ദുബായ് : ബോളിവുഡിന്റെ കിംഗ് ഖാൻ എന്നറിയപ്പെടുന്ന ഷാറുഖ് ഖാൻ ദുബായിൽ നടത്തിയ ഒരു അപ്രതീക്ഷിത സന്ദർശനമാണ് ഇപ്പോൾ വാർത്തയാകുന്നത്. ജുമൈറ അൽ നസീമിലെ പ്രശസ്ത ഇറ്റാലിയൻ റസ്റ്ററന്റായ ഇൽ ബോറോ ടസ്കൻ ബിസ്ട്രോയിലേക്കാണ് താരം അപ്രതീക്ഷിതമായി എത്തിയത്. റസ്റ്ററന്റിന്റെ പാചക ടീമുമായി സംവദിച്ചും വിഭവങ്ങൾ രുചിച്ചും അടുക്കളയിൽ കുറച്ചു നിമിഷങ്ങൾ ചെലവഴിച്ച ഷാറുഖിന്റെ സാന്നിധ്യം ജീവനക്കാരിൽ ആനന്ദം പകരുകയും ചെയ്തു.
ഈ സന്ദർശനം ഔപചാരികമായ ഒന്നല്ലെന്ന് റസ്റ്ററന്റുമായി അടുത്ത വൃത്തങ്ങൾ വ്യക്തമാക്കി. പഴയ സുഹൃത്തിന്റെ ക്ഷണപ്രകാരം എത്തിയ ഷാറുഖ് ഖാൻക്ക് ഈ റസ്റ്ററന്റ് ഏറെ പരിചിതമായ ഇടമാണ്. ദുബായിൽ എത്തിയാൽ എല്ലായ്പ്പോഴും അദ്ദേഹം ആശ്വാസകരമായി സമയം ചെലവഴിക്കുന്ന സ്ഥലങ്ങളിൽ ഒന്നാണ് ഇൽ ബോറോ. അടുക്കളയിൽ സൂപ്പർതാരത്തിന്റെ സാന്നിധ്യം അപൂർവമായതിനാൽ ടീം ആവേശഭരിതരായിരുന്നു.
ചിരികളുടെയും സൗഹൃദ സംഭാഷണങ്ങളുടെയും നടുവിൽ നല്ല ഭക്ഷണത്തെയും അത് തയ്യാറാക്കുന്നവരെയും അഭിനന്ദിച്ച ഷാറുഖ് ഖാന്റെ ലളിതമായ പെരുമാറ്റം ജീവനക്കാർ മനസ്സിലുറപ്പിച്ച് പറയുന്നു. ഇൽ ബോറോയുടെ ഓപ്പറേഷൻസ് ഡയറക്ടറായ ജിത്തു യാദവിനൊപ്പമുള്ള താരത്തിന്റെ ചിത്രം സോഷ്യൽ മീഡിയയിൽ വ്യാപകമായി പ്രചരിച്ചു.
ഇറ്റാലിയൻ വിഭവങ്ങളോടുള്ള ഷാറുഖ് ഖാന്റെ പ്രിയമാണ് ഈ റസ്റ്ററന്റിലേക്കുള്ള ആവർത്തിത സന്ദർശനങ്ങൾക്ക് കാരണം. അംബാനി കുടുംബാംഗങ്ങൾ, രൺബീർ കപൂർ, ബോബി ഡിയോൾ, സഞ്ജയ് ദത്ത് തുടങ്ങിയവർ ഈ റസ്റ്ററന്റിന്റെ സ്ഥിരം അതിഥികളാണ്. ഷാറുഖ് ഖാൻ ഇഷ്ടപ്പെടുന്ന വിഭവങ്ങളിൽ ‘പിസ്സ അൽ ടാർട്ടൂഫോ’, ‘ടാഗ്ലിയാറ്റെല്ലെ അൽ ടാർട്ടൂഫോ’, ‘കാർപാസിയോ ദ് റേപ് റോസ്’ തുടങ്ങിയവ ഉൾപ്പെടുന്നു.
അദ്ദേഹത്തിന് പാചകത്തിലേക്കും പ്രത്യേക താത്പര്യമുണ്ട്. നേരത്തെയും ട്രഫിൾ പിസ്സ തയ്യാറാക്കാൻ ശ്രമിച്ചിട്ടുള്ള ഷാറുഖ് ഖാൻ അടുക്കളയിലെ സമയം ആസ്വദിക്കുന്നവരിൽ ഒരാളാണ്. ദുബായിലെ ഈ അടുക്കള സന്ദർശനത്തിലൂടെ സൗഹൃദത്തിന്റെ ‘സ്വാദ്’ പകരാൻ താരത്തിന് കഴിഞ്ഞു.
