ഫ്ളോറിഡ : അമേരിക്കൻ കുറ്റചരിത്രത്തിൽ ഇന്നും വിസ്മയവും ഭീതിയും ഒരുപോലെ ഉണർത്തുന്ന പേരാണ് ഐലീൻ കരോൾ വുർനോസ്. ഫ്ളോറിഡയിലെ തെരുവുകളെ വിറപ്പിച്ച ഈ യുവതി, വെറും 12 മാസത്തിനിടെ ഏഴ് പുരുഷന്മാരെ കൊലപ്പെടുത്തി. 40 മുതൽ 65 വരെ പ്രായമുള്ളവരാണ് ഇരകളായതെന്ന് അന്വേഷണത്തിൽ തെളിഞ്ഞു. തന്റെ പ്രവർത്തനങ്ങളെക്കുറിച്ച് വ്യക്തമായ ബോധ്യമുണ്ടായിരുന്നുവെന്ന് അവസാന നാളുകളിൽ ഐലീൻ പറഞ്ഞിരുന്നു. കയ്പേറിയ ബാല്യാനുഭവങ്ങളും തുടർച്ചയായ പീഡനങ്ങളും തന്നെയാണ് ഒരു സ്ത്രീയെ അമേരിക്കയുടെ ചരിത്രത്തിലെ അപൂർവമായ വനിതാ സീരിയൽ കില്ലറായി മാറ്റിയതെന്ന് അന്വേഷണ ഏജൻസികൾ വിലയിരുത്തി.
പിതാവിനെ ഒരിക്കലും കണ്ടിട്ടില്ലാത്ത ബാല്യമാണ് ഐലീന്റേത്. അമ്മ ഉപേക്ഷിച്ചതോടെ മുത്തശ്ശന്മാരുടെ സംരക്ഷണത്തിലാണ് അവൾ വളർന്നത്. എന്നാൽ ആ വീട്ടിൽ പോലും പീഡനങ്ങൾ അവസാനിച്ചില്ല. ബാല്യത്തിൽ തന്നെ ലൈംഗികാതിക്രമങ്ങൾക്ക് ഇരയായ ഐലീൻ, കൗമാരത്തിൽ ഗർഭിണിയായി കുഞ്ഞിനെ ദത്തുനൽകേണ്ടിവന്നു. പിന്നീട് വീട്ടിൽനിന്നും പുറത്താക്കപ്പെട്ടതോടെ ജീവിക്കാൻ നിവൃത്തിയില്ലാതെ തെരുവുകളിലേക്കും ലൈംഗിക തൊഴിലിലേക്കും അവൾ തള്ളപ്പെട്ടു.
ജീവിതത്തിലെ ദുരിതങ്ങൾക്ക് ആശ്വാസം തേടി മദ്യത്തിന്റെയും ലഹരിയുടെയും വഴിയേ നടന്ന ഐലീൻ പലപ്പോഴും നിയമത്തിന്റെ മുന്നിൽ എത്തി. മോഷണം, ലഹരി ഉപയോഗം, അക്രമം തുടങ്ങിയ കുറ്റങ്ങൾ അവളുടെ ജീവിതത്തിന്റെ ഭാഗമാവുകയായിരുന്നു. 1990ൽ തുടങ്ങിയ കൊലപാതക പരമ്പരയിൽ, ലൈംഗികബന്ധത്തിനായി ഒറ്റപ്പെട്ട ഇടങ്ങളിലേക്ക് കൂട്ടിക്കൊണ്ടുപോയ പുരുഷന്മാരെയാണ് ഐലീൻ വെടിവെച്ച് കൊന്നത്. ആദ്യ ഇര റിച്ചാർഡ് ചാൾസ് മല്ലോറിയായിരുന്നുവെന്നും പിന്നീട് ഓരോ മാസങ്ങളിലുമായി മറ്റു ആറുപേരെയും അവൾ കൊലപ്പെടുത്തിയതായും അന്വേഷണത്തിൽ തെളിഞ്ഞു. ചില കേസുകളിൽ ഇരകളുടെ മൃതദേഹങ്ങൾ കണ്ടെത്താനായില്ലെങ്കിലും, തെളിവുകൾ ഐലീനെതിരെയായിരുന്നു.
കുറ്റകൃത്യങ്ങൾ പുറത്തായത് മോഷ്ടിച്ച വസ്തുക്കൾ പണയശാലകളിൽ വിറ്റതിലൂടെയും വാഹനങ്ങളിൽ നിന്നു ലഭിച്ച വിരലടയാളങ്ങളിലൂടെയുമാണ്. ഐലീന്റെ പ്രണയിനിയായ ടൈറിയ മൂറിന്റെ മൊഴിയും അന്വേഷണത്തിൽ നിർണായകമായി. അറസ്റ്റിലായ ശേഷം, തന്നെ ലൈംഗികമായി പീഡിപ്പിക്കാൻ ശ്രമിച്ചവരെയാണ് കൊന്നതെന്നായിരുന്നു ഐലീന്റെ വാദം. എന്നാൽ കോടതികൾ അത് അംഗീകരിച്ചില്ല.
നീണ്ട നിയമപോരാട്ടങ്ങൾക്ക് ശേഷം ഐലീന് വധശിക്ഷ വിധിക്കപ്പെട്ടു. അപ്പീലുകൾ എല്ലാം തള്ളിയതോടെ 2002 ഒക്ടോബർ 9ന് മാരകമായ വിഷം കുത്തിവച്ച് ശിക്ഷ നടപ്പാക്കി. അവസാന ഭക്ഷണമായി ഒരു കപ്പ് കാപ്പി മാത്രമാണ് അവൾ സ്വീകരിച്ചത്. ഫ്ളോറിഡയിൽ വധശിക്ഷയ്ക്ക് വിധേയയായ രണ്ടാമത്തെ വനിതയായി ഐലീൻ ചരിത്രത്തിൽ ഇടം നേടി.
ഐലീന്റെ ജീവിതം പിന്നീട് പുസ്തകങ്ങൾക്കും ഡോക്യുമെന്ററികൾക്കും സിനിമകൾക്കും വിഷയമായി. ചാർലിസ് തെറോൺ അഭിനയിച്ച ‘മോൺസ്റ്റർ’ എന്ന സിനിമ ഐലീന്റെ ജീവിതകഥ ലോകമാകെ എത്തിച്ചു. ശിക്ഷ നടപ്പാക്കിയിട്ട് വർഷങ്ങൾ കഴിഞ്ഞിട്ടും, ഫ്ളോറിഡയെ വിറപ്പിച്ച ആ പേര് അമേരിക്കൻ സമൂഹം ഇന്നും മറന്നിട്ടില്ല.
