നോർത്ത് അമേരിക്കൻ സിഎസ്ഐ ഫാമിലി & യൂത്ത് കോൺഫറൻസ്: 2026ലെ തീം ഡാലസിൽ പ്രകാശനം ചെയ്തു
ഫാർമേഴ്സ് ബ്രാഞ്ച്, ടെക്സസ് : നോർത്ത് അമേരിക്കയിലെ 35-ാമത് സിഎസ്ഐ ഫാമിലി & യൂത്ത് കോൺഫറൻസിന്റെ 2026 ജൂലൈയിൽ നടക്കുന്ന സമ്മേളനത്തിനായുള്ള ഔദ്യോഗിക തീം ലവ് ഓഫ് ക്രൈസ്റ്റ് സിഎസ്ഐ ചർച്ചിൽ നടന്ന പ്രത്യേക ശുശ്രൂഷയിൽ പ്രകാശനം ചെയ്തു. ‘ക്രിസ്തുവിൽ തലമുറകളെ വളർത്തുക, ബന്ധിപ്പിക്കുക’ എന്ന ആശയം മുന്നോട്ട് വയ്ക്കുന്ന തീം, കുടുംബങ്ങളുടെയും യുവജനങ്ങളുടെയും ആത്മീയ വളർച്ചയെ ആസ്പദമാക്കിയതാണ്.
സിഎസ്ഐ മധ്യകേരളാ ഡയോസിസ് ബിഷപ് ഡോ. മലയിൽ സാബു കോശി ചെറിയാൻ മുഖ്യ കാർമികത്വം വഹിച്ച ചടങ്ങിൽ സെന്റ് ആൻഡ്രൂസ് എപ്പിസ്കോപ്പൽ ചർച്ച് പ്രീസ്റ്റ് റവ. റോയ് എ. തോമസ്, സെന്റ് ലൂക്ക്സ് എപ്പിസ്കോപ്പൽ ചർച്ച് പ്രീസ്റ്റ് റവ. ജോർജ് ജോസഫ്, ലവ് ഓഫ് ക്രൈസ്റ്റ് സിഎസ്ഐ ചർച്ച് പാസ്റ്റർ എമറിറ്റസ് റവ. ഡോ. മാധവരാജ് സാമുവേൽ, സിഎസ്ഐ കോൺഗ്രിഗേഷൻ ഓഫ് ഡാലസ് പ്രെസ്ബിറ്റർ-ഇൻ-ചാർജ് റവ. റീജീവ് സുഗു എന്നിവർ പങ്കെടുത്തു.
ഡാലസ് സിഎസ്ഐ കോൺഗ്രിഗേഷനിലെ വിശ്വാസികളും ചടങ്ങിൽ സാന്നിധ്യം രേഖപ്പെടുത്തി. ബിഷപ്പും സംഘാടകരും ചേർന്ന് തീം ആവിഷ്കരിച്ച ബാനർ അൾത്താരയിൽ വെച്ച് ഔദ്യോഗിക പ്രകാശനം നടത്തി. ആത്മീയ ശക്തിപ്പെടുത്തലിനെയും സമൂഹബന്ധ സുദൃഢമാക്കലിനെയും ലക്ഷ്യമിടുന്ന ഈ കോൺഫറൻസ് 20 വർഷങ്ങൾക്ക് ശേഷം വീണ്ടും ഡാലസിലാണ് സംഘടിപ്പിക്കുന്നത്.
