ന്യൂഡൽഹി: സ്വമേധയാ ലൈംഗികത്തൊഴിലിൽ ഏർപ്പെടുന്ന പ്രായപൂർത്തിയായ വ്യക്തികൾക്കെതിരെ പൊലീസ് നടപടിയെടുക്കാനോ അവരെ പീഡിപ്പിക്കാനോ അധികാരമില്ലെന്ന് സുപ്രീം കോടതി. ഉഭയസമ്മതപ്രകാരമുള്ള ലൈംഗിക ബന്ധങ്ങളിലും സ്വമേധയാ നടത്തുന്ന ലൈംഗികത്തൊഴിലിലും ഏർപ്പെടുന്നവരെ കുറ്റവാളികളായി കണക്കാക്കാനാവില്ലെന്നും കോടതി വ്യക്തമാക്കി.
70 വർഷം പഴക്കമുള്ള നിയമത്തിലെ വ്യവസ്ഥകൾ സ്വമേധയാ ലൈംഗികത്തൊഴിൽ ചെയ്യുന്നവർക്കെതിരെ നടപടിയെടുക്കാൻ പൊലീസിന് അധികാരം നൽകുന്നില്ലെന്ന് ജസ്റ്റിസ് ജെ.ബി. പർദിവാലയും ജസ്റ്റിസ് ആർ. മഹാദേവനും ഉൾപ്പെട്ട ബെഞ്ച് നിരീക്ഷിച്ചു. ലൈംഗികത്തൊഴിൽ കേന്ദ്രങ്ങൾ (ബ്രോത്തലുകൾ) നടത്തുന്നത് നിയമവിരുദ്ധമാണെങ്കിലും, റെയ്ഡുകൾക്കിടെ കണ്ടെത്തുന്ന സ്വമേധയാ ലൈംഗികത്തൊഴിലാളികളെ ഇരകളാക്കുകയോ കസ്റ്റഡിയിലെടുക്കുകയോ ചെയ്യരുതെന്നും കോടതി വ്യക്തമാക്കി.
സ്വന്തം ഇഷ്ടപ്രകാരം ലൈംഗികത്തൊഴിലിൽ ഏർപ്പെടുന്നവരെ ‘രക്ഷപ്പെടുത്തേണ്ട’ സാഹചര്യമില്ലെന്നും, അവരുടെ താൽപര്യത്തിന് വിരുദ്ധമായി പുനരധിവസിപ്പിക്കാൻ പാടില്ലെന്നും കോടതി ചൂണ്ടിക്കാട്ടി. പുനരധിവാസ നടപടികൾ നിർബന്ധിതമാകരുത്; പകരം വ്യക്തികളുടെ സ്വയംഭരണാവകാശത്തെയും തിരഞ്ഞെടുപ്പുകളെയും മാനിക്കുന്നതാകണം.
വാണിജ്യ ലൈംഗിക ചൂഷണത്തിനായി കടത്തിക്കൊണ്ടുവരപ്പെട്ടവരുടെ പുനരധിവാസവും സംരക്ഷണ കേന്ദ്രങ്ങളിലെ താമസവുമായി ബന്ധപ്പെട്ട തീരുമാനങ്ങളിൽ പ്രായപൂർത്തിയായ ലൈംഗികത്തൊഴിലാളികളുടെ സമ്മതത്തിന് മുൻഗണന നൽകണമെന്നും കോടതി നിർദേശിച്ചു. ലൈംഗികത്തൊഴിലുമായി ബന്ധപ്പെട്ട സാഹചര്യങ്ങളിൽ കണ്ടെത്തപ്പെടുന്ന എല്ലാവരെയും ഒരേ രീതിയിൽ കാണുന്ന നിലവിലെ നിയമത്തിലെ സമീപനത്തെ കോടതി തള്ളിക്കളഞ്ഞു.
മനുഷ്യക്കടത്തിന് ഇരയായവരും ഭീഷണിയുടെയും നിർബന്ധത്തിന്റെയും പേരിൽ ലൈംഗികത്തൊഴിലിൽ ഏർപ്പെടുന്നവരും സ്വന്തം ഇഷ്ടപ്രകാരം തൊഴിൽ ചെയ്യുന്നവരും വ്യത്യസ്ത സാഹചര്യങ്ങളിലുള്ളവരാണെന്ന് മജിസ്ട്രേറ്റുമാർ തിരിച്ചറിയേണ്ടതുണ്ടെന്നും കോടതി വ്യക്തമാക്കി.
മുതിർന്ന അഭിഭാഷക അപർണ ഭട്ട് സമർപ്പിച്ച ഇരകളുടെ സംരക്ഷണ പദ്ധതി അംഗീകരിച്ചുകൊണ്ടാണ് കോടതി നിർണായക ഉത്തരവ് പുറപ്പെടുവിച്ചത്. ഇരകളെ പുനരധിവാസത്തിന്റെ നിഷ്ക്രിയ വസ്തുക്കളായി കാണാതെ അവരുടെ അവകാശങ്ങളെയും തീരുമാനങ്ങളെയും ബഹുമാനിക്കണമെന്നും കോടതി കൂട്ടിച്ചേർത്തു. ഓരോ കേസിന്റെയും പ്രത്യേക സാഹചര്യങ്ങളും ബന്ധപ്പെട്ട വ്യക്തികളുടെ സമ്മതവും പരിഗണിച്ചായിരിക്കണം തുടർനടപടികളെന്നും വിധിയിൽ വ്യക്തമാക്കുന്നു.
