ടെഹ്റാൻ : പശ്ചിമേഷ്യയിൽ സംഘർഷാവസ്ഥ ശക്തമാകുന്നതിനിടെ, ഇറാനിലെ പ്രധാനപ്പെട്ട രണ്ട് ഊർജ കേന്ദ്രങ്ങളെ ലക്ഷ്യമാക്കി യുഎസും ഇസ്രയേലും വ്യോമാക്രമണം നടത്തിയതായി ഇറാൻ മാധ്യമങ്ങൾ റിപ്പോർട്ട് ചെയ്തു. എന്നാൽ ഈ വിവരം സംബന്ധിച്ച് യുഎസോ ഇസ്രയേലോ ഇതുവരെ ഔദ്യോഗികമായി പ്രതികരിച്ചിട്ടില്ല.
ഇറാനിലെ വൈദ്യുതി നിലയങ്ങളും ഊർജോൽപാദന കേന്ദ്രങ്ങളും അടുത്ത അഞ്ച് ദിവസത്തേക്ക് ആക്രമിക്കില്ലെന്ന് യുഎസ് പ്രസിഡന്റ് ഡോണൾഡ് ട്രംപ് നേരത്തെ വ്യക്തമാക്കിയിരുന്നു. ഹോർമുസ് കടലിടുക്ക് 48 മണിക്കൂറിനകം തുറന്നില്ലെങ്കിൽ ഇത്തരം കേന്ദ്രങ്ങൾ ലക്ഷ്യമാക്കുമെന്നായിരുന്നു ട്രംപിന്റെ മുൻ മുന്നറിയിപ്പ്. പിന്നീട് അദ്ദേഹം നിലപാട് മൃദുവാക്കിയെങ്കിലും, അതിന് വിരുദ്ധമായ രീതിയിലാണ് പുതിയ റിപ്പോർട്ടുകൾ പുറത്ത് വരുന്നത്.
ഇതിനിടെ, കരയുദ്ധം ആരംഭിക്കുകയാണെങ്കിൽ പേർഷ്യൻ ഗൾഫിൽ വ്യാപകമായി മൈനുകൾ വിതയ്ക്കുമെന്ന് ഇറാൻ മുന്നറിയിപ്പ് നൽകി. അത്തരമൊരു സാഹചര്യം ഉണ്ടാകുകയാണെങ്കിൽ, ലോക വ്യാപാരത്തിന് നിർണായകമായ ഹോർമുസ് കടലിടുക്ക് വഴിയുള്ള ചരക്കുനീക്കം പൂർണമായും തടസ്സപ്പെടാൻ സാധ്യതയുണ്ട്.
കരയുദ്ധത്തിന് നിലവിൽ പദ്ധതിയില്ലെന്നാണ് യുഎസ് നിലപാട്. എന്നാൽ ആവശ്യമായാൽ കരയുദ്ധത്തിനും തയ്യാറാണെന്ന് ഇസ്രയേൽ സൂചിപ്പിച്ചതോടെ മേഖലയിലെ സംഘർഷം കൂടുതൽ രൂക്ഷമാകാനുള്ള ആശങ്ക ശക്തമാകുന്നു.
