ആത്മസമൃദ്ധിയിൽ മാർത്തോമ്മാ മെത്രാപ്പോലീത്തയെ ന്യൂയോർക്കിൽ ഊഷ്മളമായ വരവേൽപ്പ്

ന്യൂയോർക്ക് ∙ മലങ്കര മാർത്തോമ്മാ സുറിയാനി സഭയുടെ ആദ്ധ്യാത്മിക നായകനായ ഡോ. തിയഡോഷ്യസ് മാർത്തോമ്മാ മെത്രാപ്പോലീത്തയുടെ സാന്നിധ്യം നവജീവിത സാന്ദ്രതയോടെ അനുഭവപ്പെട്ട നിമിഷങ്ങൾ. നോർത്ത് അമേരിക്കൻ ഭദ്രാസനത്തിലെ വിവിധ ഇടവകകളെ സന്ദർശിക്കാൻ എത്തിയ മെത്രാപ്പോലീത്തയെ ന്യൂയോർക്ക് ജെഎഫ്കെ രാജ്യാന്തര വിമാനത്താവളത്തിൽ സഭാ ഭരണാധികാരികൾ സ്നേഹാദരം നിറഞ്ഞ ഹൃദയത്തോടെ വരവേറ്റപ്പോൾ വിശ്വാസം പുതുക്കി എഴുന്നേറ്റു.ഭദ്രാസന സെക്രട്ടറിയും ബിഷപ് സെക്രട്ടറിയുമായ റവ. ജോർജ് എബ്രഹാം കല്ലൂപ്പാറ, ഭദ്രാസന ട്രഷറർ ജോർജ് പി. ബാബു, മുൻ മാർത്തോമ്മ സുവിശേഷ പ്രസംഗസംഘം മാനേജിങ് കമ്മിറ്റി അംഗം തോമസ് ഡാനിയേൽ, ന്യൂയോർക്ക് ലോങ്ങ്‌ ഐലന്റ് ഇടവക വികാരി റവ. ജോസി ജോസഫ്, ഭദ്രാസന ഓഫിസ് അക്കൗണ്ടന്റ് തോമസ് ഉമ്മൻ എന്നിവരടക്കം നിരവധി വിശ്വാസികൾ ഈ പരിശുദ്ധ നിമിഷങ്ങൾക്ക് സാക്ഷിയായി.കാലത്തിന്റെ താളമാറ്റങ്ങളിലൂടെ സഭയെ ആദ്ധ്യാത്മിക ഉണർവിലേക്ക് നയിച്ച മെത്രാപ്പോലീത്തയുടെ വരവ് പുതുജീവിതത്തിന്റെ ശബ്ദമായിരുന്നു. വ്യാഴാഴ്ച ഡാലസിൽ എത്തുന്ന അദ്ദേഹം, ഡാലസിലെ വിവിധ മാർത്തോമ്മ ദേവാലയങ്ങളിൽ ആത്മീയ സന്ദേശം നൽകും. 9-ാം തിയതി ഞായറാഴ്ച ഡാലസ് കരോൾട്ടൻ മാർത്തോമ്മാ ദേവാലയത്തിൽ ആരാധനക്കും വിശുദ്ധ കുർബാന ശുശ്രുഷക്കും നേതൃത്വം നൽകുമ്പോൾ ആ ദിനം ദൈവാനുഗ്രഹത്തിന്റെ നിറവേറുന്ന തെളിച്ചമായി മാറും.ഇതോടെ ഡോ. തിയഡോഷ്യസ് മാർത്തോമ്മാ മെത്രാപ്പൊലീത്തയുടെ സന്ദർശനം ഹൂസ്റ്റൺ, ഷിക്കാഗോ, ഡിട്രോയിറ്റ്, കാനഡ, ന്യൂയോർക്ക് എന്നിവിടങ്ങളിലെ മാർത്തോമ്മാ ദേവാലയങ്ങൾ വരെയും എത്തും. സഭയുടെ ആഴമേറിയ ആത്മീയ മൂല്യങ്ങളെ പുതുക്കി ഉയർത്തി നിർത്തുന്ന ഈ സന്ദർശനം വിശ്വാസികളുടെ ഹൃദയങ്ങളിൽ ദൈവീക സമാധാനത്തിന്റെ താളങ്ങൾ മുഴക്കി പോകും.