ലോകസമാധാനത്തിന്റെ ശബ്ദമായി ബുദ്ധ സന്യാസിമാരുടെ 15 ആഴ്ച നീണ്ട പദയാത്ര വാഷിങ്ടനിൽ സമാപിക്കുന്നു.
വാഷിങ്ടൻ : ലോകസമാധാനവും മാനവിക മൂല്യങ്ങളും ഉയർത്തിപ്പിടിച്ച് ബുദ്ധ സന്യാസിമാർ നടത്തിയ 15 ആഴ്ച നീണ്ട ഐതിഹാസിക പദയാത്ര അമേരിക്കൻ തലസ്ഥാനമായ വാഷിങ്ടനിൽ സമാപിക്കുന്നു. കഴിഞ്ഞ നാല് മാസത്തോളമായി അമേരിക്കയുടെ വിവിധ സംസ്ഥാനങ്ങളിലൂടെ കാൽനടയായി സഞ്ചരിച്ച സന്യാസിമാർ അക്രമരഹിതവും സഹിഷ്ണുതയുമുള്ള ഒരു ലോകം എന്ന സന്ദേശം ജനങ്ങളിലേക്ക് എത്തിക്കുകയായിരുന്നു.
യുണൈറ്റഡ് സ്റ്റേറ്റ്സിന്റെ വിവിധ ഭാഗങ്ങളിൽ നിന്നായി നൂറുകണക്കിന് ആളുകളാണ് ഈ ചരിത്രനിമിഷത്തിന് സാക്ഷ്യം വഹിക്കാനും സന്യാസിമാരെ വരവേൽക്കാനുമായി തലസ്ഥാന നഗരിയിലേക്ക് ഒഴുകിയെത്തിയത്. യാത്രയുടെ അവസാനഘട്ടത്തിൽ സന്യാസിമാരോടൊപ്പം ചേർന്ന് ഐക്യദാർഢ്യം പ്രഖ്യാപിക്കാൻ വിവിധ മത-സാമൂഹിക സംഘടനകളുടെയും സമാധാനകാംക്ഷികളുടെയും സാന്നിധ്യവും ശ്രദ്ധേയമായി.
മനുഷ്യസ്നേഹവും സഹവർത്തിത്വവും പ്രമേയമാക്കി സംഘടിപ്പിച്ച ഈ ദീർഘയാത്ര സന്ധ്യാസമയത്ത് നടക്കുന്ന പ്രത്യേക പ്രാർഥനയോടെ ഔദ്യോഗികമായി സമാപിക്കും. ലോകമെമ്പാടുമുള്ള സംഘർഷ സാഹചര്യങ്ങളിൽ സമാധാനത്തിന്റെ ശബ്ദം ഉയർത്തേണ്ടതിന്റെ ആവശ്യകത ഓർമ്മപ്പെടുത്തുന്ന സന്ദേശവുമായാണ് പദയാത്ര അവസാനിക്കുന്നത്.
