ന്യൂഡല്‍ഹി: സോഷ്യല്‍ മീഡിയ പ്ലാറ്റ്‌ഫോമുകളില്‍ കൗമാരപ്രായത്തിലുള്ള ഉപയോക്താക്കളുടെ സുരക്ഷ ഉറപ്പാക്കാനായി ഫെയ്‌സ്ബുക്കിന്റെ മാതൃകമ്പനിയായ മെറ്റ നിര്‍ണായക നീക്കം എടുത്തിരിക്കുകയാണ്. ഫെയ്‌സ്ബുക്ക്, ഇന്‍സ്റ്റഗ്രാം, മെസഞ്ചര്‍ ആപ്പുകളിലായി പ്രാബല്യത്തില്‍ വരുന്ന ‘ടീന്‍ അക്കൗണ്ട്’ എന്ന പുതിയ സുരക്ഷാ ഫീച്ചറിലൂടെ 16 വയസ്സിനു താഴെയുള്ള കുട്ടികളുടെ ഓണ്‍ലൈന്‍ സാന്നിധ്യം നിയന്ത്രിക്കാനും രക്ഷിതാക്കള്‍ക്ക് നിരീക്ഷിക്കാനുമുള്ള സംവിധാനങ്ങളാണ് കമ്പനി ഒരുക്കുന്നത്.
ഏപ്രില്‍ 11-ന് ഇന്ത്യയില്‍ നടന്ന ടീന്‍ സേഫ്റ്റി ഫോറത്തിലാണ് ഈ ഫീച്ചറിന്റെ പ്രഖ്യാപനം നടന്നത്. ഇന്ത്യയിലെ കൗമാരപ്രായത്തിലുള്ള ഉപയോക്താക്കളുടെ സുരക്ഷയ്ക്ക് ഏറെ പ്രാധാന്യം നല്‍കിയാണ് ഈ പദ്ധതി ആവിഷ്കരിച്ചത്. പുതിയ സുരക്ഷാ സംവിധാനത്തിലൂടെ കുട്ടികളുടെ അക്കൗണ്ട് ഉപയോക്തൃ നിയന്ത്രണങ്ങളോടെയും രക്ഷിതാക്കളുടെ നിരീക്ഷണത്തിനും വിധേയമായിട്ടുമാണ് പ്രവര്‍ത്തിക്കുന്നത്.
‘ഫാമിലി സെന്റര്‍’ എന്ന സംവിധാനം വഴി രക്ഷിതാക്കള്‍ക്ക് അവരുടെ കുട്ടികളുടെ മെറ്റ പ്ലാറ്റ്‌ഫോം ഉപയോഗം നിരീക്ഷിക്കാനും നിയന്ത്രിക്കാനും കഴിയുന്ന വിധമാണ് ഈ ഫീച്ചര്‍ രൂപകല്‍പ്പന ചെയ്തത്. അക്കൗണ്ടുകള്‍ നേരിട്ട് പ്രൈവറ്റ് മോഡിലായിരിക്കും പ്രവര്‍ത്തിക്കുക. അപരിചിതര്‍ ഫോളോ ചെയ്യുന്നത്, സന്ദേശമയക്കുന്നത് എന്നിവക്ക് നിയന്ത്രണങ്ങളുണ്ടാകും. അവിടെ പ്രദര്‍ശിപ്പിക്കപ്പെടുന്ന ഉള്ളടക്കങ്ങള്‍ മുന്‍കൂട്ടി ഫില്‍റ്റര്‍ ചെയ്യപ്പെട്ടതായിരിക്കും. അശ്ലീലവും ആക്രമണാത്മകവുമായ ഉള്ളടക്കങ്ങള്‍ നിറയുന്ന ഫീഡുകള്‍ തടയുന്നതിന് പ്രത്യേക സംവിധാനമുണ്ടായിരിക്കും. അതുപോലെ തന്നെ, സൗന്ദര്യ വര്‍ധക ചികിത്സകള്‍ പ്രോത്സാഹിപ്പിക്കുന്ന ഉള്ളടക്കങ്ങളും ഈ അക്കൗണ്ടുകളില്‍ ഉണ്ടായിരിക്കില്ല.
മെറ്റയുടെ മൂന്ന് പ്രധാന പ്ലാറ്റ്‌ഫോമുകളായ ഫെയ്‌സ്ബുക്ക്, ഇന്‍സ്റ്റഗ്രാം, മെസഞ്ചര്‍ ആപ്പുകളിലുമാണ് ഈ നിയന്ത്രണങ്ങള്‍ നടപ്പിലാക്കുന്നത്. ലൈവ് സ്ട്രീമിങ് തുടങ്ങി ചില പ്രധാന സാധ്യതകള്‍ കുട്ടികള്‍ ഉപയോഗിക്കേണ്ടതിന് മുമ്പ് രക്ഷിതാക്കളുടെ അനുമതി ആവശ്യമായിരിക്കും. ദിവസേന ഒരു മണിക്കൂര്‍ കഴിഞ്ഞാല്‍ ഉപയോഗം നിര്‍ത്താനുള്ള നോട്ടിഫിക്കേഷന്‍ ലഭിക്കുമ്പോള്‍ കുട്ടികളുടെ ആക്ടിവിറ്റി നിയന്ത്രിക്കാനാവും. കൂടാതെ രാത്രി 10 മണിമുതല്‍ രാവിലെ 7 മണിവരെ നോട്ടിഫിക്കേഷനുകള്‍ നിശബ്ദമാക്കി സ്ലീപ്പ് മോഡില്‍ കൊണ്ടുവരുന്നതിനുള്ള സൗകര്യവും ഉള്‍പ്പെടുത്തിയിട്ടുണ്ട്.
കൗമാരക്കാരെ സമൂഹമാധ്യമ അപകടങ്ങളില്‍ നിന്ന് സംരക്ഷിക്കുന്നതിനായി കമ്പനി കൈക്കൊണ്ടിരിക്കുന്ന ഈ നടപടികള്‍ മാതൃകാപരമാണെന്നും, പുതിയ സംവിധാനങ്ങള്‍ കുട്ടികളുടെ മാനസികാരോഗ്യവും ഡിജിറ്റല്‍ സുരക്ഷയും ശക്തിപ്പെടുത്തുമെന്ന് വിദഗ്ധര്‍ അഭിപ്രായപ്പെട്ടു.
