ഒട്ടാവ: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ വ്യാപാരനയങ്ങൾ തുടരുന്നിടത്തോളം കാലം യുഎസ് നിർമ്മിത ഉൽപ്പന്നങ്ങൾക്ക് കാനഡ കനത്ത പ്രതികാര തീരുവ ഏർപ്പെടുത്തുമെന്ന് പ്രധാനമന്ത്രിയായി തിരഞ്ഞെടുക്കപ്പെട്ട മാർക്ക് കാർണി പ്രഖ്യാപിച്ചു. പുതിയ സർക്കാർ അധികാരമേൽക്കുന്ന മുറയ്ക്ക് അമേരിക്കൻ ഉൽപ്പന്നങ്ങൾക്ക് തീരുവ ബാധകമാക്കുമെന്നും, അമേരിക്ക കാനഡയെ ബഹുമാനിക്കുന്നതുവരെ ഈ നയം തുടരുമെന്നും അദ്ദേഹം വ്യക്തമാക്കി.
“പ്രസിഡന്റ് ഡൊണാൾഡ് ട്രംപ് കാനഡയുടെ സമ്പദ് വ്യവസ്ഥയെ ദുർബലപ്പെടുത്താൻ ശ്രമിക്കുകയാണ്. നമ്മുടെ ഉൽപ്പന്നങ്ങൾക്കു ന്യായീകരിക്കാനാകാത്ത തരത്തിൽ താരിഫുകൾ ഏർപ്പെടുത്തിയിരിക്കുകയാണ്. കനേഡിയൻ തൊഴിലാളികളെയും ബിസിനസുകളെയും ആക്രമിക്കുന്ന ഈ നീക്കത്തിന് മുന്നിൽ അടങ്ങിയിരിക്കില്ല. ഞങ്ങൾ ശക്തരാണ്. അമേരിക്കയുടെ ഈ നടപടികൾക്കെതിരായ കനേഡിയൻ ജനതയുടെ പ്രതികരണം അഭിമാനകരമാണെന്ന്” മാർക്ക് കാർണി വ്യക്തമാക്കി.
കാനഡ-യുഎസ് വ്യാപാര ബന്ധം പുതിയ തിരിച്ചുവരവിലാണെന്നും, ട്രംപിന്റെ നീക്കങ്ങൾക്കെതിരെ ശക്തമായ പ്രതിരോധം നടത്തുമെന്നും പുതിയ പ്രധാനമന്ത്രി കൂട്ടിച്ചേർത്തു.
