ഇറാൻ ആണവചർച്ചകളിൽ പുരോഗതിയില്ല; കടുത്ത നീക്കങ്ങൾക്ക് മുന്നറിയിപ്പുമായി ഡൊണാൾഡ് ട്രംപ് , പശ്ചിമേഷ്യയിൽ സംഘർഷമേഘങ്ങൾ കനക്കുന്നു.
ഇറാനുമായുള്ള ആണവ ചർച്ചകളുടെ നിലവിലെ പുരോഗതിയിൽ താൻ സംതൃപ്തനല്ലെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് വ്യക്തമാക്കി. ജനീവയിൽ നടന്ന നയതന്ത്ര ചർച്ചകൾ പ്രതീക്ഷിച്ചതുപോലെ മുന്നേറുന്നില്ലെന്ന വിലയിരുത്തലോടെയാണ് വൈറ്റ് ഹൗസിൽ നടത്തിയ പ്രതികരണത്തിൽ അദ്ദേഹം അതൃപ്തി പ്രകടിപ്പിച്ചത്.
“അവർ കാര്യഗൗരവത്തോടെ മുന്നോട്ട് പോകുന്നില്ല. ആവശ്യമായ നടപടികൾക്ക് തയ്യാറാകുന്നില്ലെങ്കിൽ സന്തോഷിക്കാൻ കഴിയില്ല,” എന്നായിരുന്നു ട്രംപിന്റെ പരാമർശം. ഇറാൻ ആണവായുധ ലക്ഷ്യങ്ങൾ പൂർണമായി ഉപേക്ഷിക്കണമെന്ന നിലപാടിൽ അമേരിക്ക ഉറച്ചുനിൽക്കുന്നുവെന്നും അദ്ദേഹം ആവർത്തിച്ചു.
നയതന്ത്ര ശ്രമങ്ങൾ ഫലം കാണാതിരുന്നാൽ സൈനിക നടപടി ഉൾപ്പെടെയുള്ള കടുത്ത തീരുമാനങ്ങൾ പരിഗണിക്കേണ്ടി വരാമെന്ന സൂചനയും ട്രംപ് നൽകി. യുദ്ധം തന്റെ ആഗ്രഹമല്ലെങ്കിലും, അമേരിക്കയുടെ താൽപ്പര്യങ്ങൾ സംരക്ഷിക്കാൻ ആവശ്യമായ എല്ലാ മാർഗങ്ങളും ഉപയോഗിക്കാൻ മടിക്കില്ലെന്ന മുന്നറിയിപ്പും അദ്ദേഹം പുറപ്പെടുവിച്ചു.
അതേസമയം, മേഖലയിലെ അമേരിക്കൻ സൈനിക സന്നാഹം ശക്തിപ്പെടുത്തിയിരിക്കുന്നതായി റിപ്പോർട്ടുകളുണ്ട്. ഈ സാഹചര്യത്തിൽ പശ്ചിമേഷ്യയിൽ വീണ്ടും സംഘർഷാന്തരീക്ഷം ശക്തമാകുമോയെന്ന ആശങ്ക അന്താരാഷ്ട്ര തലത്തിൽ ഉയരുകയാണ്. ഇറാൻ പരമോന്നത നേതാവ് അലി ഖമേനിയി ഇതുവരെ ട്രംപിന്റെ പരാമർശങ്ങൾക്ക് ഔദ്യോഗിക പ്രതികരണം നൽകിയിട്ടില്ല.
