അൽ മക്തൂം വിമാനത്താവളത്തിൽ നിന്ന് ഫ്ലൈ ദുബായ് സർവീസുകൾ രണ്ടുവർഷത്തിനകം പുനരാരംഭിക്കും

ദുബായ് : ദുബായ് രാജ്യാന്തര വിമാനത്താവളത്തിൽ (ഡിഎക്സ്ബി) യാത്രക്കാരുടെ തിരക്ക് തുടർച്ചയായി ഉയരുന്നതിനിടെ, അടുത്ത രണ്ട് വർഷത്തിനുള്ളിൽ അൽ മക്തൂം രാജ്യാന്തര വിമാനത്താവളത്തിൽ (ഡിഡബ്ല്യുസി) നിന്ന് സർവീസുകൾ വീണ്ടും ആരംഭിക്കാൻ ഫ്ലൈ ദുബായ് തയ്യാറെടുക്കുന്നു. ദുബായ് എയർഷോ 2025-ൽ മാധ്യമങ്ങളോട് സംസാരിക്കവെയാണ് എയർലൈൻ സിഇഒ ഗൈത് അൽ ഗൈത് ഈ വിവരം സ്ഥിരീകരിച്ചത്.

ഡിഎക്സ്ബി പരമാവധി ശേഷിയിലേക്ക് മുന്നേറുന്നുണ്ടെങ്കിലും നിലവിൽ വലിയ ആശങ്കകൾ ഒന്നുമില്ലെന്ന് അദ്ദേഹം പറഞ്ഞു. പ്രവർത്തന സമ്മർദ്ദം കുറയ്ക്കാനായി ആദ്യം ചെറിയ തോതിൽ ഡിഡബ്ല്യുസിയിൽ നിന്ന് സർവീസുകൾ ആരംഭിക്കുകയും പിന്നീട് ഘട്ടംഘട്ടമായി അതിന്റെ വ്യാപ്തി വർധിപ്പിക്കുകയുമാണ് പദ്ധതിയെന്ന് ഗൈത് അൽ ഗൈത് വ്യക്തമാക്കി.

കോവിഡ് മഹാമാരിക്ക് മുൻപ് ഫ്ലൈ ദുബായ് അൽ മക്തൂം വിമാനത്താവളത്തിൽ നിന്ന് സർവീസുകൾ നടത്തിയിരുന്നെങ്കിലും തുടർന്ന് നിയന്ത്രണങ്ങൾ മൂലം അത് നിർത്തിവയ്ക്കേണ്ടി വന്നിരുന്നു. നിലവിൽ എയർലൈൻ തന്റെ സർവീസുകൾ ഡുബായിലെ രാജ്യാന്തര വിമാനത്താവളത്തിലെ ടെർമിനൽ 2 വഴി നടത്തുന്നുണ്ട്.