ശുദ്ധതയും ആത്മാർഥതയും നിറഞ്ഞ ദിവ്യകാരുണ്യാഘോഷം ഷിക്കാഗോ സെന്റ് മേരീസ് ക്നാനായ ഇടവകയിൽ

ഷിക്കാഗോ: സെന്റ് മേരീസ് ക്നാനായ കത്തോലിക്കാ ഇടവകയുടെ നേതൃത്വത്തിൽ ദിവ്യകാരുണ്യ സ്വീകരണച്ചടങ്ങ് അതിവിശ്വാസപൂർവമായി സംഘടിപ്പിച്ചു. മെയ് 25 ഞായറാഴ്ച ഉച്ചകഴിഞ്ഞ് 3 മണിക്ക് ആരംഭിച്ച തിരുക്കർമ്മങ്ങൾക്ക് അന്ത്യോയ്ക്കിയ ക്നാനായ കത്തോലിക്കാ അതിരൂപതാധ്യക്ഷൻ മാർ മാത്യു മൂലക്കാട്ട് മുഖ്യ കാർമികത്വം വഹിച്ചു.

ക്നാനായ റീജൻ ഡയറക്ടർ മോൺസിഞ്ഞോർ തോമസ് മുളവനാൽ, വികാരി ഫാ. സിജു മുടക്കോടിൽ, അസിസ്റ്റന്റ് വികാരി ഫാ. അനീഷ് മാവേലിപുത്തൻപുര, കൈപ്പുഴ ഫൊറോനാ വികാരി ഫാ. സാബു മാലിത്തുരുത്തേൽ, ഫാ. ബോബൻ വട്ടംപുറത്ത്, ഫാ. ബേബി വെള്ളാപ്പള്ളിൽ, ഫാ. ജോസ് ആദോപള്ളിൽ, ഫാ. ബിൻസ് ചേത്തലിൽ എന്നിവരും സഹകാർമികത്വം വഹിച്ചു.

മുപ്പത് കുട്ടികൾ വിശ്വാസപരിശീലനത്തിന്റെയും ആത്മീയ ഒരുക്കത്തിന്റെയും ഭാഗമായി ഒരുവർഷക്കാലം നീണ്ട പരിശീലനത്തിനുശേഷമാണ് ആദ്യമായി ദിവ്യകാരുണ്യം സ്വീകരിച്ചത്. സജി പുതൃക്കയിൽ, മനീഷ് കൈമൂലയിൽ എന്നിവരുടെ നേതൃത്വത്തിലുള്ള വിശ്വാസപരിശീലന സ്‌കൂളിന്റെ അധ്യാപകർ കഠിനാദ്ധ്വാനത്തോടെയും സമർപ്പണത്തോടെയും ഈ ആത്മീയയാത്രയ്ക്ക് നേതൃത്വം നൽകി.

തിരുക്കർമ്മങ്ങൾക്ക് ശേഷം വൈകിട്ട് ആറുമണിമുതൽ നൈൽസിലെ വൈറ്റ് ഈഗിൾ ബാങ്ക്വറ്റ് ഹാളിൽ മാതാപിതാക്കളുടെ നേതൃത്വത്തിൽ ആഘോഷങ്ങൾ നടന്നു. വിഭവസമൃദ്ധമായ ഭക്ഷണവും ഭംഗിയാർന്ന കലാപരിപാടികളും ആഘോഷങ്ങൾക്ക് ജ്വാലയും നിറവും കൂട്ടി. വികാരി ഫാ. സിജു മുടക്കോടിലും അസിസ്റ്റന്റ് വികാരി ഫാ. അനീഷ് മാവേലിപുത്തൻപുരയും, സെക്രട്ടറി സിസ്റ്റർ ഷാലോമും, കൈക്കാരന്മാരായ സാബു കട്ടപ്പുറം, ബിനു പൂത്തുറയിൽ, ലൂക്കോസ് പൂഴിക്കുന്നേൽ, ജോർജ്ജ് മറ്റത്തിപ്പറമ്പിൽ, നിബിൻ വെട്ടിക്കാട്ട്, പാരിഷ് കൗൺസിൽ സെക്രട്ടറി സണ്ണി മേലേടം, വിശ്വാസപരിശീലന ടീച്ചർമാർ, മാതാപിതാക്കളായ ജിനു പുന്നശ്ശേരിൽ, ടിനു പറഞ്ഞാട്ട് എന്നിവർ പരിപാടികൾക്ക് ഏകോപനം നൽകി.

വിശ്വാസത്തിന്റെയും കുടുംബസ്നേഹത്തിന്റെയും തെളിഞ്ഞ പ്രകടനമായിരുന്നു ഈ വർഷത്തെ ദിവ്യകാരുണ്യാഘോഷം.