ന്യൂയോർക്ക്∙ ലോകത്തെ വലിയ സാങ്കേതിക കമ്പനിയായ മെറ്റയുടെ ഇന്ത്യയിലെ പുതിയ തലവനായി അരുൺ ശ്രീനിവാസിനെ നിയമിച്ചു. ജൂലൈ ഒന്നുമുതൽ അരുൺ പുതിയ ചുമതല ഏറ്റെടുക്കും. നിലവിൽ അദ്ദേഹം ഇന്ത്യയിലെ പരസ്യ ബിസിനസ് വിഭാഗത്തിന്റെ മേധാവിയായാണ് ജോലി ചെയ്യുന്നത്.
ഇന്ത്യൻ വിപണിയിൽ മെറ്റയുടെ വളർച്ചയ്ക്ക് പുതിയ ദിശ നൽകാനുള്ള തീരുമാനമായാണ് ഈ നിയമനം വിലയിരുത്തപ്പെടുന്നത്.
മൂന്ന് പതിറ്റാണ്ടിലേറെക്കാലം വിപണന-വിൽപ്പന മേഖലയിൽ പ്രവർത്തിച്ച അനുഭവ സമ്പത്താണ് അരുൺ ശ്രീനിവാസിനുള്ളത്. ഐഐഎം കൊൽക്കത്തയിൽ നിന്ന് എംബിഎ നേടിയ അദ്ദേഹം ഹിന്ദുസ്ഥാൻ യൂണിലിവർ, റീബോക്ക്, ഓല, വെസ്റ്റ്ബ്രിഡ്ജ് ക്യാപിറ്റൽ തുടങ്ങിയ പ്രമുഖ കമ്പനികളിൽ മുൻനിര നിലപാടുകളിൽ പ്രവർത്തിച്ചിട്ടുണ്ട്.
ഇന്ത്യൻ ഉപഭോക്താക്കളുടെ മനസ്സിലേക്കെത്താനുള്ള ശ്രമത്തിൽ മെറ്റയ്ക്ക് കൂടുതൽ കരുത്തായി അരുൺ ശ്രീനിവാസ് മാറുമെന്നാണ് കമ്പനി പ്രതീക്ഷിക്കുന്നത്.
