അന്താരാഷ്ട്ര മാധ്യമ സമ്മേളനം 2025 ഒക്ടോബറിൽ ന്യൂ ജേഴ്സിയിൽ

ന്യൂയോർക്ക്: വടക്കെ അമേരിക്കയിലെ മലയാളി മാധ്യമ പ്രവർത്തകരുടെ കൂട്ടായ്മയായ ഇന്ത്യാ പ്രസ് ക്ലബ് ഓഫ് നോർത്ത് അമേരിക്കയുടെ പതിനൊന്നാമത് അന്താരാഷ്ട്ര മാധ്യമ സമ്മേളനം 2025 ഒക്ടോബർ 9, 10, 11 തീയതികളിൽ ന്യൂജേഴ്സിയിലെ എഡിസൺ ഷെറാട്ടൺ ഹോട്ടലിൽ വെച്ച് നടത്തപ്പെടും.

കോൺഫറൻസ് വേദിയായ ഷെറാട്ടൺ ഹോട്ടൽ ജനറൽ മാനേജർ ജാസ്സി സിങ്ങും ഇന്ത്യാ പ്രസ് ക്ലബ് നാഷണൽ സെക്രട്ടറി ഷിജോ പൗലോസ്, പ്രസിഡന്റ് സുനിൽ ട്രൈസ്റ്റാർ എന്നിവരുമായി ഇത് സംബന്ധിച്ച ധാരണാപത്രം ഒപ്പിട്ടു. അമേരിക്കയുടെ വിവിധ ഭാഗങ്ങളിൽ നിന്ന് മാധ്യമപ്രവർത്തകരും സാമൂഹ്യ-സാംസ്കാരിക നേതാക്കളും കമ്മ്യൂണിറ്റി നേതാക്കളും വ്യാപാര വ്യവസായ പ്രമുഖരും വേദി സന്ദർശിക്കുകയും ഒരുക്കങ്ങളെപ്പറ്റി ചർച്ച നടത്തുകയും ചെയ്തു. ഐ. പി. സി. എൻ. എ ന്യൂയോർക്ക് ചാപ്റ്റർ പ്രസിഡന്റ് ഷോളി കുമ്പിളുവേലി, സെക്രട്ടറി ജോജോ കൊട്ടാരക്കര, ട്രഷറർ ബിനു തോമസ് തുടങ്ങിയവർ ആതിഥേയത്വം വഹിക്കുന്നു.

30 ശതമാനത്തിലേറെ ഇന്ത്യാക്കാരുള്ള ഏക അമേരിക്കൻ നഗരമായ എഡിസൺ ഈ സമ്മേളനത്തിന് ഏറ്റവും അനുയോജ്യമായ വേദിയാണെന്ന് മാധ്യമപ്രവർത്തകരും സാമൂഹ്യ-സാംസ്കാരിക രംഗത്തെ പ്രമുഖരും വിലയിരുത്തുന്നു. ന്യൂവാർക്ക് അന്താരാഷ്ട്ര വിമാനത്താവളത്തിൽ നിന്ന് 20 മിനിറ്റ് മാത്രം ദൂരെയായതിനാൽ ഗതാഗത സൗകര്യവും ഈ സ്ഥലത്തിനുണ്ട്. അമേരിക്കൻ മലയാളി മാധ്യമപ്രവർത്തക കൂട്ടായ്മയുടെ ചരിത്രത്തിലെ മറ്റൊരു നാഴികക്കല്ലായി ഈ സമ്മേളനം മാറുമെന്നാണ് വിലയിരുത്തൽ.

2006ൽ ആദ്യമായി ആരംഭിച്ച അന്താരാഷ്ട്ര മാധ്യമ സമ്മേളനം വർഷങ്ങളായി വളർന്നുപന്തലിച്ചുവെന്നാണ് അഭിമാനം. ആദ്യ സമ്മേളനത്തിൽ മുഖ്യപ്രഭാഷകനായി എത്തിയത് മലയാള മനോരമ എഡിറ്റോറിയൽ ഡയറക്ടർ തോമസ് ജേക്കബായിരുന്നു. മലയാള മാധ്യമരംഗത്തെ പ്രവർത്തനങ്ങളുടെ അവലോകനത്തോടൊപ്പം, അമേരിക്കയിലെ മാധ്യമപ്രവർത്തകർക്ക് പ്രചോദനം നൽകുന്ന ഒരു ഉന്നത മാധ്യമ സമ്മേളനമായിരിക്കും ഈ വർഷത്തേതെന്നും സംഘാടകർ വ്യക്തമാക്കി. കേരളത്തിലെ പ്രധാന മാധ്യമപ്രവർത്തകരെയും രാഷ്ട്രീയ നേതാക്കളെയും പങ്കെടുപ്പിച്ചുകൊണ്ടായിരിക്കും ഇത്തവണയും പരിപാടികൾ സംഘടിപ്പിക്കുക.

