ന്യൂജേഴ്സി: കേരള കൾച്ചറൽ ഫോറവും (കെസിഎഫ്) മലയാളി അസോസിയേഷൻ ഓഫ് ന്യൂജേഴ്സിയും (മഞ്ച്) സംയുക്തമായി നടത്തിയ ഓണാഘോഷം മലയാളത്തനിമകൊണ്ട് ഏവരുടെയും ഹൃദയം കീഴടക്കി. പൂക്കളവും മാവേലിമന്നനും ചെണ്ടമേളവും തിരുവാതിരകളിയും ഒക്കെയായി ഓണത്തിന്റെ പരമ്പരാഗതമായ എല്ലാ വിരുന്നും കണ്ണുകൾക്ക് ആനന്ദദായകമായി. പാറ്റേഴ്സണിലെ സെന്റ് ജോർജ് ചർച്ച ഹാളിലെ ആഘോഷവേദി സൗഹൃദത്തിന്റെയും ഐക്യത്തിന്റെയും സംഗമമായി.
പരസ്പരസ്നേഹത്തോടെയും ഐക്യത്തോടെയും മുന്നോട്ടുപോകാനുള്ള ആശംസയാണ് മഹാബലി നേർന്നത്. രണ്ട് അസോസിയേഷനുകൾ ഒന്നിച്ചുചേർന്നതുതന്നെ ഐക്യത്തിന്റെയും സാഹോദര്യത്തിന്റെയും തെളിവായി. സംഘടനകൾ ഭിന്നിക്കുകയും പല ഓണാഘോഷം സംഘടിപ്പിക്കുകയും ചെയ്യുമ്പോൾ രണ്ടു സംഘടനകൾ ആഘോഷത്തിനു കൈകോർത്തത് ഏവർക്കും മാതൃകയുമായി.
ചെണ്ടമേളത്തിന്റെയും താലപ്പൊലിയുടെയും അകമ്പടിയോടെ മാവേലിയുടെ എഴുന്നള്ളത്തോടെ ആയിരുന്നു തുടക്കം
കെസിഎഫ് പ്രസിണ്ട് നൈനാൻ ജേക്കബിന്റെ സ്വാഗത പ്രസംഗത്തോടെ സമ്മേളനത്തിന് തുടക്കം കുറിച്ചു . 37 വർഷങ്ങൾക്ക് മുൻപ് തന്റെ പിതാവ് ടി.എസ്. ചാക്കോയും സുഹൃത്തുക്കളും ചേർന്ന് തുടക്കം കുറിച്ച കേരള കൾച്ചറൽ ഫോറത്തിന്റെ ചുക്കാൻ ഇന്ന് തന്റെ കരങ്ങളിലെത്തിയത് വലിയൊരു നിയോഗമാണെന്നും അതിൽ അഭിമാനമുണ്ടെന്നും അദ്ദേഹം പറഞ്ഞു. മലയാളത്തിന്റെ സമ്പന്നമായ സാംസ്കാരിക പൈതൃകത്തെക്കുറിച്ചും, എം.ടി, തകഴി, മാധവിക്കുട്ടി, ബഷീർ തുടങ്ങിയ സാഹിത്യ പ്രതിഭകളെ സമ്മാനിച്ച നാട്ടിൽ ജനിച്ചതിലെയും അഭിമാനം അദ്ദേഹം പങ്കുവച്ചു. ഓട്ടംതുള്ളൽ, കഥാപ്രസംഗം, മമ്മൂട്ടി, മോഹൻലാൽ, ശോഭന, ഉർവ്വശി, അച്യുതമേനോൻ, അച്യുതാനന്ദൻ, കരുണാകരൻ, ശശി തരൂർ തുടങ്ങി കേരളം നൽകിയ അനവധി പ്രതിഭകളെക്കുറിച്ച് പരാമർശിച്ചുകൊണ്ട് “കേരളം അഭിമാനിക്കാൻ നിരവധി വകയുള്ള നാട്” ആണെന്ന് അദ്ദേഹം ആവർത്തിച്ചു.
ഓണത്തെക്കുറിച്ചുള്ള സ്വന്തം കുട്ടിക്കാല ഓർമ്മകളും പങ്കുവച്ച്, “എല്ലാവർക്കും വേണ്ടി തുറന്നിട്ടിരിക്കുന്ന വാതിലുകളുള്ളതും, എത്തുന്നവരെ കൂട്ടുകാരെപ്പോലെ സ്വീകരിക്കുന്ന സംസ്കാരമുള്ളതുമാണ് മലയാളി അസോസിയേഷൻ ഓഫ് ന്യൂജേഴ്സി എന്നു പ്രസിഡന്റ് രാജു ജോയി പറഞ്ഞു.
ഫൊക്കാന പ്രസിഡന്റ് സജിമോൻ ആന്റണി പരിപാടി ഔദ്യോഗികമായി ഉദ്ഘാടനം ചെയ്തുകൊണ്ട് ഓണാശംസ നേർന്നു. “മതഭേദമില്ലാതെ ആഘോഷിക്കുന്ന മഹോത്സവമാണ് ഓണം. രണ്ട് സംഘടനകളുടെ ഒരുമിച്ചുള്ള ആഘോഷം ഇരട്ടിയാനന്ദം നൽകുന്നു” എന്ന് അദ്ദേഹം അഭിപ്രായപ്പെട്ടു.
