കോംഗോയിലും ഉഗാണ്ടയിലും എബോള പടരുന്നു: ഒരു ആഴ്ചയ്ക്കുള്ളിൽ രോഗബാധയിൽ 40% വർദ്ധനവ്, മരണം 200 കടന്നു  

കോംഗോ:ആഫ്രിക്കൻ രാജ്യങ്ങളായ കോംഗോയിലും ഉഗാണ്ടയിലും എബോള രോഗബാധ അതീവ ഗുരുതരമായി പടരുന്നതായി ആഫ്രിക്കൻ സെന്റർ ഫോർ ഡിസീസ് കൺട്രോൾ ആൻഡ് പ്രിവൻഷൻ (Africa CDC) അറിയിച്ചു. കഴിഞ്ഞ ഒരാഴ്ചയ്ക്കുള്ളിൽ മാത്രം രോഗബാധിതരുടെ എണ്ണത്തിൽ 38 ശതമാനത്തിന്റെ വർദ്ധനവാണുണ്ടായത്. നിലവിൽ രോഗം സ്ഥിരീകരിച്ചവരുടെ എണ്ണം 894 ആയി ഉയർന്നു. ആദ്യ ഒരു മാസത്തിനുള്ളിൽ തന്നെ മരണസംഖ്യ 200 പിന്നിട്ടത് ആശങ്ക വർദ്ധിപ്പിക്കുന്നുണ്ട്.

നിലവിലെ എബോള വ്യാപനത്തിന് കാരണം ‘ബുന്ദിബുഗ്യോ’ (Bundibugyo) എന്ന അപൂർവ്വ ഇനം വൈറസാണ്. ഇതിനെതിരെ നിലവിൽ അംഗീകൃത വാക്സിനുകളോ പ്രത്യേക ചികിത്സകളോ ലഭ്യമല്ല. മുൻകാലങ്ങളിൽ കോംഗോയിലുണ്ടായ വ്യാപനങ്ങൾക്ക് കാരണം വാക്സിനുള്ള ‘സയർ’ (Zaire) വൈറസായിരുന്നു.  രോഗവ്യാപന കേന്ദ്രങ്ങൾ: രോഗബാധിതരിൽ 90 ശതമാനവും കോംഗോയിലെ ഇട്ടൂരി (Ituri) പ്രവിശ്യയിലാണ്. കൂടാതെ നോർത്ത് കിവു, സൗത്ത് കിവു പ്രവിശ്യകളിലും രോഗം റിപ്പോർട്ട് ചെയ്തിട്ടുണ്ട്.

അയൽരാജ്യമായ ഉഗാണ്ടയിലേക്ക് പടർന്ന രോഗം അവിടെ 19 പേർക്ക് സ്ഥിരീകരിക്കുകയും രണ്ട് പേർ മരണപ്പെടുകയും ചെയ്തു.  പ്രതിരോധത്തിലെ വെല്ലുവിളികൾ: പ്രദേശത്തെ ആഭ്യന്തര സംഘർഷങ്ങളും മോശം റോഡുകളും കാരണം രോഗികളുമായി സമ്പർക്കത്തിൽ ഏർപ്പെട്ടവരെ കണ്ടെത്തുക  പ്രായോഗികമായി ബുദ്ധിമുട്ടാണ്. ഏകദേശം 17,000 മുതൽ 35,000 വരെ ആളുകൾ സമ്പർക്കപ്പട്ടികയിൽ ഉണ്ടെന്നാണ് കണക്കാക്കപ്പെടുന്നത് എങ്കിലും ഇതിൽ 15 ശതമാനത്തിൽ താഴെ ആളുകളെ മാത്രമേ ഇതുവരെ കണ്ടെത്താനായിട്ടുള്ളൂ.

 എബോള പ്രതിരോധത്തിനായി വിവിധ രാജ്യങ്ങൾ 900 മില്യൺ ഡോളറിന്റെ സഹായം വാഗ്ദാനം ചെയ്തിരുന്നെങ്കിലും നിലവിൽ 90 മില്യൺ ഡോളർ മാത്രമാണ് ലഭ്യമായിട്ടുള്ളത്. ആവശ്യത്തിന് ആരോഗ്യപ്രവർത്തകരില്ലാത്തതും രോഗനിയന്ത്രണം പ്രതിസന്ധിയിലാക്കുന്നു.  രോഗം നിയന്ത്രണവിധേയമാക്കാൻ ഇനിയും ഏറെ മുന്നോട്ട് പോകാനുണ്ടെന്നും, വാഗ്ദാനം ചെയ്യപ്പെട്ട സാമ്പത്തിക സഹായങ്ങൾ എത്രയും വേഗം ലഭ്യമാക്കണമെന്നും ആരോഗ്യവിദഗ്ധർ ആവശ്യപ്പെടുന്നു. ഇതുവരെ ഇരുരാജ്യങ്ങളിലുമായി 74 പേർ രോഗമുക്തി നേടിയിട്ടുണ്ട്

പി പി ചെറിയാൻ