ലണ്ടൻ/സെറ്റ: മൊറോക്കോയിൽ നിന്ന് സ്പെയിനിന്റെ സ്വയംഭരണ പ്രദേശമായ സെറ്റയിലേക്ക് (Ceuta) വൻതോതിൽ അഭയാർത്ഥികൾ അതിർത്തി കടക്കാൻ ശ്രമിച്ചതിനെ തുടർന്ന് ഉണ്ടായ സംഘർഷങ്ങളിലും അപകടങ്ങളിലുമായി 57 പേർ മരിച്ചതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. വെറും 80,000 ജനസംഖ്യയുള്ള സെറ്റയിലേക്ക് കഴിഞ്ഞ ദിവസങ്ങളിലായി ഏകദേശം 60,000 പേർ പ്രവേശിക്കാൻ ശ്രമിച്ചതോടെയാണ് പ്രദേശത്ത് ഗുരുതര കുടിയേറ്റ പ്രതിസന്ധി രൂപപ്പെട്ടത്.
ജിബ്രാൾട്ടർ കടലിടുക്ക് നീന്തിക്കടന്നും അതിർത്തി മറികടന്നുമാണ് ഭൂരിഭാഗം പേരും സ്പാനിഷ് അധീന പ്രദേശത്ത് പ്രവേശിക്കാൻ ശ്രമിച്ചത്. സ്ഥിതിഗതികൾ വിലയിരുത്തുന്നതിനായി സ്പാനിഷ് പ്രധാനമന്ത്രി പെഡ്രോ സാഞ്ചസ് സെറ്റ സന്ദർശിക്കുമെന്ന് സർക്കാർ അറിയിച്ചു. മരിച്ചവരുടെ പോസ്റ്റ്മോർട്ടം നടപടികൾ വേഗത്തിൽ പൂർത്തിയാക്കുമെന്നും സ്പാനിഷ് സുരക്ഷാ സേന വ്യക്തമാക്കി.
അഭയാർത്ഥികളുടെ വൻപ്രവാഹത്തെ തുടർന്ന് സെറ്റയിലെ സാധാരണ ജനജീവിതം താറുമാറായി. വ്യാപാര സ്ഥാപനങ്ങൾ അടച്ചിട്ടതോടെ നഗരത്തിലെ പ്രവർത്തനങ്ങൾ സ്തംഭിച്ചു. ജനങ്ങൾ അനാവശ്യമായി പുറത്തിറങ്ങരുതെന്നും വീടുകളിൽ തന്നെ തുടരണമെന്നും പ്രാദേശിക ഭരണകൂടം നിർദേശം നൽകി.
ഇതിനിടെ, ഏകദേശം 48,000 പേരെ മൊറോക്കോയിലേക്ക് തിരിച്ചയച്ചതായി സ്പാനിഷ് അധികൃതർ അറിയിച്ചു. എന്നാൽ അതിർത്തിയിലെ സാഹചര്യം പൂർണമായും നിയന്ത്രണവിധേയമായിട്ടില്ലെന്നും സുരക്ഷാ നടപടികൾ ശക്തമാക്കിയിട്ടുണ്ടെന്നും അധികൃതർ വ്യക്തമാക്കി.
അടിയന്തര സാഹചര്യം കൈകാര്യം ചെയ്യുന്നതിൽ സ്പാനിഷ് സർക്കാരിന് വീഴ്ച സംഭവിച്ചെന്നും പ്രതികരണം വൈകിയെന്നുമാണ് സെറ്റ പ്രവിശ്യാ പ്രസിഡന്റ് ജുവാൻ ഹെസൂസ് വിവാസ് ആരോപിച്ചത്. അതേസമയം, മൊറോക്കോയുമായുള്ള നയതന്ത്രബന്ധം നിലവിൽ മികച്ച നിലയിലാണെന്നും സംയുക്തമായി പ്രതിസന്ധി പരിഹരിക്കാനുള്ള ശ്രമങ്ങൾ തുടരുകയാണെന്നും സ്പാനിഷ് സർക്കാർ അറിയിച്ചു.
സാധാരണ സ്ഥിതി എത്രയും വേഗം പുനഃസ്ഥാപിക്കാൻ ആവശ്യമായ എല്ലാ സംവിധാനങ്ങളും വിന്യസിച്ചിട്ടുണ്ടെന്നും അന്താരാഷ്ട്ര ഏജൻസികളുമായി സഹകരിച്ച് പ്രതിസന്ധി മറികടക്കാനുള്ള നടപടികൾ പുരോഗമിക്കുകയാണെന്നും പ്രധാനമന്ത്രി പെഡ്രോ സാഞ്ചസ് വ്യക്തമാക്കി.
ഇതിനിടെ, സ്പെയിനിന്റെ മറ്റൊരു സ്വയംഭരണ അതിർത്തി പ്രദേശമായ മെലില്ലയിലും മുന്നൂറിലധികം പേർ അതിർത്തി കടക്കാൻ ശ്രമിച്ചതായി റിപ്പോർട്ടുകളുണ്ട്. 2021-ലും സമാന രീതിയിൽ സെറ്റയിൽ വൻതോതിലുള്ള കുടിയേറ്റ പ്രതിസന്ധി ഉണ്ടായിരുന്നതായി അധികൃതർ ഓർമ്മിപ്പിച്ചു.
