“എഡിഎം നവീന്‍ ബാബു ദുരൂഹമരണക്കേസിൽ പി.പി. ദിവ്യയുടെ ജാമ്യാപേക്ഷയിൽ വിധി വെള്ളിയാഴ്ച”
തലശ്ശേരി: എഡിഎം നവീന്‍ ബാബുവിന്റെ ദുരൂഹമരണവുമായി ബന്ധപ്പെട്ട കേസിൽ കണ്ണൂർ മുൻ ജില്ലാ പഞ്ചായത്ത് പ്രസിഡന്റ് പി.പി. ദിവ്യയുടെ ജാമ്യാപേക്ഷയിൽ തലശ്ശേരി പ്രിൻസിപ്പൽ സെഷൻസ് കോടതി വെള്ളിയാഴ്ച വിധി പറയും. വാദം വിശദമായി കേട്ട ശേഷം കോടതി വിധി പറയാനായി മാറ്റുകയായിരുന്നു.
ജാമ്യം അനുവദിക്കരുതെന്ന് നവീന്‍ ബാബുവിന്റെ കുടുംബം കോടതിയില്‍ ആവശ്യപ്പെട്ടിരുന്നു. നവീന്‍ ബാബുവിന് റവന്യൂ വകുപ്പ് നല്‍കിയ ക്ലീന്‍ ചിറ്റ് അടക്കമുള്ളവ ചൂണ്ടിക്കാട്ടിയാണ് കുടുംബം ജാമ്യത്തെ എതിര്‍ത്തത്. ദിവ്യയുടെ രാഷ്ട്രീയ സ്വാധീനം കേസ് അന്വേഷണം ബാധിക്കുമെന്ന് അവർ കോടതിയെ അറിയിച്ചു.
അതേസമയം, വിവാദ യാത്രയയപ്പ് യോഗത്തിനു ശേഷം നവീന്‍ ബാബു തന്നെ കണ്ട് കുറ്റസമ്മതം നടത്തിയെന്ന കണ്ണൂര്‍ കലക്ടറുടെ മൊഴി അടക്കമുള്ള തെളിവുകൾ ചൂണ്ടിക്കാട്ടിയാണ് ദിവ്യയുടെ അഭിഭാഷകർ ജാമ്യം ആവശ്യപ്പെട്ടത്.
ഒക്ടോബർ 29-ന് മുന്‍കൂര്‍ ജാമ്യാപേക്ഷ തള്ളിയതിന് പിന്നാലെയാണ് ദിവ്യ അറസ്റ്റിലായത്. ആ ഉത്തരവില്‍ തലശ്ശേരി കോടതി ദിവ്യയ്‌ക്കെതിരെ രൂക്ഷമായ വിമര്‍ശനങ്ങളാണ് ഉന്നയിച്ചത്. ആത്മഹത്യാ പ്രേരണക്കുറ്റം ചുമത്തി ദിവ്യയ്‌ക്കെതിരെ കേസെടുത്തിരിക്കുന്നതായി പൊലീസ് അറിയിച്ചു. കൂടാതെ, കൂടുതൽ ചോദ്യം ചെയ്യലിനായി ദിവ്യയെ രണ്ടാമതും ചോദ്യം ചെയ്യേണ്ടതുണ്ടെന്നും പൊലീസ് വ്യക്തമാക്കി.
