മാർച്ചിനിടെ പെട്രോൾ ബോംബ് ആക്രമണം; കൊളറാഡോയിൽ ഇസ്രയേൽ അനുകൂല റാലിക്കിടയിലുണ്ടായ തീപ്പിടിത്തത്തിൽ പലർക്കും ഗുരുതര പൊള്ളലേറ്റു.
കൊളറാഡോ (യു.എസ്) ∙ ഇസ്രയേൽ അനുകൂല റാലിക്കിടെ പെട്രോൾ ബോംബ് ആക്രമണത്തിൽ നിരവധി പേർക്ക് ഗുരുതര പൊള്ളലേറ്റു. കൊളറാഡോയിലെ ബൗൾഡർ പട്ടണത്തിലെ പേൾ സ്ട്രീറ്റ് മാളിനും 13-ാം സ്ട്രീറ്റിനും സമീപത്തുള്ള സ്ഥലത്താണ് ഞായറാഴ്ച ഉച്ചയ്ക്ക് 1:26ന് അക്രമം നടന്നത്.
ഹമാസിന്റെ കയ്യിലുള്ള ഇസ്രയേലി ബന്ദികളെ മോചിപ്പിക്കണമെന്ന് ആവശ്യപ്പെട്ട് ഇസ്രയേൽ അനുകൂലികൾ നടത്തിയ റാലിക്കിടെയാണ് തീപിടുത്തം. തീപിടിക്കുന്ന ഇന്ധനം നിറച്ച ഗ്ലാസ് കുപ്പികൾ—മോളോടോവ് കോക്ക്ടെയിലുകൾ—അറിയാത്ത വ്യക്തി ജനക്കൂട്ടത്തിലേക്ക് എറിഞ്ഞെന്നാണ് ദൃക്സാക്ഷികൾ പറഞ്ഞത്. ഈ അക്രമത്തിൽ നിരവധി പേർക്ക് പൊള്ളലേറ്റു. പലരുടേയും നില ഗുരുതരമാണ്. പരിക്കേറ്റവരെ വിവിധ ആശുപത്രികളിൽ പ്രവേശിപ്പിച്ചിരിക്കുകയാണ്.
അക്രമം നടത്തിയതായി സംശയിക്കുന്ന ഒരു വ്യക്തിയെ പൊലീസ് കസ്റ്റഡിയിൽ എടുത്തിട്ടുണ്ട്. സംഭവത്തെക്കുറിച്ചുള്ള അന്വേഷണം ആരംഭിച്ചതായി ബൗൾഡർ പൊലീസ് അറിയിച്ചു. വാൾനട്ട് സ്ട്രീറ്റിനും പൈനു സ്ട്രീറ്റിനും ഇടയിലുള്ള പേൾ സ്ട്രീറ്റിലെ 1200 മുതൽ 1400 വരെ ബ്ലോക്കുകളിൽ നിന്ന് ആളുകളെ ഒഴിപ്പിച്ചു.
സംഭവസ്ഥലം ഇപ്പോഴും പൂർണമായും സുരക്ഷിതമല്ലെന്ന് പൊലീസും എഫ്ബിഐയും അറിയിച്ചു. സംഭവത്തെ ഭീകരാക്രമണമായി കാണുന്നുവെന്ന് എഫ്ബിഐ ഡയറക്ടർ കാഷ് പട്ടേൽ പത്രസമ്മേളനത്തിൽ വ്യക്തമാക്കി.