മുൻപ് മൂന്നു തവണ ന്യൂജേഴ്സിയിൽ ഈ കോൺഫറൻസ് നടന്നിട്ടുണ്ട്. ഓരോന്നിലും വലിയ ജനപങ്കാളിത്തം ഉണ്ടായിരുന്നുവെന്നതാണ് പ്രത്യേകത. ട്രൈസ്റ്റേറ്റ് മേഖലയിൽ നിന്നുള്ളവർക്കും വാഷിംഗ്ടണിൽ നിന്നുമൊക്കെ ഡ്രൈവ് ചെയ്ത് എത്താൻ സാധിക്കുന്നത്ര മനോഹരമായ സ്ഥലമാണിത്.

ഇന്ത്യാ പ്രസ് ക്ലബിന്റെ ഉപാധ്യക്ഷൻ അനിൽകുമാർ ആറന്മുള, മുൻ പ്രസിഡന്റ് ജോർജ് ജോസഫ്, മുൻ ട്രഷറർ ജോർജ് തുമ്പയിൽ, ഫിലാഡൽഫിയ പ്രസിഡന്റ് അരുൺ കോവാട്ട്, ന്യൂയോർക്ക് അംഗം ജോൺസൻ ജോർജ്, ഫൊക്കാന പ്രസിഡന്റ് സജിമോൻ ആന്റണി, ഫോമാ നാഷണൽ സെക്രട്ടറി ബൈജു വർഗീസ്, ഫൊക്കാന മുൻ പ്രസിഡന്റ് പോൾ കറുകപ്പിള്ളിൽ, ഫോമാ മുൻ പ്രസിഡന്റ് അനിയൻ ജോർജ്, മുൻ സെക്രട്ടറി ജിബി മോളോപറമ്പിൽ, സാമൂഹ്യ-സാംസ്കാരിക കലാരംഗത്തെ പ്രമുഖരായ സണ്ണി വാണിയപ്ലാക്കൽ, സജി മാത്യു, മിത്രാസ് പ്രസിഡന്റ് രാജൻ ചീരൻ, ജിഷോ തോമസ്, പ്രമുഖ വ്യവസായിയും സംരംഭകനുമായ നോഹ ജോർജ് ഗ്ലോബൽ കൊളീഷൻ എന്നിവരും വേദി സന്ദർശിച്ചു.

ഈ വർഷത്തെ പ്ലാറ്റിനം ഇവന്റ് & മെയിൻ സ്പോൺസർ സാജ് ഏർത് റിസോർട്ടിന്റെ ഉടമകളായ സാജൻ വർഗീസ്, മിനി സാജൻ എന്നിവരാണ്. ഓരോ സമ്മേളനവും ഒന്നിനൊന്നു മികച്ചത് എന്ന പാരമ്പര്യമാണ് പ്രസ് ക്ലബിനുള്ളതെന്ന് പ്രസിഡന്റ് സുനിൽ ട്രൈസ്റ്റാർ ചൂണ്ടിക്കാട്ടി. ഇപ്രാവശ്യവും അത് അങ്ങനെ തന്നെയായിരിക്കുമെന്നാണ് കരുതുന്നത്.

ജനുവരിയിൽ കൊച്ചിയിൽ നടന്ന മാധ്യമശ്രീ, മാധ്യമരത്ന, പയനിയർ, മീഡിയ എക്‌സലൻസ് അവാർഡ് ദാനച്ചടങ്ങ് വൻ വിജയമായി. അതുമായി ബന്ധപ്പെട്ട് വിമർശനങ്ങൾ ഉണ്ടായെങ്കിലും സമ്മേളനത്തെ ബാധിച്ചില്ല, മറിച്ച് കൂടുതൽ ജനശ്രദ്ധ നേടാൻ സഹായിച്ചു. കേരളത്തിലെ ടിവി ചാനലുകളുടെ പുരസ്കാരവേദിക്കൊപ്പം കിടപിടിച്ച അവാർഡ് ദാനച്ചടങ്ങ് മികച്ച അഭിപ്രായം നേടിയതായും ഭാരവാഹികൾ അറിയിച്ചു.

വ്യത്യസ്തവും മാധ്യമപ്രവർത്തകർക്കു പ്രയോജനപ്പെടുന്നതുമായ പരിപാടികൾ ഈ വർഷത്തെ കോൺഫറൻസിൽ ഉൾപ്പെടുത്തുമെന്ന് അഡ്വൈസറി ബോർഡ് ചെയർമാൻ സുനിൽ തൈമറ്റം, നിയുക്ത പ്രസിഡന്റ് രാജു പള്ളത്തു എന്നിവർ അറിയിച്ചു. ഹോട്ടൽ ബുക്കിംഗിനും രജിസ്ട്രേഷനുമുള്ള വെബ്‌സൈറ്റ് ഉടൻ പ്രവർത്തനസജ്ജമാകുമെന്നും അവർക്കു വ്യക്തമാക്കി. കേരളത്തിൽ നിന്നുള്ള പ്രമുഖ മാധ്യമപ്രവർത്തകരും രാഷ്ട്രീയ നേതാക്കളും പങ്കെടുക്കുമെന്നും ഭാരവാഹികൾ കൂട്ടിച്ചേർത്തു. കൂടുതൽ വിവരങ്ങൾക്ക് ഇന്ത്യാ പ്രസ് ക്ലബ് ഭാരവാഹികളുമായി ബന്ധപ്പെടാവുന്നതാണ്.