അമേരിക്കന്‍ വിസയ്ക്ക് പുതിയ മുഖം: ട്രംപ് ഗോള്‍ഡ് കാര്‍ഡില്‍ വമ്പിച്ച വരുമാനം
ഹൂസ്റ്റണ്‍ ∙ യുഎസിലെ സമ്പദ് വ്യവസ്ഥയെയും ഇമിഗ്രേഷന്‍ സംവിധാനത്തെയും മാറ്റിമറിക്കുന്ന പുതിയ പ്രഖ്യാപനവുമായി മുന്‍ പ്രസിഡന്റ് ഡൊണാള്‍ഡ് ട്രംപ്. അതിസമ്പന്നരായ വിദേശികള്‍ക്കായി അവതരിപ്പിച്ച ‘ഗോള്‍ഡ് കാര്‍ഡ്’ വിസ പദ്ധതിയിലൂടെ 5 ബില്യണ്‍ ഡോളര്‍ സമാഹരിച്ചുവെന്ന വെളിപ്പെടുത്തലാണ് ഇപ്പോള്‍ ചര്‍ച്ചയാകുന്നത്. ട്രംപിന്റെ അടുത്ത അനുയായിയും പ്രമുഖ സാമ്പത്തിക വിദഗ്ധനുമായ ഹോവാര്‍ഡ് ലുട്നിക് ആണ് ഈ വമ്പിച്ച നേട്ടം ലോകമറിയിച്ചത്.
വിസ നേടുന്നതിനായി 5 മില്യണ്‍ ഡോളര്‍ നിക്ഷേപിക്കേണ്ട ഈ പദ്ധതി ‘ട്രംപ് കാര്‍ഡ്’ എന്നുപോലും അറിയപ്പെടുന്നു. 37 മില്യണ്‍ ആളുകള്‍ക്ക് ഈ കാര്യം സാധ്യമാണെന്നും, 1 മില്യണ്‍ പേര്‍ക്ക് വിറ്റാല്‍ 5 ട്രില്യണ്‍ ഡോളറിന്റെ വരുമാനം കൈവരിക്കാമെന്നുമാണ് ലുട്നിക് പറഞ്ഞത്. മുന്‍പ് EB-5 നിക്ഷേപക വിസയിലൂടെ മാത്രമായിരുന്നു സമ്പന്നരായ വിദേശികള്‍ക്ക് യുഎസ് സ്ഥിരതാമസം നേടാനാകുന്നത്. എന്നാല്‍ ട്രംപിന്റെ ഈ പുതിയ പദ്ധതിയിലേക്കുള്ള ആകാംക്ഷ അതിവേഗം വര്‍ധിക്കുകയാണ്.
250,000 പേരാണ് ഇതിനകം ഗോള്‍ഡ് കാര്‍ഡ് വാങ്ങാന്‍ താത്പര്യം പ്രകടിപ്പിച്ചതെന്ന് ലുട്നിക് അവകാശപ്പെടുന്നു. ഈ പദ്ധതിയുടെ ലക്ഷ്യം അമേരിക്കയുടെ ഫെഡറല്‍ കടം കുറയ്ക്കുകയാണെന്നും ഇതിലൂടെ രാജ്യത്ത് കൂടുതല്‍ തൊഴില്‍ അവസരങ്ങള്‍ സൃഷ്ടിക്കാനാകുമെന്നും ട്രംപ് വിശദീകരിക്കുന്നു. സമ്പന്നരായ ആളുകള്‍ അമേരിക്കയിലെത്തുമ്പോള്‍ അവരുടെ ചെലവുകളും നികുതികളും തൊഴില്‍ സൃഷ്ടിയും സമ്പദ് വ്യവസ്ഥയെ ശക്തിപ്പെടുത്തുമെന്ന് അദ്ദേഹം വാദിക്കുന്നു.
ട്രംപിന്റെ ഈ നീക്കത്തോടനുബന്ധിച്ച് നിരവധി ചോദ്യങ്ങളും ആശങ്കകളും ഉയരുന്നുണ്ട്. പുതിയ പദ്ധതിയിലൂടെ ഇമിഗ്രേഷന്‍ നിയമങ്ങളില്‍ വലിയ മാറ്റങ്ങള്‍ വരുമോ? സാമ്പത്തിക പ്രതിസന്ധി നേരിടുന്നതിനുള്ള ഏക പരിഹാരമാകുമോ? ട്രംപിന്റെ ‘ഗോള്‍ഡ് കാര്‍ഡ്’ യു.എസിന്റെ ഭാവിയെ എങ്ങനെ സ്വാധീനിക്കുമെന്നത് ലോകം ഉറ്റുനോക്കുകയാണ്.
