എഡിസൺ (ന്യൂജേഴ്സി): ഇന്ത്യ പ്രസ് ക്ലബ് ഓഫ് നോർത്ത് അമേരിക്ക (ഐ.പി.സി.എൻ.എ)യുടെ പതിനൊന്നാമത് അന്താരാഷ്ട്ര മാധ്യമസമ്മേളനം എഡിസൺ ഷെറാട്ടൺ ഹോട്ടലിൽ വിജയകരമായി സമാപിച്ചു. മൂന്ന് ദിവസങ്ങളിലായി നടന്ന മാധ്യമ ചർച്ചകൾക്കും സെഷനുകൾക്കും കലാപരിപാടികൾക്കും കൊടിയിറക്കി. അമേരിക്കയിലുടനീളമുള്ള മലയാള മാധ്യമപ്രവർത്തകരുടെയും കേരളത്തിൽ നിന്നെത്തിയ രാഷ്ട്രീയ–മാധ്യമ പ്രതിനിധികളുടെയും സാന്നിധ്യം സമ്മേളനത്തിന് പുതുമയും പ്രഭാവവും പകർന്നു.
ഒക്ടോബർ 9 വ്യാഴാഴ്ച വൈകുന്നേരം ആറുമണിയ്ക്ക് ആരംഭിച്ച സമ്മേളനം 11 ശനിയാഴ്ച വൈകുന്നേരം സമാപിച്ചു. ഇന്ത്യയിലെ മികച്ച പാർലമെൻ്റേറിയൻ പുരസ്കാരം നേടിയ കൊല്ലം എം.പി. എൻ.കെ. പ്രേമചന്ദ്രൻ സമ്മേളനത്തിന്റെ സമാപനസമ്മേളനം ഉദ്ഘാടനം ചെയ്തു. പാലക്കാട് എം.പി. വി.കെ. ശ്രീകണ്ഠൻ, റാന്നി എം.എൽ.എ. പ്രമോദ് നാരായൺ എന്നിവർ മൂന്നു ദിവസങ്ങളിലുടനീളമായി സജീവ സാന്നിധ്യമായിരുന്നു.
കേരളത്തിൽ നിന്നുള്ള പ്രമുഖ മാധ്യമപ്രവർത്തകരായ കുര്യൻ പാമ്പാടി, ജോണി ലൂക്കോസ് (മനോരമ ന്യൂസ്), അബ്ജോദ് വർഗീസ് (ഏഷ്യാനെറ്റ് ന്യൂസ്), ഹാഷ്മി താജ് ഇബ്രാഹിം (24 ന്യൂസ്), സുജയ പാർവതി (റിപ്പോർട്ടർ ചാനൽ), മോത്തി രാജേഷ് (മാതൃഭൂമി ടി.വി.), ലീൻ ബി. ജെസ്മസ് (ന്യൂസ് 18) എന്നിവർ മാധ്യമരംഗത്തെ പ്രതിനിധീകരിച്ച് പങ്കെടുത്തു.
ഐ.പി.സി.എൻ.എയുടെ പ്രസിഡന്റ് സുനിൽ ട്രൈസ്റ്റാർ, സെക്രട്ടറി ഷിജോ പൗലോസ്, ട്രഷറർ വിശാഖ് ചെറിയാൻ, അഡ്വൈസറി ബോർഡ് ചെയർമാൻ സുനിൽ തൈമറ്റം, പ്രസിഡൻറ് ഇലക്ട് (2026-27) രാജു പള്ളത്ത്, വൈസ് പ്രസിഡൻറ് അനിൽ കുമാർ ആറന്മുള, ജോ. സെക്രട്ടറി ആഷാ മാത്യു, ജോ. ട്രഷറർ റോയ് മുളകുന്നം എന്നിവരുടെ നേതൃത്വത്തിലാണ് സമ്മേളനം സംഘടിപ്പിച്ചത്.
ഒക്ടോബർ 10 വെള്ളിയാഴ്ച സംഘടിപ്പിച്ച പ്രസിഡൻഷ്യൽ നൈറ്റ്, മ്യൂസിക്കൽ ഗാലാ, നൃത്തോത്സവം തുടങ്ങിയവ കലാവിരുന്നുകൾക്ക് തിളക്കം പകർന്നു. പ്രമുഖ നർത്തകരുടെ പ്രകടനങ്ങൾ സമ്മേളന വേദിയെ നിറച്ചുനിറച്ചു.
