ജീവിതത്തിന് പ്രത്യാശയുടെ പുതുചുവടുമായി ‘ലൈഫ് ആൻഡ് ലിംബ്’; ജൂൺ 28ന് ന്യൂയോർക്കിൽ ഡിന്നർ നൈറ്റ്.

ജനറൽ കോർഡിനേറ്റർമാർ:

പോൾ കറുകപ്പിള്ളിൽ: (845) 553-5671 നോഹ ജോർജ്: (845) 293-9466

ഇവൻ്റ് കോർഡിനേറ്റർമാർ:

ഷെറിൻ എബ്രഹാം ബിജു ചാക്കോ സാം ബേബി സാമുവൽ അജിത് കൊച്ചുസ്

ന്യൂയോർക്ക്: നഷ്ടപ്പെട്ടുപോയത് കാലുകൾ മാത്രമല്ല, തങ്ങളുടെ സ്വപ്നങ്ങളും ജീവിക്കാനുള്ള പ്രതീക്ഷകളുമാണെന്ന് കരുതി നിരാശരായ ഒട്ടനവധി മനുഷ്യർക്ക് പ്രതീക്ഷയുടെ പുതുചുവട് നൽകുകയാണ് ‘ലൈഫ് ആൻഡ് ലിംബ്’ എന്ന സംഘടന. അപകടങ്ങൾ മൂലവും രോഗങ്ങൾ കാരണവും കാലുകൾ നഷ്ടപ്പെട്ട സാമ്പത്തികമായി പിന്നാക്കം നിൽക്കുന്നവർക്ക് കൃത്രിമ കാലുകൾ സൗജന്യമായി നൽകുന്ന ജീവകാരുണ്യ സംഘടനയായ ‘ലൈഫ് ആൻഡ് ലിംബ്’ പ്രത്യേക ഡിന്നർ നൈറ്റ് സംഘടിപ്പിക്കുന്നു. ജൂൺ 28 ഞായറാഴ്ച വൈകുന്നേരം 4:30 മുതൽ ന്യൂയോർക്കിലെ ഓറഞ്ച്ബർഗിലുള്ള ‘ദി സിറ്റാർ പാലസിൽ‍’ (The Sitar Palace) വെച്ചാണ് ചടങ്ങ് നടക്കുക.

ജനറൽ കോർഡിനേറ്റർമാരായ പോൾ കറുകപ്പിള്ളിൽ (845-553-5671), നോഹ ജോർജ് (845-293-9466) എന്നിവർക്കൊപ്പം ഇവൻ്റ് കോർഡിനേറ്റർമാരായ ഷെറിൻ എബ്രഹാം, ബിജു ചാക്കോ, സാം ബേബി സാമുവൽ, അജിത് കൊച്ചുസ് എന്നിവരും പരിപാടിയുടെ സംഘാടനത്തിന് നേതൃത്വം നൽകുന്നു. കൂടാതെ ജോയ് മെക്കാട്ടെ, സ്റ്റാൻലി മാത്യു, ബിജു ജോൺ, അജിത് കുമാർ, ഡേവിഡ് ജോൺസൺ, ദിനി ഫിലിപ്പ്, ജെയ്ൻ ജോർജ്, ജോർജ് ജോൺ, ജോർജ് പറമ്പിൽ, അപ്പുക്കുട്ടൻ ആറ്റുപുറത്ത്, ഏലിയാമ്മ അപ്പുക്കുട്ടൻ തുടങ്ങിയവർ അടങ്ങുന്ന വിപുലമായ കോർഡിനേറ്റേഴ്സ് സംഘവും പരിപാടിയുടെ വിജയത്തിനായി പ്രവർത്തിക്കുന്നുണ്ട്.

അർഹരായ ആളുകളിലേക്ക് കൃത്രിമ കാലുകൾ എത്തിക്കുന്നതിലൂടെ അവരുടെ സ്വാതന്ത്ര്യവും അന്തസ്സും പ്രത്യാശയും വീണ്ടെടുക്കുക എന്ന ലക്ഷ്യത്തോടെയാണ് ഈ സംഘടന പ്രവർത്തിക്കുന്നത്. പാർശ്വവൽക്കരിക്കപ്പെട്ട സമൂഹങ്ങളിലെ അംഗവൈകല്യമുള്ളവർ നേരിടുന്ന കടുത്ത വെല്ലുവിളികളെക്കുറിച്ച് അവബോധം വളർത്തുന്നതിനാണ് ഈ ഒത്തുചേരൽ പ്രധാനമായും ലക്ഷ്യമിടുന്നത്.

മാനുഷിക പരിഗണന നൽകുന്ന സാമൂഹിക പ്രതിബദ്ധതയുള്ള പ്രമുഖർ, ജീവകാരുണ്യ പ്രവർത്തകർ, വിവിധ മേഖലകളിലെ പ്രൊഫഷണലുകൾ ഉൾപ്പെടെ ഇരുനൂറോളം വിശിഷ്ട വ്യക്തികൾ ഈ പരിപാടിയിൽ പങ്കെടുക്കുമെന്ന് ഭാരവാഹികൾ അറിയിച്ചു.

കൂടുതൽ വിവരങ്ങൾക്കും രജിസ്ട്രേഷനും www.lifeandlimb.org എന്ന വെബ്‌സൈറ്റ് സന്ദർശിക്കുകയോ താഴെ പറയുന്ന ഭാരവാഹികളുമായി ബന്ധപ്പെടുകയോ ചെയ്യാവുന്നതാണ്.

