പിന്നണി ഗായിക ശാന്ത മധുവിന് അന്ത്യാഞ്ജലി;
ന്യൂയോർക്ക്: സംഗീത അധ്യാപികയും പിന്നണി ഗായികയുമായ ശാന്ത മധു (77) ന്യൂയോർക്കിലെ റോക്ലാൻഡ് കൗണ്ടിയിൽ അന്തരിച്ചു. ദീർഘകാലമായി സംഗീത അധ്യാപികയായി പ്രവർത്തിച്ചിരുന്ന ശാന്ത മധു നിരവധി വിദ്യാർത്ഥികൾക്ക് സംഗീതം പകർന്നുനൽകിയിരുന്നു. നിരവധി മലയാള സിനിമകളിലും അവർ ഗാനങ്ങൾ ആലപിച്ചിട്ടുണ്ട്.
ശാന്ത മധുവിന്റെ നിര്യാണത്തെ തുടർന്ന് സംസ്കാരച്ചെലവുകൾക്കും കുടുംബത്തിന്റെ അടിയന്തര ആവശ്യങ്ങൾക്കും സഹായം ലഭ്യമാക്കുന്നതിനായി കുടുംബാംഗങ്ങളും സുഹൃത്തുക്കളും ചേർന്ന് ഗോഫണ്ട്മീ (GoFundMe) വഴി ധനസമാഹരണം ആരംഭിച്ചിട്ടുണ്ട്. ലോകമെമ്പാടുമുള്ള മലയാളികളോടും സംഗീതാസ്വാദകരോടും ഈ സംരംഭത്തെ പിന്തുണയ്ക്കണമെന്ന് സംഘാടകർ അഭ്യർഥിച്ചു.
പ്രശസ്ത സംഗീത അധ്യാപികയും പിന്നണി ഗായികയുമായ ശ്രീമതി ശാന്ത മധുവിന്റെ നിര്യാണവാർത്തയിൽ കുടുംബാംഗങ്ങളുടെ വേദനയിൽ കേരള ടൈംസ് എം.ഡി.യും, മുൻ ഫൊക്കാന പ്രസിഡന്റുമായ ശ്രീ. പോൾ കറുകപ്പിള്ളിൽ കേരള ടൈംസിന്റെ പേരിലും വ്യക്തിപരമായും അനുശോചനം അറിയിച്ചുകൊള്ളുന്നു.
ശാന്ത മധുവിന്റെ സംസ്കാര ചടങ്ങുകൾ പിന്നീട് നടക്കുമെന്ന് കുടുംബം അറിയിച്ചു. സംഗീതരംഗത്തും പ്രവാസി മലയാളി സമൂഹത്തിലും അവർ നൽകിയ സംഭാവനകൾ അനുസ്മരിച്ചുകൊണ്ട് നിരവധി പേർ അനുശോചനം രേഖപ്പെടുത്തി.
