കൊച്ചിന്‍ കോര്‍പ്പറേഷന്‍ യുഡിഎഫ് തിരിച്ചുപിടിച്ചു; നിര്‍മ്മല ടീച്ചറുടെ വിജയം ‘മനസ്സുനിറയ്ക്കുന്ന സന്തോഷം’ — ഹൈബി ഈഡന്‍ എംപി

കൊച്ചി: തദ്ദേശ സ്വയംഭരണ തെരഞ്ഞെടുപ്പ് ഫലം പുറത്തുവന്നതിനു പിന്നാലെ ഹൈബി ഈഡന്‍ എംപി ഫേസ്ബുക്ക് കുറിപ്പുമായി രംഗത്തെത്തി. കൊച്ചിന്‍ കോര്‍പ്പറേഷന്‍ യുണൈറ്റഡ് ഡെമോക്രാറ്റിക് ഫ്രണ്ട് (യുഡിഎഫ്) തിരിച്ചുപിടിച്ചതായി ഹൈബി ഈഡന്‍ കുറിച്ചു. എന്നാല്‍ വിജയത്തിന്റെ ആവേശത്തിനപ്പുറം, ഗാന്ധി നഗറിലെ നിര്‍മ്മല ടീച്ചറുടെ വിജയമാണ് മനസ്സിനെ ഏറ്റവും അധികം സന്തോഷിപ്പിച്ചതെന്നും അദ്ദേഹം വ്യക്തമാക്കി. പദവിയില്ലാതെ, പ്രൗഢിയില്ലാതെ, സാധാരണക്കാരില്‍ സാധാരണയായ ഒരാളുടെ അസാധാരണ വിജയമാണിതെന്നും ഹൈബി ഈഡന്‍ കുറിച്ചു.

ഫേസ്ബുക്ക് കുറിപ്പില്‍ ഹൈബി ഈഡന്‍ പറഞ്ഞത് ഇങ്ങനെ:
“കൊച്ചിന്‍ കോര്‍പ്പറേഷന്‍ യു ഡി എഫ് തൂക്കി. എന്നാലും മനസ്സിനെ ഏറ്റവും അധികം നിറയ്ക്കുന്ന സന്തോഷം ഗാന്ധി നഗറിലെ നിര്‍മ്മല ടീച്ചറുടെ വിജയമാണ്. സാധാരണക്കാരില്‍ സാധാരണയായ ഒരാളുടെ അസാധാരണ വിജയം.”

കഴിഞ്ഞ തവണ നഷ്ടമായ കൊച്ചി കോര്‍പ്പറേഷന്‍ ഭരണം ഇത്തവണ യുഡിഎഫ് തിരികെ പിടിച്ചു. 45 മുതല്‍ 50 വരെ ഡിവിഷനുകളില്‍ വിജയിച്ച് ഭരണം ഉറപ്പിക്കാനാണ് യുഡിഎഫിന്റെ നീക്കം. മേയര്‍ സ്ഥാനാര്‍ഥിയായ ദീപ്തി മേരി വര്‍ഗീസ് വിജയിച്ചപ്പോള്‍, മേയര്‍ സ്ഥാനത്തിന് പരിഗണിക്കപ്പെട്ടിരുന്ന വി.കെ. മിനിമോളും വിജയിച്ചു.

2020ല്‍ കോണ്‍ഗ്രസ് വിമതരുടെ പിന്തുണയോടെ ലഫ്റ്റ് ഡെമോക്രാറ്റിക് ഫ്രണ്ട് (എല്‍ഡിഎഫ്) ഭരണം പിടിച്ചെടുത്ത കോര്‍പ്പറേഷനാണ് കൊച്ചി. അന്നത്തെ കക്ഷി നില എല്‍ഡിഎഫ് 34, യുഡിഎഫ് 31, നാഷണല്‍ ഡെമോക്രാറ്റിക് അലയന്‍സ് (എന്‍ഡിഎ) 5, സ്വതന്ത്രര്‍ 4 എന്നിങ്ങനെയായിരുന്നു. ഇത്തവണ നഷ്ടമായ ഭരണം തിരികെ പിടിക്കുമെന്ന യുഡിഎഫ് നേതൃത്വത്തിന്റെ അവകാശവാദം ഫലത്തില്‍ യാഥാര്‍ഥ്യമായി.

അതേസമയം, ത്രിതല പഞ്ചായത്ത് തെരഞ്ഞെടുപ്പില്‍ യുഡിഎഫാണ് മൊത്തത്തില്‍ മുന്നേറ്റം കൈവരിച്ചിരിക്കുന്നത്. ഇടത് കോട്ടകളില്‍ പോലും എല്‍ഡിഎഫിന് തിരിച്ചടി നേരിട്ടു. എന്‍ഡിഎയും നില മെച്ചപ്പെടുത്തിയിട്ടുണ്ട്. സംസ്ഥാനത്തെ 14 ജില്ലകളിലായി 244 കേന്ദ്രങ്ങളില്‍ 1129 തദ്ദേശ സ്ഥാപനങ്ങളിലേക്കുള്ള വോട്ടെണ്ണല്‍ പുരോഗമിക്കുകയാണ്.

രണ്ട് ഘട്ടങ്ങളായി നടന്ന ഇത്തവണത്തെ തദ്ദേശ തെരഞ്ഞെടുപ്പില്‍ 73.68 ശതമാനം പോളിംഗാണ് രേഖപ്പെടുത്തിയത്. 2020ല്‍ ഇത് 75.95 ശതമാനമായിരുന്നു. സംസ്ഥാനത്ത് ആകെ 2,10,79,021 പേര്‍ വോട്ട് രേഖപ്പെടുത്തി. ഡിസംബര്‍ 9ന് നടന്ന ആദ്യഘട്ടത്തില്‍ 70.9 ശതമാനവും, ഡിസംബര്‍ 11ന് നടന്ന രണ്ടാംഘട്ടത്തില്‍ 76.08 ശതമാനവും പോളിംഗ് രേഖപ്പെടുത്തി.