ന്യൂയോർക്ക് : ന്യൂയോർക്ക് നഗരത്തിൽ ഞായറാഴ്ച രാത്രി വീണ്ടും ലഘു മഞ്ഞുവീഴ്ചയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷകർ അറിയിച്ചു. ഏകദേശം ഒന്നുമുതൽ രണ്ടിഞ്ച് വരെ മഞ്ഞ് ലഭിക്കുമെന്നാണ് പ്രവചനം. തിങ്കളാഴ്ച രാവിലെ റോഡുകളിൽ വഴുക്കൽ ശക്തമാകാൻ സാധ്യതയുള്ളതിനാൽ യാത്ര ചെയ്യുന്നവർ അതീവ ജാഗ്രത പാലിക്കണമെന്ന് നിർദേശം നൽകി.
നഗരത്തോടൊപ്പം ലോങ്ങ് ഐലൻഡ് പ്രദേശവും ന്യൂ ജേർസി യിലെ ചില ഭാഗങ്ങളും ഉൾപ്പെടെ 95-ാം നമ്പർ അന്തർസംസ്ഥാന പാതയുടെ പരിസരങ്ങളിലും ഞായറാഴ്ച വൈകിയോടെ മഞ്ഞ് പെയ്യാൻ തുടങ്ങുമെന്നാണ് റിപ്പോർട്ട്. ഇത് തിങ്കളാഴ്ച പുലർച്ചെ വരെ തുടരാനിടയുണ്ടെന്നും കാലാവസ്ഥാ വിദഗ്ധർ വ്യക്തമാക്കി.
താപനില 20 ഡിഗ്രി ഫാരൻഹീറ്റ് നിരക്കിലേക്കു താഴെയിറങ്ങുന്നതിനാൽ ചെറിയ അളവിൽ ലഭിക്കുന്ന മഞ്ഞുപോലും റോഡുകളിലും പുല്ലുതകിടികളിലും അടിഞ്ഞുകൂടാൻ സാധ്യതയുണ്ട്. പ്രസിഡന്റ്സ് ദിനമായ തിങ്കളാഴ്ച രാവിലെ വാഹനമോടിക്കുന്നവർ പ്രത്യേക ശ്രദ്ധ പാലിക്കണമെന്ന് അധികൃതർ മുന്നറിയിപ്പ് നൽകി.
തിങ്കളാഴ്ച ഉച്ചയോടെ സൂര്യപ്രകാശം തെളിയുന്നതോടെ മഞ്ഞ് ക്രമേണ ഉരുകുമെന്നാണ് പ്രതീക്ഷ. ചൊവ്വാഴ്ചയോടെ താപനില 40 ഡിഗ്രി ഫാരൻഹീറ്റ് കവിയാനും ഈ ആഴ്ച പൊതുവേ സമീകൃത കാലാവസ്ഥ അനുഭവപ്പെടാനും സാധ്യതയുണ്ടെന്ന് കാലാവസ്ഥാ നിരീക്ഷകർ അറിയിച്ചു.
