ബെംഗളൂരു : വിമാനയാത്രയ്ക്കിടെ തളർന്ന് വീണ യുഎസ് സ്വദേശിനിയുടെ ജീവൻ രക്ഷിക്കാൻ സമയോചിതമായി ഇടപെട്ട എഐസിസി സെക്രട്ടറി ഡോ. അഞ്ജലി നിംബാൽക്കറിന് സമൂഹമാധ്യമങ്ങളിൽ നിന്നും വ്യാപക അഭിനന്ദനമാണ് ലഭിക്കുന്നത്. ഗോവയിൽ നിന്ന് ഡൽഹിയിലേക്ക് യാത്ര ചെയ്യുന്നതിനിടെയാണ് വിമാനംക്കുള്ളിൽ അടിയന്തര സാഹചര്യം ഉണ്ടായത്.
അപ്രതീക്ഷിതമായി ഒരു വനിതാ സഹയാത്രിക ബോധംകെട്ട് നിലംപതിച്ചതോടെ ഡോ. അഞ്ജലി ഉടൻ ഇടപെട്ടു. ഡോക്ടറെന്ന നിലയിലെ പരിചയവും സാന്നിധ്യബോധവും പ്രകടിപ്പിച്ച അവർ ഉടൻ സിപിആർ നൽകി ജീവൻ രക്ഷിക്കാൻ ശ്രമം ആരംഭിച്ചു. സമയബന്ധിതമായ ഈ ഇടപെടൽ നിർണായകമായി മാറുകയായിരുന്നു.
തുടർന്ന് വിമാനം ഡൽഹിയിൽ ഇറങ്ങുന്നതുവരെ രോഗിയെ ശ്രദ്ധയോടെ പരിചരിച്ച ഡോ. അഞ്ജലി, ലാൻഡിംഗിന് പിന്നാലെ ആശുപത്രിയിലേക്ക് മാറ്റുന്നതിനും ആവശ്യമായ ക്രമീകരണങ്ങൾക്കുമാണ് മുൻകൈ എടുത്തത്. നിലവിൽ വനിതയുടെ ആരോഗ്യനില തൃപ്തികരമാണെന്നാണ് വിവരം.
കർണാടകയിലെ മുൻ കോൺഗ്രസ് എംഎൽഎ കൂടിയായ ഡോ. അഞ്ജലി നിംബാൽക്കർ നിലവിൽ ഗോവയുടെ ചുമതലയുള്ള എഐസിസി സെക്രട്ടറിയാണ്. വോട്ട് കൊള്ളയ്ക്കെതിരെയുള്ള റാലിയിൽ പങ്കെടുക്കാനായി ഡൽഹിയിലേക്ക് പോകുന്നതിനിടെയാണ് ഈ മാനുഷിക ഇടപെടൽ നടന്നത്. പൊതുപ്രവർത്തനത്തിനൊപ്പം മനുഷ്യസ്നേഹവും ഉത്തരവാദിത്വവും ഒരുപോലെ നിറവേറ്റിയ ഡോ. അഞ്ജലിയുടെ നടപടിയെ സമൂഹം കൈയ്യടിയോടെയാണ് സ്വീകരിക്കുന്നത്.