ന്യൂയോർക്കിൽ താമസിക്കുന്ന മലയാളിയായ ജോൺസൺ സാമുവേൽ (റെജി) എന്ന മനുഷ്യസ്നേഹി കഴിഞ്ഞ ഒരു പതിറ്റാണ്ടിലേറെയായി കേരളത്തിൽ കാലുകൾ നഷ്ടപ്പെട്ടവരെ പരസഹായം കൂടാതെ നടക്കുവാൻ സഹായകരമായ കൃത്രിമ കാലുകൾ സൗജന്യമായി നൽകുന്ന പ്രവർത്തനത്തിൽ ഏർപ്പെട്ടിരിക്കുകയാണ്. കഴിഞ്ഞ പതിനൊന്ന് വർഷത്തിലേറെയായി ഇരുന്നൂറിലധികം വ്യക്തികൾക്ക് ചലനശേഷി നൽകുവാൻ അദ്ദേഹത്തിന് കഴിഞ്ഞു. സ്വന്തം സമ്പാദ്യത്തിൽ നിന്ന് സ്വരൂപിച്ചതും ബന്ധുക്കളുടെയും സുഹൃത്തുക്കളുടെയും സഹായത്താലുമാണ് അത് സാധ്യമാക്കിയത്. അതിനായി ‘ലൈഫ് ആൻഡ് ലിംബ്’ എന്ന സ്ഥാപനം തൻ്റെ ജന്മദേശമായ മാവേലിക്കരയിൽ സ്ഥാപിക്കുവാനും അനേകർക്ക് അതിലൂടെ സഹായം നൽകുവാനും അദ്ദേഹം നേരിട്ട് പ്രവർത്തിച്ചു വരുന്നു.

അപകടങ്ങളോ രോഗങ്ങളോ മൂലം കൃത്രിമക്കാൽ ആവശ്യമായി വരികയും എന്നാൽ സാമ്പത്തിക ബുദ്ധിമുട്ടുകൾ കാരണം അത് വാങ്ങാൻ സാധിക്കാതിരിക്കുകയും ചെയ്യുന്ന അർഹരായ ആളുകൾക്ക് സൗജന്യമായി കൃത്രിമക്കാൽ നൽകുകയാണ് ‘ലൈഫ് ആൻഡ് ലിംബ്’. ചലനശേഷി എന്നത് എല്ലാ മനുഷ്യരുടെയും അടിസ്ഥാന അവകാശമാണെന്നും സാമ്പത്തിക ബുദ്ധിമുട്ടുകൾ ഒരാളുടെ നടത്തം, ജോലി, അന്തസ്സോടെയുള്ള ജീവിതം എന്നിവയ്ക്ക് തടസ്സമാകരുത് എന്നുമുള്ള കാഴ്ചപ്പാടോടെയാണ് ഈ സംഘടന പ്രവർത്തിക്കുന്നത്. തുടക്കത്തിൽ കുറച്ചുപേരെ സഹായിക്കുക എന്ന ലക്ഷ്യത്തോടെയാണ് ആരംഭിച്ചതെങ്കിലും ഇന്ന് ധാരാളം ആളുകൾക്ക് ചലനശേഷിയും സ്വാതന്ത്ര്യവും പ്രത്യാശയും വീണ്ടെടുത്ത് നൽകാൻ ഈ പ്രസ്ഥാനത്തിന് സാധിച്ചിട്ടുണ്ട്.

ഉയർന്ന ഗുണമേന്മയുള്ളതും ശരീരത്തിന് അനുയോജ്യമായതുമായ കൃത്രിമക്കാലുകളാണ് ഇവിടെ തികച്ചും സൗജന്യമായി നൽകുന്നത്. കാരുണ്യത്തിലധിഷ്ഠിതമായ നൂതന സാങ്കേതികവിദ്യയിലൂടെ ഓരോ വ്യക്തിയെയും ആത്മവിശ്വാസമുള്ളവരാക്കി മാറ്റുകയും അതുവഴി എല്ലാവരെയും ഉൾക്കൊള്ളുന്ന ഒരു സമഗ്ര സമൂഹം കെട്ടിപ്പടുക്കുകയുമാണ് സംഘടന ലക്ഷ്യമിടുന്നത്.

ഒരു വ്യക്തിയുടെ പ്രാഥമിക കൺസൾട്ടേഷൻ മുതൽ ദീർഘകാല പിന്തുണ വരെ ഉറപ്പുനൽകുന്ന സമഗ്രമായ പ്രോസ്തെറ്റിക് സേവനങ്ങളാണ് ഈ സംഘടന നൽകുന്നത്. ആവശ്യക്കാർക്ക് അവരുടെ ശരീരഘടനയ്ക്ക് അനുയോജ്യമായ സൗജന്യ കസ്റ്റം പ്രോസ്തെറ്റിക് നിർമ്മിച്ചു നൽകുന്നതിനൊപ്പം തന്നെ, കൃത്രിമക്കാലുകൾ മികച്ച രീതിയിൽ പ്രവർത്തിക്കുന്നുണ്ടെന്ന് ഉറപ്പാക്കാനായി പ്രോസ്തെറ്റിക് അറ്റകുറ്റപ്പണികളും ഇവർ ചെയ്തുനൽകുന്നു. ഇതിനുപുറമേ, ശാരീരിക ബുദ്ധിമുട്ടുകൾ നേരിടുന്ന വ്യക്തികൾക്ക് മാനസികവും വൈകാരികവുമായ പിന്തുണയേകാൻ വിദഗ്ധമായ കൗൺസിലിംഗ് സേവനങ്ങളും ഈ സംഘടന ഉറപ്പാക്കുന്നുണ്ട്.