ഇലക്ട്രിക് ബൈക്ക് അപകടം; ഓസ്‌ട്രേലിയയിൽ മലയാളി വിദ്യാർത്ഥി മരിച്ചു

ബ്രിസ്ബേൻ: ഓസ്‌ട്രേലിയയിലെ ക്വീൻസ്‌ലാൻഡിൽ ഉണ്ടായ ദാരുണ വാഹനാപകടത്തിൽ മലയാളി വിദ്യാർത്ഥിയായ ജൈഡൻ ജോ സാനി (17) മരണപ്പെട്ടു. ക്വീൻസ്‌ലാൻഡിലെ Laceys Creek പ്രദേശത്ത് ജൂലൈ 12-ന് ഉച്ചയ്ക്ക് 12.15-ഓടെയായിരുന്നു അപകടം. ജോ സാനിയുടെയും ട്രീസ സിജോയുടെയും മകനാണ് ജൈഡൻ.

ജൈഡൻ സഞ്ചരിച്ചിരുന്ന ഇലക്ട്രിക് ബൈക്ക് എതിർദിശയിൽ വന്ന കാറുമായി കൂട്ടിയിടിക്കുകയായിരുന്നു. ഗുരുതരമായി പരിക്കേറ്റ ജൈഡനെ അടിയന്തരമായി എയർ ആംബുലൻസിൽ റോയൽ ബ്രിസ്ബേൻ ആൻഡ് വിമൻസ് ആശുപത്രിയിൽ എത്തിച്ചെങ്കിലും ചികിത്സയ്ക്കിടെ മരണത്തിന് കീഴടങ്ങി.

അപകടത്തിൽ ഉൾപ്പെട്ട കാർ ഓടിച്ചിരുന്ന 55-കാരന് പരിക്കേറ്റിട്ടില്ല. സംഭവത്തെക്കുറിച്ച് ക്വീൻസ്‌ലാൻഡ് പോലീസ് ഫോറൻസിക് ക്രാഷ് യൂണിറ്റ് അന്വേഷണം ആരംഭിച്ചതായി അധികൃതർ അറിയിച്ചു

വാർത്ത: പ്രസാദ് തീയാടിക്കൽ