എഡ്മന്റണിൽ മഞ്ചാടി മലയാളം സ്കൂൾ കണിക്കൊന്ന സർട്ടിഫിക്കറ്റ് വിതരണം നടത്തി; കേരള ദിനാഘോഷം മലയാളത്തിന്റെ മണമുണർത്തി
എഡ്മന്റൺ : കാനഡയിലെ അസോസിയേഷൻ ഫോർ സോഷ്യൽ സർവീസസ് എജ്യൂക്കേഷൻ ട്രെയിനിങ് (അസറ്റ്) നടത്തുന്ന മഞ്ചാടി മലയാളം സ്കൂൾ കണിക്കൊന്ന സർട്ടിഫിക്കറ്റ് വിതരണവും കേരള ദിനാഘോഷവും നിറഞ്ഞ ആചാരാഭിമാനത്തോടെ നടത്തി. കേരള സർക്കാരിന്റെ മലയാളം മിഷൻ നടപ്പാക്കുന്ന രണ്ട് വർഷത്തെ മലയാളപഠന പദ്ധതിയാണ് ‘കണിക്കൊന്ന’.
റെയ്ഹാൻ മുഹമ്മദ്, മുഹമ്മദ് യാസീൻ, ജമീൽ കുഞ്ഞുമുഹമ്മദ്, അതിഥി ബെവിൻ, ഒലീവിയ അനിൽ, ഒസാന അനിൽ, അന്ന മരിയ ഡോണിൽ, ഇവാൻ അലക്സ് എന്നിവരാണ് കണിക്കൊന്ന കോഴ്സ് വിജയകരമായി പൂർത്തിയാക്കി മലയാളം മിഷന്റെ സർട്ടിഫിക്കറ്റുകൾ കരസ്ഥമാക്കിയത്. ഏകദേശം ഇരുപതിനായിരത്തിലധികം മലയാളികൾ താമസിക്കുന്ന എഡ്മന്റണിൽ ആദ്യമായാണ് കുട്ടികൾ മലയാളം മിഷന്റെ സർട്ടിഫിക്കറ്റ് പരീക്ഷ വിജയകരമായി പൂർത്തിയാക്കുന്നത്. മഞ്ചാടി മലയാളം സ്കൂളിൽ കണിക്കൊന്ന കോഴ്സിനൊപ്പം സൂര്യകാന്തി ഡിപ്ലോമ കോഴ്സിലുമായി അൻപതോളം വിദ്യാർത്ഥികൾ മലയാളപഠനം തുടരുന്നു.
ബ്രൂക്ക്സൈഡ് ഹാളിൽ നടന്ന കേരള ദിനാഘോഷത്തിന് സ്കൂൾ പ്രിൻസിപ്പൽ അമ്പിളി സാജു സ്വാഗതം പറഞ്ഞു. എഡ്മന്റൺ ഹിന്ദി പരിഷത്ത് പ്രസിഡന്റ് പുനീത്, ഹിന്ദി സ്കൂൾ പ്രിൻസിപ്പൽ അൽക്ക എന്നിവർ വിശിഷ്ടാതിഥികളായിരുന്നു. മലയാളം മിഷൻ ഡയറക്ടർ മുരുകൻ കാട്ടാക്കടയും കാനഡ കോഓർഡിനേറ്റർ ജോസഫ് ജോണും വിദ്യാർത്ഥികൾക്ക് അഭിനന്ദന സന്ദേശം നൽകി.
കേരളത്തിന്റെ തനിമ വിളിച്ചോതുന്ന മോഹിനിയാട്ടം, തിരുവാതിര, നാടോടിനൃത്തം, നാടൻപാട്ട് തുടങ്ങിയ കലാപരിപാടികൾ വിദ്യാർത്ഥികളും കുടുംബാംഗങ്ങളും ചേർന്ന് അവതരിപ്പിച്ചു. അസറ്റ് പ്രസിഡന്റ് ഡോ. ബൈജു പി.വി. നന്ദി അറിയിച്ചു. അസറ്റ് സെക്രട്ടറി ജോഷി ജോസഫും ട്രഷറർ അനിൽ മാത്യുവും പരിപാടിക്ക് നേതൃത്വം നൽകി.
