്രിക്കപ്പെടുന്നതെന്നും ചൈനീസ് ഫിലിം അഡ്മിനിസ്ട്രേഷൻ വ്യക്തമാക്കുന്നു.
ഇതുവരെ ക്വാട്ട സിസ്റ്റം മുഖേനയായിരുന്നു വിദേശ ചിത്രങ്ങൾ ചൈനയിൽ പ്രദർശിപ്പിക്കപ്പെട്ടിരുന്നത്. ഇപ്പോഴത്തെ പുതിയ നിയന്ത്രണങ്ങൾ ഈ നിലവിലുള്ള നിയന്ത്രണങ്ങളിൽ കൂടുതൽ കർശനതയേർപ്പെടുത്തുകയാണ്. എന്നാൽ, ചൈനീസ് ചലച്ചിത്ര വിപണിയുടെ വലിയ വലുപ്പം മൂലം, ഈ നിയന്ത്രണം ഹോളിവുഡ് സ്റ്റുഡിയോകൾക്ക് വലിയ സാമ്പത്തിക നഷ്ടമായിരിക്കുമെന്നാണ് വിലയിരുത്തൽ.
