അമേരിക്കയുടെ മിന്നൽനീക്കം; ഇറാന്റെ നാവിക ശക്തിക്ക് കനത്ത തിരിച്ചടി, നിരവധി യുദ്ധക്കപ്പലുകൾ തകർന്നു.
പശ്ചിമേഷ്യയിൽ സംഘർഷാവസ്ഥ ശക്തമാകുന്നതിനിടെ അമേരിക്കൻ സൈന്യം നടത്തിയ ശക്തമായ സൈനിക നീക്കത്തിൽ ഇറാന്റെ നാവിക ശേഷിക്ക് കനത്ത തിരിച്ചടി ലഭിച്ചതായി റിപ്പോർട്ടുകൾ. കഴിഞ്ഞ കുറച്ച് ദിവസങ്ങളായി നടന്ന ‘ഓപ്പറേഷൻ എപിക് ഫ്യൂറി’ എന്ന സൈനിക നടപടിയിൽ ഇറാന്റെ 20-ലധികം യുദ്ധക്കപ്പലുകൾ തകർക്കുകയോ കടലടിത്തട്ടിലേക്ക് മുക്കുകയോ ചെയ്തതായി യുഎസ് സെൻട്രൽ കമാൻഡ് അറിയിച്ചു.
ഈ സൈനിക നടപടിയുടെ ഭാഗമായി നടന്ന ഏറ്റവും ശ്രദ്ധേയമായ സംഭവങ്ങളിൽ ഒന്നാണ് ശ്രീലങ്കൻ തീരത്തിന് സമീപം നടന്ന ആക്രമണം. ഇറാന്റെ അത്യാധുനിക ഗൈഡഡ് മിസൈൽ ഫ്രിഗേറ്റായ ഐആർഐഎസ് ദേനയെ (IRIS Dena) അമേരിക്കൻ ആണവ അന്തർവാഹിനി പ്രയോഗിച്ച ടോർപ്പിഡോ ആക്രമണത്തിലൂടെ കടലടിത്തട്ടിലേക്ക് മുക്കിയെന്നാണ് റിപ്പോർട്ട്. പതിറ്റാണ്ടുകൾക്ക് ശേഷം ശത്രുരാജ്യത്തിന്റെ യുദ്ധക്കപ്പൽ ഒരു അമേരിക്കൻ അന്തർവാഹിനി നേരിട്ട് മുക്കുന്ന സംഭവം ഇതാണെന്നാണ് വിലയിരുത്തൽ. ഇതോടൊപ്പം ഇറാന്റെ ഏറ്റവും വലിയ കപ്പലുകളിലൊന്നായ ഐആർഐഎസ് മക്രാനും ഡ്രോൺ കയറ്റുമതി കപ്പലായ ഷാഹിദ് ബഗേരിയും തകർക്കപ്പെട്ടവയിൽ ഉൾപ്പെടുന്നതായും വിവരങ്ങളുണ്ട്.
അത്യാധുനിക സ്റ്റെൽത്ത് യുദ്ധവിമാനങ്ങളും അമേരിക്കൻ നാവികസേനയുടെ ഡിസ്ട്രോയറുകളും സംയുക്തമായി നടത്തിയ ആക്രമണത്തിലാണ് ഇറാന്റെ യുദ്ധക്കപ്പലുകൾ, അന്തർവാഹിനികൾ, ലോജിസ്റ്റിക് കപ്പലുകൾ എന്നിവയ്ക്ക് വലിയ നാശനഷ്ടം സംഭവിച്ചതെന്നാണ് യുഎസ് പ്രതിരോധവകുപ്പ് വ്യക്തമാക്കുന്നത്. നിലവിൽ പേർഷ്യൻ ഗൾഫ് മേഖലയിൽ ഇറാന്റെ നാവികസേനയ്ക്ക് വലിയ തിരിച്ചടിയുണ്ടായെന്നും തിരിച്ചടിക്കാനുള്ള അവരുടെ ശേഷി ഗുരുതരമായി ബാധിച്ചിരിക്കുകയാണെന്നും അമേരിക്കൻ പ്രതിരോധ സെക്രട്ടറി അറിയിച്ചു.
ഹോർമുസ് കടലിടുക്കിന്റെ നിയന്ത്രണം പിടിച്ചെടുക്കാനുള്ള ഇറാന്റെ ശ്രമങ്ങൾക്ക് ഈ സൈനിക നീക്കം വലിയ തിരിച്ചടിയായാണ് വിലയിരുത്തപ്പെടുന്നത്. സംഭവവികാസങ്ങളുടെ പശ്ചാത്തലത്തിൽ ഇറാന്റെ എണ്ണക്കയറ്റുമതിയിലും സൈനിക വിന്യാസങ്ങളിലും പ്രതിഫലനങ്ങൾ ഉണ്ടാകാമെന്നാണ് അന്താരാഷ്ട്ര നിരീക്ഷകരുടെ വിലയിരുത്തൽ. യുദ്ധഭൂമിയിൽ നിന്നുള്ള കൂടുതൽ വിവരങ്ങളും ദൃശ്യങ്ങളും പുറത്തുവരുന്നതിനിടെ പശ്ചിമേഷ്യയിലെ രാഷ്ട്രീയവും സുരക്ഷാ സാഹചര്യവും പുതിയ വഴിത്തിരിവിലേക്കാണ് നീങ്ങുന്നതെന്നാണ് സൂചന.