സമ്മേളനത്തിന്റെ വിജയകരമായ നടത്തിപ്പിനായി കോൺഫറൻസ് ചെയർമാൻ സജി ഏബ്രഹാം, ജനറൽ കൺവീനർ ഷോളി കുമ്പിളുവേലി (ന്യൂയോർക്ക് ചാപ്റ്റർ പ്രസിഡന്റ്) എന്നിവരുടെ നേതൃത്വത്തിൽ രൂപപ്പെടുത്തിയ കോർ കമ്മിറ്റി അംഗങ്ങൾ അഹോരാത്രം പ്രവർത്തിച്ചു. റിസപ്ഷൻ/റജിസ്ട്രേഷൻ വിഭാഗം: ബിജു കൊട്ടാരക്കര, കുഞ്ഞുമോൾ വർഗീസ്, ഡോ. തങ്കമണി അരവിന്ദ്; ഗസ്റ്റ് റിലേഷൻസ്: അനിയൻ ജോർജ്, ജിനേഷ് തമ്പി; ടൈം മാനേജ്മെന്റ്: റെജി ജോർജ്, ജോർജ് തുമ്പയിൽ; പ്രോഗ്രാം: ടാജ് മാത്യു; ഫുഡ് കമ്മിറ്റി: മധു കൊട്ടാരക്കര, സുനിൽ തൈമറ്റം; ട്രാൻസ്പോർട്ടേഷൻ: പിന്റോ ചാക്കോ, അനീഷ് ജെയിംസ്; സെക്യൂരിറ്റി: ജിഷോ; സുവനീർ: മാത്തുക്കുട്ടി ഈശോ; ഓഡിയോ വിഷ്വൽ: ജില്ലി സാമുവേൽ എന്നിവർ നിർണായക പങ്കുവഹിച്ചു.
ഏഷ്യാനെറ്റ് ന്യൂസ്, കൈരളി ചാനൽ, 24 യു.എസ്.എ, മനോരമ ന്യൂസ്, മാതൃഭൂമി ന്യൂസ്, ദി മലയാളം ചാനൽ, ഫ്ളവേഴ്സ് യു.എസ്.എ, ഇമലയാളീ.കോം, നേർകാഴ്ച ന്യൂസ്, റിപ്പോർട്ടർ ലൈവ്, ഇൻഡ്യ ലൈഫ് ടി.വി., എൻ.ആർ.ഐ. റിപ്പോർട്ടർ, പ്രവാസി ചാനൽ, ന്യൂസ് 18 കേരളം, മീഡിയ വൺ, ജനം ടി.വി., മലയാളം ട്രിബ്യൂൺ, അമേരിക്കൻ മലയാളി, മലയാളം ഡെയിലി ന്യൂസ്, യു.എസ്. വീക്കിലി റൗണ്ട് അപ്, ഹാർവെസ്റ്റ് ടി.വി., കേരള ടൈംസ്, ഷിജോസ് ട്രാവൽ ഡയറി, കേരള ഭൂഷണം, കെ.വി.ടി.വി., അബ്ബ ന്യൂസ്, ജനനി, പവർ വിഷൻ, മലയാളി മനസ് തുടങ്ങിയ മലയാള മാധ്യമങ്ങൾ സമ്മേളനത്തിന് പിന്തുണയും ആശംസകളും നൽകി.
മാധ്യമരംഗത്തെ ബന്ധങ്ങൾ ശക്തിപ്പെടുത്തുകയും പുതിയ തലമുറയ്ക്ക് പ്രചോദനമായ വേദിയുമാവുകയും ചെയ്ത ഐ.പി.സി.എൻ.എ എഡിസൺ മീഡിയ കോൺഫറൻസ്, പ്രവാസി മലയാളികളുടെ മാധ്യമചരിത്രത്തിൽ മറ്റൊരു തിളക്കമേറിയ അദ്ധ്യായമായി.