റോക്ലാൻഡ് കൗണ്ടി ലെജിസ്ലേറ്റർ ആനി പോൾ സ്നേഹത്തിന്റെയും സമാധാനത്തിന്റെയും ഐശ്വര്യത്തിന്റെയും ഓണാശംസകൾ നേർന്നു. ഓണസദ്യ, ഓണപ്പാട്ട്, ഓണക്കോടി, കുടുംബ സംഗമം തുടങ്ങിയ ഓർമ്മകളെ അവര് പങ്കുവെച്ചു. മാവേലി നാടുവാണീടും കാലത്തെക്കുറിച്ചുള്ള ഓർമ്മകളിലൂടെ നീതി, സമത്വം, സ്നേഹം, പരസ്പര ബഹുമാനം എന്നിവയിൽ അധിഷ്ഠിതമായ മൂല്യങ്ങൾ അവര് ഓർമ്മിപ്പിച്ചു.
ജീവിതത്തിൽ സമ്പാദ്യങ്ങളും പ്രശസ്തിയും നേടിയാലും ഏറ്റവും വലിയ സമ്പത്ത് മനസ്സിന്റെ സമാധാനമാണെന്ന് ആനി പോൾ പറഞ്ഞു. “സന്തോഷം വാങ്ങാൻ കഴിയില്ല; അത് നമ്മുടെ പ്രവൃത്തികളുടെ പ്രതിഫലനമാണ്” എന്ന ദലൈലാമയുടെ വാക്കുകളും അവര് ഉദ്ധരിച്ചു. ചെറിയൊരു പുഞ്ചിരിയും പ്രസന്നമായൊരു മുഖവും ലോകത്തെ വലിയ മാറ്റത്തിലേക്ക് നയിക്കുമെന്നായിരുന്നു അവരുടെ ഓണസന്ദേശം.
കുടവയറും മറ്റുമുള്ള കോമാളിയായി മഹാബലി എന്ന പോരാളിയെ അവതരിപ്പിക്കുന്ന സ്ഥാനത്ത് സുന്ദരനായ മാവേലിയെ (റോഷൻ) അവതരിപ്പിച്ചതിനെ ഫൊക്കാന സെക്രട്ടറി ശ്രീകുമാർ ഉണ്ണിത്താൻ അഭിനന്ദിച്ചു.
ഫൊക്കാനയുടെ കേരള കൺവൻഷൻ വിജയമാക്കാൻ ഏറെ പ്രവർത്തിച്ച ഫൊക്കാന ട്രഷറർ ജോയി ചാക്കപ്പനെ ചടങ്ങിൽ പ്രസിഡന്റ് സജിമോൻ ആന്റണിയും സെക്രട്ടറി ശ്രീകുമാർ ഉണ്ണിത്താനും ചേർന്ന് പൊന്നാടയണിയിച്ചു ആദരിച്ചു.
ഫൊക്കാന ട്രഷറർ ജോയി ചാക്കപ്പൻ, ലീല മാരേട്ട്, ഗാരി നായർ, ഡോ. ഷൈനി രാജു, മഞ്ച് ആദ്യ പ്രസിഡന്റ് ഷാജി വർഗീസ് തുടങ്ങിയവർ പ്രസംഗിച്ചു. മഞ്ച് വൈസ് പ്രസിഡന്റ് അനീഷ് ജെയിംസ് നന്ദി പറഞ്ഞു.
സംഘടനകളുടെ പ്രസിഡന്ടുമാരായ രാജു ജോയ്, നൈനാൻ ജേക്കബ് എന്നിവർ പരിപാടികൾക്ക് തുടക്കമിട്ടു.
MANJ വിമൻസ് ഫോറം കലാകാരികളായ ഷീന, ഷൈൻ, നെസ്സി, റെനി, നീതു, ജിനു, ഷൈനി, ജിനു ലിൻ്റോ, എലിസബത്ത്, സൂസൻ, റോസ് എന്നിവർ അവതരിപ്പിച്ച തിരുവാതിര ഹൃദയഹാരിയായി.
ഐറിൻ തടത്തിൽ, ദാസ് കണ്ണംകുഴിയിൽ എന്നിവർ ദേശീയ ഗാനങ്ങളാലപിച്ചു
കെ.സി.എഫ് കമ്മിറ്റിയെ സെക്രട്ടറി സോജൻ ജോസഫും MANJ കമ്മിറ്റിയെ സെക്രട്ടറി ഷിജിമോൻ മാത്യുവും പരിചയപ്പെടുത്തി.
ഡോ നീന ഫിലിപ്പിന്റെ നേതൃത്വത്തിലുള്ള നീൻസ് ഇവൻഷ്യ ഡാൻസ് സ്കൂൾ അവതരിപ്പിച്ച നൃത്തം മനം കവർന്നു. ഷൈൻ, ഷീന, റെനി, നെസി, ഷൈനി എന്നിവരായിരുന്നു സംഘത്തിൽ. ഐഡൻ മാത്യു, ജെയ്സൺ മാത്യു, ഐസക് തടത്തിൽ, ഏഥൻ ആൻ്റണി എന്നിവരുടെ സംഘനൃത്തവും ഹൃദ്യമായി.
നീൽ ജേക്കബ്, രാജു ജോയി, ജെയിംസ് ജോയി എന്നിവർ ഗാനങ്ങളാലപിച്ചു.
വാഴയിലയിലുള്ള ഓണസദ്യയും കലാപരിപാടികളുമായി ആഘോഷം കെങ്കേമമായി.
