ആഗോള രാഷ്ട്രീയ അനിശ്ചിതത്വം: ബിറ്റ്കോയിൻ വില 69,000 ഡോളറിന് താഴേക്ക് ഇടിഞ്ഞു.
ന്യൂയോർക്ക് : ആഗോള രാഷ്ട്രീയ സാഹചര്യങ്ങളിലെ അനിശ്ചിതത്വം ക്രിപ്റ്റോ കറൻസി വിപണിയെ ശക്തമായി ബാധിച്ചു. മുൻപത്തെ ആഴ്ചകളിൽ 70,000 ഡോളറിന് മുകളിൽ സ്ഥിരത പുലർത്തിയിരുന്ന ബിറ്റ്കോയിൻ , പെട്ടെന്നുണ്ടായ വിൽപന സമ്മർദ്ദത്തെ തുടർന്ന് 68,680 ഡോളറിലേക്ക് താഴ്ന്നു.
ഹോർമുസ് കടലിടുക്കിനെ ചുറ്റിപ്പറ്റിയുള്ള സംഘർഷാവസ്ഥയും, അതുമായി ബന്ധപ്പെട്ട മുന്നറിയിപ്പുകളും വിപണിയിൽ ആശങ്ക സൃഷ്ടിച്ചു. ഡൊണാൾഡ് ട്രംപ് നടത്തിയ പ്രസ്താവനകൾക്ക് പിന്നാലെ നിക്ഷേപകർ ജാഗ്രത പാലിച്ചതോടെ വിൽപന വർധിച്ചതാണ് ഇടിവിന് കാരണമായത്.
വില ഉയരുമെന്ന പ്രതീക്ഷയിൽ വലിയ തോതിൽ നിക്ഷേപം നടത്തിയവർക്ക് തിരിച്ചടിയായ ഈ ഇടിവ്, ഡെറിവേറ്റീവ് വിപണിയിൽ ഏകദേശം 279 ദശലക്ഷം ഡോളറിന്റെ നഷ്ടത്തിലേക്ക് നയിച്ചു. പ്രധാനമായും ‘ലോംഗ് പോസിഷൻ’ എടുത്ത നിക്ഷേപകരാണ് നഷ്ടം നേരിട്ടത്.
ഇതിനിടെ, Ethereum ഉൾപ്പെടെയുള്ള മറ്റ് പ്രധാന ക്രിപ്റ്റോകറൻസികളും 3 ശതമാനത്തിലധികം ഇടിവ് രേഖപ്പെടുത്തി. ബിറ്റ്കോയിൻ 2.4 ശതമാനം താഴ്ന്നതോടെ വിപണിയിലെ മൊത്തത്തിലുള്ള ആത്മവിശ്വാസം കുറയുകയും ചെയ്തു.
നിലവിൽ 68,000 മുതൽ 72,000 ഡോളർ വരെയുള്ള പരിധിയിലാണ് ബിറ്റ്കോയിൻ വ്യാപാരം നടക്കുന്നത്. രാഷ്ട്രീയ പ്രസ്താവനകളും ആഗോള സംഭവവികാസങ്ങളും വിപണിയെ പെട്ടെന്ന് ബാധിക്കുന്നുണ്ടെങ്കിലും, വലിയ നിക്ഷേപകർ തുടർച്ചയായി ശേഖരണം നടത്തുന്നത് വില കൂടുതൽ ഇടിയാതിരിക്കാൻ സഹായിക്കുന്നതായി വിലയിരുത്തപ്പെടുന്നു.
ആഗോള രാഷ്ട്രീയ സംഭവവികാസങ്ങൾ ക്രിപ്റ്റോ വിപണിയിൽ ഉണ്ടാക്കുന്ന നേരിയ മാറ്റങ്ങൾ പോലും വലിയ വില വ്യതിയാനങ്ങൾക്ക് കാരണമാകുന്നുവെന്നതിന് ഈ ഇടിവ് പുതിയ ഉദാഹരണമായി മാറുന്നു.
