മലങ്കര ഓർത്തഡോക്സ് സുറിയാനി സഭയുടെ സാന്ത്വനം സ്പെഷ്യൽ സ്കൂൾ ഡിജിറ്റൽ വൊക്കേഷണൽ ട്രെയിനിംഗ് യൂണിറ്റ് ഉദ്ഘാടനം ഫെബ്രുവരി 24ന്.
കോട്ടയം: മലങ്കര ഓർത്തഡോക്സ് സുറിയാനി സഭയുടെ ആഭിമുഖ്യത്തിൽ പ്രവർത്തിക്കുന്ന സാന്ത്വനം സ്പെഷ്യൽ സ്കൂളിൽ ‘എക്സലൻസ് എഡ്ജ് ഡിജിറ്റൽ’ എന്ന പേരിൽ വൊക്കേഷണൽ ട്രെയിനിംഗ് യൂണിറ്റിന്റെ ഉദ്ഘാടനം ഫെബ്രുവരി 24-ന് രാവിലെ 11 മണിക്ക് നടക്കും. വിദ്യാർത്ഥികളുടെ കഴിവുകൾ നവീന സാങ്കേതിക വിദ്യയുടെ സഹായത്തോടെ മെച്ചപ്പെടുത്തുകയും തൊഴിൽപരമായ പരിശീലനത്തിലൂടെ സ്വയംപര്യാപ്തതയിലേക്ക് നയിക്കുകയും ചെയ്യുന്നതാണ് പദ്ധതിയുടെ ലക്ഷ്യം.
ചടങ്ങിൽ പ്രധാനാതിഥിയായി കിഡ്നി ഫെഡറേഷൻ ഓഫ് ഇന്ത്യയുടെ സ്ഥാപകനും ചെയർമാനുമായ ഫാ. ഡേവിസ് ചിറമേൽ പങ്കെടുക്കും. സാമൂഹിക പ്രതിബദ്ധതയും സേവന മനോഭാവവും ഉയർത്തിപ്പിടിക്കുന്ന അദ്ദേഹത്തിന്റെ സാന്നിധ്യം പരിപാടിക്ക് കൂടുതൽ പ്രാധാന്യം നൽകുമെന്ന് സംഘാടകർ അറിയിച്ചു.
പ്രത്യേക വിദ്യാർത്ഥികളുടെ സമഗ്ര വളർച്ചയും സാങ്കേതിക വിദ്യയുമായി ചേർത്ത് അവരുടെ കഴിവുകൾ സമൂഹമേഖലയിൽ പ്രകടമാക്കുന്നതിനും സഹായകമാകുന്ന രീതിയിലാണ് ഡിജിറ്റൽ വൊക്കേഷണൽ ട്രെയിനിംഗ് യൂണിറ്റ് സജ്ജീകരിച്ചിരിക്കുന്നതെന്ന് അധികൃതർ വ്യക്തമാക്കി. “വിഷ്വലൈസിംഗ് എക്സെപ്ഷണൽ പ്രോഗ്രസ്” എന്ന മുദ്രാവാക്യത്തോടെ ആരംഭിക്കുന്ന ഈ സംരംഭം വിദ്യാഭ്യാസ രംഗത്ത് പുതിയ മുന്നേറ്റമായി മാറുമെന്നാണ് പ്രതീക്ഷ.
