പരിശുദ്ധ കാതോലിക്ക ബാവക്ക് ഡാലസ്–ഫോർത്ത് വർത്ത് അന്താരാഷ്ട്ര വിമാനത്താവളത്തിൽ സ്വീകരണം
കിഴക്കിന്റെ കാതോലിക്കായിയും മലങ്കര മെത്രാപ്പോലീത്താവുമായ പരിശുദ്ധ ബസേലിയോസ് മാർത്തോമാ മാത്യൂസ് തൃതീയൻ കാതോലിക്ക ബാവക്ക് ഡാലസ്–ഫോർത്ത് വർത്ത് അന്താരാഷ്ട്ര വിമാനത്താവളത്തിൽ സ്വീകരണം
ഡാലസ്: മലങ്കര ഓർത്തഡോക്സ് സുറിയാനി സഭയുടെ വൈദികരും, സഭാ നേതാക്കളും, വിശ്വാസികളും അതിയായ സന്തോഷത്തോടെയും ആത്മീയ ഭക്തിയോടെയും കൂടി കിഴക്കിന്റെ കാതോലിക്കായിയും മലങ്കര മെത്രാപ്പോലീത്താവുമായ പരിശുദ്ധ ബസേലിയോസ് മാർത്തോമാ മാത്യൂസ് തൃതീയൻ കാതോലിക്ക ബാവയെ അമേരിക്കയിലെ ഔദ്യോഗിക സഭാ സന്ദർശനത്തിന്റെ ഭാഗമായി ഡാലസ്–ഫോർത്ത് വർത്ത് അന്താരാഷ്ട്ര വിമാനത്താവളത്തിൽ സ്വീകരിച്ചു.
പരിശുദ്ധ മാർതോമാശ്ലീഹായുടെ അപ്പൊസ്തോലിക് സിംഹാസനത്തിലെ 92-മത് അവകാശിയായി കാതോലിക്കാ പദവിയിൽ ഉയർത്തപ്പെട്ടതിനുശേഷം, അമേരിക്കയിലെ ഡാലസ് മേഖലയിലേക്കുള്ള അപ്പൊസ്തോലിക സന്ദർശനമായതിനാൽ, ഈ സ്വീകരണം ചരിത്രപരവും ആത്മീയമായി സമ്പുഷ്ടവുമായിത്തീർന്നു.
വിമാനത്താവളത്തിൽ വൈദികരും, ഭദ്രാസന തലത്തിലുള്ള നേതാക്കളും, വിവിധ പള്ളികളുടെ ഭാരവാഹികളും, ആത്മീയ സംഘടനകളുടെ പ്രതിനിധികളും പരിശുദ്ധ കാതോലിക്ക ബാവ തിരുമേനിയെ ഹൃദയപൂർവ്വം വരവേറ്റു.
അനുഗ്രഹപ്രസംഗത്തിൽ, തിരുമേനി അമേരിക്കയിലെ പ്രവാസി വിശ്വാസികളുടെ ഏകതയും ഭക്തിയും കണ്ട സന്തോഷം പങ്കുവെച്ചു. ഡാലസ്–ഫോർത്ത് വർത്ത് വിമാനത്താവളത്തിലെ സ്വീകരണത്തോടെയാണ് തിരുമേനിയുടെ സൗത്ത് വെസ്റ്റ് ഭദ്രാസനത്തിലെ സന്ദർശനം ആരംഭിച്ചത്.
പരിശുദ്ധ കാതോലിക്ക ബാവ തിരുമേനിയുടെ ഈ സന്ദർശനം വിശ്വാസബന്ധം കൂടുതൽ ഉറപ്പിക്കാനും, ആത്മീയജീവിതത്തെ പുതുക്കാനും, മലങ്കര ഓർത്തഡോക്സ് സുറിയാനി സഭയുടെ അപ്പൊസ്തോലിക പിന്തുടർച്ച ഉറപ്പിക്കുവാനും സഹായകമാകുമെന്നു വിശ്വാസികൾ പ്രതീക്ഷിക്കുന്നു.
Fr.Johnson Punchakonam
