പാസ്പോർട്ട് പുതുക്കൽ ഇനി എളുപ്പം; ഓൺലൈൻ സേവനം രാജ്യവ്യാപകമായി ആരംഭിച്ച് കാനഡ
ഒട്ടാവ: കാനഡയിൽ പാസ്പോർട്ട് പുതുക്കൽ നടപടികൾ കൂടുതൽ ലളിതമാക്കി ഫെഡറൽ സർക്കാർ പുതിയ ഓൺലൈൻ സംവിധാനം രാജ്യവ്യാപകമായി ആരംഭിച്ചു. ഇനി അർഹരായ കനേഡിയൻ പൗരന്മാർക്ക് സർവീസ് കാനഡ കേന്ദ്രങ്ങളിൽ നേരിട്ട് എത്താതെ തന്നെ വീട്ടിലിരുന്ന് ഓൺലൈനായി പാസ്പോർട്ട് പുതുക്കാൻ സാധിക്കും.
ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് മന്ത്രി ലെന മെറ്റ്ലെജ് ഡിയാബ് ആണ് പുതിയ സേവനം പ്രഖ്യാപിച്ചത്. പരീക്ഷണാടിസ്ഥാനത്തിൽ നടപ്പാക്കിയിരുന്ന പദ്ധതിയുടെ വിജയത്തെ തുടർന്ന് ഇനി ഓൺലൈൻ അപേക്ഷകളുടെ ദിവസേനയുള്ള പരിധിയും സർക്കാർ ഒഴിവാക്കിയിട്ടുണ്ട്. ഏകദേശം 20 ലക്ഷം കനേഡിയൻ പൗരന്മാർക്ക് ഈ സേവനം പ്രയോജനപ്പെടുമെന്നാണ് വിലയിരുത്തൽ.
ഓൺലൈൻ പുതുക്കലിന് അപേക്ഷിക്കുന്നവർക്ക് കാനഡയിലെ താമസ വിലാസം ഉണ്ടായിരിക്കണം. കൂടാതെ ഡിജിറ്റൽ പാസ്പോർട്ട് ഫോട്ടോ ഉൾപ്പെടെയുള്ള ആവശ്യമായ രേഖകൾ ഓൺലൈനായി സമർപ്പിക്കണം. സാധാരണയായി അപേക്ഷകൾ 20 പ്രവൃത്തി ദിവസങ്ങൾക്കുള്ളിൽ പ്രോസസ്സ് ചെയ്യുമെന്ന് സർക്കാർ അറിയിച്ചു.
