മലപ്പുറത്ത് കടുവാ ആക്രമണം; റബ്ബര്‍ ടാപ്പിങ്ങ് തൊഴിലാളിക്ക് ദാരുണാന്ത്യം
മലപ്പുറം: മലപ്പുറത്ത് കടുവയുടെ ആക്രണത്തില്‍ റബ്ബര്‍ ടാപ്പിങ്ങ് തൊഴിലാളിക്ക് ദാരുണാന്ത്യം. ചോക്കാട് കല്ലാമൂല സ്വദേശി അബ്ദുല്‍ ഗഫൂര്‍ (വയസ് ലഭ്യമല്ല) ആണ് കൊല്ലപ്പെട്ടത്.
കാളികാവ് അടയ്ക്കാക്കുണ്ട് റാവുത്തന്‍കാവ് ഭാഗത്തെ സ്ലോട്ടര്‍ ടാപ്പിങ് തോട്ടത്തിലാണ് സംഭവം നടന്നത്. രാവിലെ ആറരയോടെയായിരുന്നു ആക്രമണം. റബ്ബര്‍ ടാപ്പിങ്ങിനായി എത്തിച്ചേരുമ്പോഴായിരുന്നു കടുവയുടെ ആക്രമണമെന്ന് വ്യക്തമാകുന്നു.
അബ്ദുല്‍ ഗഫൂറിനെ കടുവ കടിച്ച് വലിച്ചിഴക്കുന്നത് തന്നോടൊപ്പം ഉണ്ടായിരുന്ന തൊഴിലാളി കണ്ടതായി പറഞ്ഞു. ഉടന്‍ വിവരമറിഞ്ഞ് സ്ഥലത്തെത്തിയ പൊലീസ് നടത്തിയ പ്രാഥമിക അന്വേഷണത്തില്‍ കടുവയുടെ ആക്രമണമാണെന്ന് സ്ഥിരീകരിച്ചു.
മൃതദേഹം ഏറെക്കുറെ നഗ്‌നമായ നിലയില്‍ കണ്ടെത്തുകയായിരുന്നു. ഇതിനുമുമ്പ് ഇതേ പ്രദേശത്ത് നിരവധി ആടുകളെ കടുവ പിടിച്ചെടുത്തിട്ടുണ്ടെന്നു നാട്ടുകാര്‍ പറഞ്ഞു.
കടുവയുടെ സാന്നിധ്യം സംബന്ധിച്ച് മുന്‍കരുതലുകള്‍ വേണമെന്ന ആവശ്യം ശക്തമാകുന്നു. വനവകുപ്പ് അധികൃതര്‍ സംഭവസ്ഥലത്തെത്തി പരിശോധന നടത്തി.
